11 shlokas
- 1
तस्या एतस्या अषाढाम्पूर्वां करोति
इयं वा अषाढेयम् उ वा एषां लोकानाम्प्रथमासृज्यत तामेतस्या एव मृदः करोत्येषां ह्येव लोकानाम् इयम्महिषी करोति महिषी हीयं तद्यैव प्रथमा वित्ता सा महिषी
tasyā etasyā aṣāḍhāmpūrvāṃ karoti
iyaṃ vā aṣāḍheyam u vā eṣāṃ lokānāmprathamāsṛjyata tāmetasyā eva mṛdaḥ karotyeṣāṃ hyeva lokānām iyammahiṣī karoti mahiṣī hīyaṃ tadyaiva prathamā vittā sā mahiṣī
- 2
पादमात्री भवति
प्रतिष्ठा वै पाद इयम् उ वै प्रतिष्ठा त्र्यालिखिता भवति त्रिवृद्धीयम्
pādamātrī bhavati
pratiṣṭhā vai pāda iyam u vai pratiṣṭhā tryālikhitā bhavati trivṛddhīyam
- 3
अथोखां करोति
इमांस्तल्लोकान्करोत्यथ विश्वज्योतिषः करोत्येता देवता अग्निं वायुमादित्यमेता ह्येव देवता विश्वं ज्योतिस्ता एतस्या एव मृदः करोत्येभ्यस्तल्लोकेभ्य एतान्देवान्निर्मिमीते यजमानः करोति त्र्यालिखिता भवन्ति त्रिवृतो ह्येते देवा इत्यधिदेवतम्
athokhāṃ karoti
imāṃstallokānkarotyatha viśvajyotiṣaḥ karotyetā devatā agniṃ vāyumādityametā hyeva devatā viśvaṃ jyotistā etasyā eva mṛdaḥ karotyebhyastallokebhya etāndevānnirmimīte yajamānaḥ karoti tryālikhitā bhavanti trivṛto hyete devā ityadhidevatam
- 4
अथाध्यात्मम्
आत्मैवोखा वागषाढा ताम्पूर्वां करोति पुरस्ताद्धीयमात्मनो वाक्तामेतस्या एव मृदः करोत्यात्मनो ह्येवेयं वाङ्महिषी करोति महिषी हि वाक्त्र्यालिखिता भवति त्रेधाविहिता हि वागृचो यजूंषि सामान्य् अथो यदिदं त्रयं वाचो रूपमुपांशु व्यन्तरामुच्चैः
athādhyātmam
ātmaivokhā vāgaṣāḍhā tāmpūrvāṃ karoti purastāddhīyamātmano vāktāmetasyā eva mṛdaḥ karotyātmano hyeveyaṃ vāṅmahiṣī karoti mahiṣī hi vāktryālikhitā bhavati tredhāvihitā hi vāgṛco yajūṃṣi sāmāny atho yadidaṃ trayaṃ vāco rūpamupāṃśu vyantarāmuccaiḥ
- 5
अथोखां करोति
आत्मानं तत्करोत्यथ विश्वज्योतिषः करोति प्रजा वै विश्वज्योतिः प्रजा ह्येव विश्वं ज्योतिः प्रजननमेवैतत्करोति ता एतस्या एव मृदः करोत्यात्मनस्तत्प्रजां निर्मिमीते यजमानः करोति यजमानस्तदात्मनः प्रजां करोत्य् अनन्तर्हिताः करोत्य् अनन्तर्हितां तदात्मनः प्रजां करोत्युत्तराः करोत्युत्तरां तद् आत्मनः प्रजां करोति त्र्यालिखिता भवन्ति त्रिवृद्धि प्रजापतिः पिता माता पुत्रो ऽथो गर्भ उल्बं जरायु
athokhāṃ karoti
ātmānaṃ tatkarotyatha viśvajyotiṣaḥ karoti prajā vai viśvajyotiḥ prajā hyeva viśvaṃ jyotiḥ prajananamevaitatkaroti tā etasyā eva mṛdaḥ karotyātmanastatprajāṃ nirmimīte yajamānaḥ karoti yajamānastadātmanaḥ prajāṃ karoty anantarhitāḥ karoty anantarhitāṃ tadātmanaḥ prajāṃ karotyuttarāḥ karotyuttarāṃ tad ātmanaḥ prajāṃ karoti tryālikhitā bhavanti trivṛddhi prajāpatiḥ pitā mātā putro 'tho garbha ulbaṃ jarāyu
- 6
ता एता यजुष्कृतायै करोति
अयजुष्कृताया इतरा निरुक्ता एता भवन्त्यनिरुक्ता इतराः परिमिता एता भवन्त्यपरिमिता इतराः
tā etā yajuṣkṛtāyai karoti
ayajuṣkṛtāyā itarā niruktā etā bhavantyaniruktā itarāḥ parimitā etā bhavantyaparimitā itarāḥ
- 7
प्रजापतिरेषो ऽग्निः
उभयम्व् एतत्प्रजापतिर्निरुक्तश्चानिरुक्तश्च परिमितश्चापरिमितश्च तद्या यजुष्कृतायै करोति यदेवास्य निरुक्तम्परिमितं रूपं तदस्य तेन संस्करोत्यथ या अयजुष्कृतायै यदेवास्यानिरुक्तम् अपरिमितं रूपं तदस्य तेन संस्करोति स ह वा एतं सर्वं कृत्स्नम्प्रजापतिं संस्करोति य एवं विद्वान् एतद् एवं करोत्यथोपशयायै पिण्डं परिशिनष्टि प्रायश्चित्तिभ्यः
prajāpatireṣo 'gniḥ
ubhayamv etatprajāpatirniruktaścāniruktaśca parimitaścāparimitaśca tadyā yajuṣkṛtāyai karoti yadevāsya niruktamparimitaṃ rūpaṃ tadasya tena saṃskarotyatha yā ayajuṣkṛtāyai yadevāsyāniruktam aparimitaṃ rūpaṃ tadasya tena saṃskaroti sa ha vā etaṃ sarvaṃ kṛtsnamprajāpatiṃ saṃskaroti ya evaṃ vidvān etad evaṃ karotyathopaśayāyai piṇḍaṃ pariśinaṣṭi prāyaścittibhyaḥ
- 8
अथैनां धूपयति
स्थेम्ने न्वेवाथो कर्मणः प्रकृततायै यद्व् एव धूपयति शिर एतद्यज्ञस्य यदुखा प्राणो धूमः शीर्षंस्तत्प्राणं दधाति
athaināṃ dhūpayati
sthemne nvevātho karmaṇaḥ prakṛtatāyai yadv eva dhūpayati śira etadyajñasya yadukhā prāṇo dhūmaḥ śīrṣaṃstatprāṇaṃ dadhāti
- 9
अश्वशकैर्धूपयति
प्राजापत्यो वा अश्वः प्रजापतिरग्निर्नो वा आत्मात्मानं हिनस्त्यहिंसायै तद्वै शक्नैव तद्धि जग्धं यातयाम तथो ह नैवाश्वं हिनस्ति नेतरान्पशून्
aśvaśakairdhūpayati
prājāpatyo vā aśvaḥ prajāpatiragnirno vā ātmātmānaṃ hinastyahiṃsāyai tadvai śaknaiva taddhi jagdhaṃ yātayāma tatho ha naivāśvaṃ hinasti netarānpaśūn
- 10
वसवस्त्वा धूपयन्तु
गायत्रेण छन्दसाङ्गिरस्वद्रुद्रास्त्वा धूपयन्तु त्रैष्टुभेन छन्दसाङ्गिरस्वदादित्यास्त्वा धूपयन्तु जागतेन छन्दसाङ्गिरस्वद्विश्वे त्वा देवा वैश्वानरा धूपयन्त्वानुष्टुभेन छन्दसाङ्गिरस्वदिन्द्रस्त्वा धूपयतु वरुणस्त्वा धूपयतु विष्णुस्त्वा धूपयत्व् इत्येताभिर् एवैनाम् एतद्देवताभिर्धूपयति
vasavastvā dhūpayantu
gāyatreṇa chandasāṅgirasvadrudrāstvā dhūpayantu traiṣṭubhena chandasāṅgirasvadādityāstvā dhūpayantu jāgatena chandasāṅgirasvadviśve tvā devā vaiśvānarā dhūpayantvānuṣṭubhena chandasāṅgirasvadindrastvā dhūpayatu varuṇastvā dhūpayatu viṣṇustvā dhūpayatv ityetābhir evainām etaddevatābhirdhūpayati
- 11
सप्ताश्वशकानि भवन्ति
सप्त यजूंषि सप्ततय्य एता देवताः सप्त शीर्षन्प्राणा यद् उ वा अपि बहुकृत्वः सप्त सप्त सप्तैव तच्छीर्षण्येव तत्सप्त प्राणान्दधाति
saptāśvaśakāni bhavanti
sapta yajūṃṣi saptatayya etā devatāḥ sapta śīrṣanprāṇā yad u vā api bahukṛtvaḥ sapta sapta saptaiva tacchīrṣaṇyeva tatsapta prāṇāndadhāti

