4 shlokas
- 1
चतुष्टय्य आपो भवन्ति
चतुःशफो वा अश्वः प्राजापत्यः समृद्ध्यै
ता दिग्भ्यः समाभृता भवन्ति
दिक्षु वा आपः
अन्नं वा आपः
अद्भ्यो वा अन्नं जायते
यद् एवाद्भ्यो ऽन्नं जायते
तद् अवरुन्धे
तासु ब्रह्मौदनं पचति
रेत एव तद्दधाति
catuṣṭayya āpo bhavanti
catuḥśapho vā aśvaḥ prājāpatyaḥ samṛddhyai
tā digbhyaḥ samābhṛtā bhavanti
dikṣu vā āpaḥ
annaṃ vā āpaḥ
adbhyo vā annaṃ jāyate
yad evādbhyo 'nnaṃ jāyate
tad avarundhe
tāsu brahmaudanaṃ pacati
reta eva taddadhāti
- 2
चतुःशरावो भवति
दिक्ष्व् एव प्रतितिष्ठति
उभयतो रुक्मौ भवतः
उभयत एवास्मिन्रुचं दधाति
उद्धरति शृतत्वाय
सर्पिष्वान्भवति मेध्यत्वाय
चत्वार आर्षेयाः प्राश्नन्ति
दिशाम् एव ज्योतिषि जुहोति
चत्वारि हिरण्यानि ददाति
दिशाम् एव ज्योतींष्य् अवरुन्धे
catuḥśarāvo bhavati
dikṣv eva pratitiṣṭhati
ubhayato rukmau bhavataḥ
ubhayata evāsminrucaṃ dadhāti
uddharati śṛtatvāya
sarpiṣvānbhavati medhyatvāya
catvāra ārṣeyāḥ prāśnanti
diśām eva jyotiṣi juhoti
catvāri hiraṇyāni dadāti
diśām eva jyotīṃṣy avarundhe
- 3
यद् आज्यम् उच्छिष्यते
तस्मिन्रशनां न्युनत्ति
प्रजापतिर्वा ओदनः
रेत आज्यम्
यद् आज्ये रशनां न्युनत्ति
प्रजापतिम् एव रेतसा समर्धयति
दर्भमयी रशना भवति
बहु वा एष कुचरो ऽमेध्यम् उपगच्छति
यद् अश्वः
पवित्रं वै दर्भाः
yad ājyam ucchiṣyate
tasminraśanāṃ nyunatti
prajāpatirvā odanaḥ
reta ājyam
yad ājye raśanāṃ nyunatti
prajāpatim eva retasā samardhayati
darbhamayī raśanā bhavati
bahu vā eṣa kucaro 'medhyam upagacchati
yad aśvaḥ
pavitraṃ vai darbhāḥ
- 4
यद्दर्भमयी रशना भवति
पुनात्य् एवैनम्
पूतम् एनं मेध्यम् आलभते
अश्वस्य वा आलब्धस्य महिमोदक्रामत्
स महर्त्विजः प्राविशत्
तन्महर्त्विजां महर्त्विक्त्वम्
यन्महर्त्विजः प्राश्नन्ति
महिमानम् एवास्मिन्तद्दधति
अश्वस्य वा आलब्धस्य रेत उदक्रामत्
तत्सुवर्णं हिरण्यम् अभवत्
यत्सुवर्णं हिरण्यं ददाति
रेत एव तद्दधाति
ओदने ददाति
रेतो वा ओदनः
रेतो हिरण्यम्
रेतसैवास्मिन्रेतो दधाति
yaddarbhamayī raśanā bhavati
punāty evainam
pūtam enaṃ medhyam ālabhate
aśvasya vā ālabdhasya mahimodakrāmat
sa mahartvijaḥ prāviśat
tanmahartvijāṃ mahartviktvam
yanmahartvijaḥ prāśnanti
mahimānam evāsmintaddadhati
aśvasya vā ālabdhasya reta udakrāmat
tatsuvarṇaṃ hiraṇyam abhavat
yatsuvarṇaṃ hiraṇyaṃ dadāti
reta eva taddadhāti
odane dadāti
reto vā odanaḥ
reto hiraṇyam
retasaivāsminreto dadhāti

