12 shlokas
- 1
विप्राच्छूद्रायां पारशवो भद्रकालीपूजनचित्रकर्माङ्गविद्यातूर्यघोषणमर्दनवृत्तिः
viprācchūdrāyāṃ pāraśavo bhadrakālīpūjanacitrakarmāṅgavidyātūryaghoṣaṇamardanavṛttiḥ
- 2
जारोत्पन्नो निषादो व्याडादिमृगहिंसाकारी
jārotpanno niṣādo vyāḍādimṛgahiṃsākārī
- 3
राजन्यतः शूद्रायाम् उग्रः सुदण्ड्यदण्डनकृत्यः
rājanyataḥ śūdrāyām ugraḥ sudaṇḍyadaṇḍanakṛtyaḥ
- 4
जाराच्छूलिकः शूलारोहणादियातनाकृत्यः
jārācchūlikaḥ śūlārohaṇādiyātanākṛtyaḥ
- 5
वैश्यतः शूद्रायां चूचुकः क्रमुकताम्बूलशर्करादिक्रयविक्रयी
vaiśyataḥ śūdrāyāṃ cūcukaḥ kramukatāmbūlaśarkarādikrayavikrayī
- 6
गूढात्कटकारः कटकारी चेति
gūḍhātkaṭakāraḥ kaṭakārī ceti
- 7
ततो ऽनुलोमाद् अनुलोमायां जातश्चानुलोमः पितुर्मातुर्वा जातं वृत्तिं भजेत
tato 'nulomād anulomāyāṃ jātaścānulomaḥ piturmāturvā jātaṃ vṛttiṃ bhajeta
- 8
क्षत्रियाद्विप्रकन्यायां मन्त्रवज्जातः सूतः प्रतिलोमेषु मुख्यो ऽयं मन्त्रहीनोपनीतो द्विजधर्महीनः
kṣatriyādviprakanyāyāṃ mantravajjātaḥ sūtaḥ pratilomeṣu mukhyo 'yaṃ mantrahīnopanīto dvijadharmahīnaḥ
- 9
अस्य वृत्तिर्धर्मानुबोधनं राज्ञो ऽन्नसंस्कारश्च
asya vṛttirdharmānubodhanaṃ rājño 'nnasaṃskāraśca
- 10
जारेण मन्त्रहीनजो रथकारो द्विजत्वविहीनः शूद्रकृत्यो ऽश्वानां पोषणदमनादिपरिचर्याजीवी
jāreṇa mantrahīnajo rathakāro dvijatvavihīnaḥ śūdrakṛtyo 'śvānāṃ poṣaṇadamanādiparicaryājīvī
- 11
वैश्याद्ब्राह्मण्यां मागधः शूद्रैर् अप्य् अभोज्यान्नो ऽस्पृश्यः सर्ववन्दी प्रशंसाकीर्तनगानप्रेषणवृत्तिः
vaiśyādbrāhmaṇyāṃ māgadhaḥ śūdrair apy abhojyānno 'spṛśyaḥ sarvavandī praśaṃsākīrtanagānapreṣaṇavṛttiḥ
- 12
गूढाच्चक्री लवणतैलविक्रेता स्यात्
gūḍhāccakrī lavaṇatailavikretā syāt

