7 shlokas
- 1
संन्यासिनो ऽनाहिताग्नेर्देहं मृतं पुत्रो ऽन्यो वा तृणैर् अन्तरीकृत्य शुद्धैर्ब्राह्मणैर्यन्त्रेण वा संनिधाय समुद्रगाम्यां नद्यां तीरे वा सैकते देशे सृगालादिभिर् अस्पृश्यं यथा तथावटं खनति
saṃnyāsino 'nāhitāgnerdehaṃ mṛtaṃ putro 'nyo vā tṛṇair antarīkṛtya śuddhairbrāhmaṇairyantreṇa vā saṃnidhāya samudragāmyāṃ nadyāṃ tīre vā saikate deśe sṛgālādibhir aspṛśyaṃ yathā tathāvaṭaṃ khanati
- 2
गायत्र्या स्नापयित्वा तथा तत्रासयित्वा शाययित्वा वा दक्षिणे हस्ते वैष्णवैर्मन्त्रैस्त्रिदण्डं संन्यस्य सव्ये यद् अस्य पारे रजस इति शिक्यम् अप्पवित्रम् उदरे सावित्र्या भिक्षापात्रं गुह्यप्रदेशे भूमिर्भूमिम् इति काषायं मृद्ग्रहणीं कमण्डलुं च संन्यस्य पिदध्यात्
gāyatryā snāpayitvā tathā tatrāsayitvā śāyayitvā vā dakṣiṇe haste vaiṣṇavairmantraistridaṇḍaṃ saṃnyasya savye yad asya pāre rajasa iti śikyam appavitram udare sāvitryā bhikṣāpātraṃ guhyapradeśe bhūmirbhūmim iti kāṣāyaṃ mṛdgrahaṇīṃ kamaṇḍaluṃ ca saṃnyasya pidadhyāt
- 3
तस्मिन्सृगालादिभिः स्पृष्टे तत्कर्ता पापीयान्भवति
tasminsṛgālādibhiḥ spṛṣṭe tatkartā pāpīyānbhavati
- 4
आहिताग्नेर् अग्नीन् आत्मन्य् आरोप्य संन्यासिनो मृतं देहं गायत्र्या स्नापयित्वा पूर्ववद्वाहयित्वा शुद्धे देशे निधाय लौकिकाग्नौ तदग्निम् उपावरोहेत्य् अवरोप्य पवित्रं त इति घृतक्षीरम् आस्ये प्रक्षिप्य पूर्ववत्त्रिदण्डादीन्विन्यस्य ब्रह्ममेधेन पितृमेधेन वाहिताग्निमन्त्रैस्तदग्निभिर्दहनम् आचरति
āhitāgner agnīn ātmany āropya saṃnyāsino mṛtaṃ dehaṃ gāyatryā snāpayitvā pūrvavadvāhayitvā śuddhe deśe nidhāya laukikāgnau tadagnim upāvarohety avaropya pavitraṃ ta iti ghṛtakṣīram āsye prakṣipya pūrvavattridaṇḍādīnvinyasya brahmamedhena pitṛmedhena vāhitāgnimantraistadagnibhirdahanam ācarati
- 5
तयोर् आशौचोदकबलिपिण्डदानैकोद्दिष्टादीन्नैव कुर्यात्
tayor āśaucodakabalipiṇḍadānaikoddiṣṭādīnnaiva kuryāt
- 6
नारायणबलिं करोति
nārāyaṇabaliṃ karoti
- 7
तद्वहनं खनित्वा पिधानं दहनं नारायणबलिं वा यः कुर्यात्सो ऽश्वमेधफलं समाप्नुयात्
tadvahanaṃ khanitvā pidhānaṃ dahanaṃ nārāyaṇabaliṃ vā yaḥ kuryātso 'śvamedhaphalaṃ samāpnuyāt

