9 shlokas
- 1
यद्देवा देवहेडनं देवासश्चकृमा वयम्
आदित्यास्तस्मान्मा मुञ्चतर्तस्यर्तेन माम् इति
yaddevā devaheḍanaṃ devāsaścakṛmā vayam
ādityāstasmānmā muñcatartasyartena mām iti
- 2
देवा जीवनकाम्या यद्वाचानृतम् ऊदिम
तस्मान्न इह मुञ्चत विश्वे देवाः सजोषसः
devā jīvanakāmyā yadvācānṛtam ūdima
tasmānna iha muñcata viśve devāḥ sajoṣasaḥ
- 3
ऋतेन द्यावापृथिवी ऋतेन त्वं सरस्वति
कृतान्नः पाह्य् एनसो यत्किंचानृतम् ऊदिम
ṛtena dyāvāpṛthivī ṛtena tvaṃ sarasvati
kṛtānnaḥ pāhy enaso yatkiṃcānṛtam ūdima
- 4
इन्द्राग्नी मित्रावरुणौ सोमो धाता बृहस्पतिः
ते नो मुञ्चन्त्व् एनसो यद् अन्यकृतम् आरिम
indrāgnī mitrāvaruṇau somo dhātā bṛhaspatiḥ
te no muñcantv enaso yad anyakṛtam ārima
- 5
सजातशंसाद् उत जामिशंसाज्ज्यायसः शंसाद् उत वा कनीयसः
अनाधृष्टं देवकृतं यद् एनस्तस्मात्त्वम् अस्माञ्जातवेदो मुमुग्धि
sajātaśaṃsād uta jāmiśaṃsājjyāyasaḥ śaṃsād uta vā kanīyasaḥ
anādhṛṣṭaṃ devakṛtaṃ yad enastasmāttvam asmāñjātavedo mumugdhi
- 6
यद्वाचा यन्मनसा बाहुभ्याम् ऊरुभ्याम् अष्ठीवद्भ्यां शिश्नैर्यद् अनृतं चकृमा वयम्
अग्निर्मा तस्माद् एनसो गार्हपत्यः प्रमुञ्चतु चकृम यानि दुष्कृता
yadvācā yanmanasā bāhubhyām ūrubhyām aṣṭhīvadbhyāṃ śiśnairyad anṛtaṃ cakṛmā vayam
agnirmā tasmād enaso gārhapatyaḥ pramuñcatu cakṛma yāni duṣkṛtā
- 7
येन त्रितो अर्णवान्निर्बभूव येन सूर्यं तमसो निर्मुमोच
येनेन्द्रो विश्वा अजहाद् अरातीस्तेनाहं ज्योतिषा ज्योतिर् आनशान आक्षि
yena trito arṇavānnirbabhūva yena sūryaṃ tamaso nirmumoca
yenendro viśvā ajahād arātīstenāhaṃ jyotiṣā jyotir ānaśāna ākṣi
- 8
यत्कुसीदम् अप्रतीतं मयेह येन यमस्य निधिना चरामि
एतत्तदग्ने अनृणो भवामि जीवन्न् एव प्रति तत्ते दधामि
yatkusīdam apratītaṃ mayeha yena yamasya nidhinā carāmi
etattadagne anṛṇo bhavāmi jīvann eva prati tatte dadhāmi
- 9
यन्मयि माता यदा पिपेष यद् अन्तरिक्षं यद् आशसातिक्रमामि त्रिते देवा दिवि जाता यद् आप इमं मे वरुण तत्त्वा यामि त्वं नो अग्ने स त्वं नो अग्ने त्वम् अग्ने अयासि
yanmayi mātā yadā pipeṣa yad antarikṣaṃ yad āśasātikramāmi trite devā divi jātā yad āpa imaṃ me varuṇa tattvā yāmi tvaṃ no agne sa tvaṃ no agne tvam agne ayāsi

