12 shlokas
- 1
पर्णकषायनिष्पक्वा एता आपो भवन्ति
स्थेम्ने न्वेव यद्व् एव पर्णकषायेण सोमो वै पर्णश्चन्द्रमा उ वै सोम एतद् उ वा एकमग्निरूपम् एतस्यैवाग्निरूपस्योपाप्त्यै
parṇakaṣāyaniṣpakvā etā āpo bhavanti
sthemne nveva yadv eva parṇakaṣāyeṇa somo vai parṇaścandramā u vai soma etad u vā ekamagnirūpam etasyaivāgnirūpasyopāptyai
- 2
ता उपसृजति
आपो हि ष्ठा मयोभुव इति यां वै देवतामृगभ्यनूक्ता यां यजुः सैव देवता सर्क्सो देवता तद्यजुस्ता हैता आप एवैष तृचस्तद्या अमूर् आप एकं रूपं समदृश्यन्त ता एतास्तदेवैतद्रूपं करोति
tā upasṛjati
āpo hi ṣṭhā mayobhuva iti yāṃ vai devatāmṛgabhyanūktā yāṃ yajuḥ saiva devatā sarkso devatā tadyajustā haitā āpa evaiṣa tṛcastadyā amūr āpa ekaṃ rūpaṃ samadṛśyanta tā etāstadevaitadrūpaṃ karoti
- 3
अथ फेनं जनयित्वान्ववदधाति
यदेव तत्फेनो द्वितीयं रूपमसृज्यत तदेवैतद्रूपं करोत्य् अथ यामेव तत्र मृदं संयौति सैव मृद्यत्तत्तृतीयं रूपमसृज्यतैतेभ्यो वा एष रूपेभ्यो ऽग्रे ऽसृज्यत तेभ्य एवैनमेतज्जनयति
atha phenaṃ janayitvānvavadadhāti
yadeva tatpheno dvitīyaṃ rūpamasṛjyata tadevaitadrūpaṃ karoty atha yāmeva tatra mṛdaṃ saṃyauti saiva mṛdyattattṛtīyaṃ rūpamasṛjyataitebhyo vā eṣa rūpebhyo 'gre 'sṛjyata tebhya evainametajjanayati
- 4
अथाजलोमैः संसृजति
स्थेम्ने न्वेव यद्व् एवाजलोमैर् एतद्वा एनं देवाः पशुभ्यो ऽधि समभरंस्तथैवैनम् अयमेतत्पशुभ्यो ऽधि संभरति तद्यद् अजलोमैर् एवाजे हि सर्वेषाम्पशूनां रूपम् अथ यल्लोम लोम हि रूपम्
athājalomaiḥ saṃsṛjati
sthemne nveva yadv evājalomair etadvā enaṃ devāḥ paśubhyo 'dhi samabharaṃstathaivainam ayametatpaśubhyo 'dhi saṃbharati tadyad ajalomair evāje hi sarveṣāmpaśūnāṃ rūpam atha yalloma loma hi rūpam
- 5
मित्रः संसृज्य
पृथिवीम्भूमिं च ज्योतिषा सहेति प्राणो वै मित्रः प्राणो वा एतदग्रे कर्माकरोत्सुजातं जातवेदसम् अयक्ष्माय त्वा संसृजामि प्रजाभ्य इति यथैव यजुस्तथा बन्धुः
mitraḥ saṃsṛjya
pṛthivīmbhūmiṃ ca jyotiṣā saheti prāṇo vai mitraḥ prāṇo vā etadagre karmākarotsujātaṃ jātavedasam ayakṣmāya tvā saṃsṛjāmi prajābhya iti yathaiva yajustathā bandhuḥ
- 6
अथैतत्त्रयम्पिष्टम्भवति
शर्कराश्मायोरसस्तेन संसृजति स्थेम्ने न्वेव यद्व् एव तेनैतावती वा इयम् अग्रे ऽसृज्यत तद्यावतीयमग्रे ऽसृज्यत तावतीमेवैनामेतत्करोति
athaitattrayampiṣṭambhavati
śarkarāśmāyorasastena saṃsṛjati sthemne nveva yadv eva tenaitāvatī vā iyam agre 'sṛjyata tadyāvatīyamagre 'sṛjyata tāvatīmevaināmetatkaroti
- 7
रुद्राः संसृज्य
पृथिवीम्बृहज्ज्योतिः समीधिर इत्यसौ वा आदित्य एषो ऽग्निर् एतद्वै तद्रुद्राः संसृज्य पृथिवीम्बृहज्ज्योतिः समीधिरे तेषाम्भानुरजस्र इच्छुक्रो देवेषु रोचत इत्य् एष वा एषाम्भानुरजस्रः शुक्रो देवेषु रोचते
rudrāḥ saṃsṛjya
pṛthivīmbṛhajjyotiḥ samīdhira ityasau vā āditya eṣo 'gnir etadvai tadrudrāḥ saṃsṛjya pṛthivīmbṛhajjyotiḥ samīdhire teṣāmbhānurajasra icchukro deveṣu rocata ity eṣa vā eṣāmbhānurajasraḥ śukro deveṣu rocate
- 8
द्वाभ्यां संसृजति
द्विपाद्यजमानो यजमानो ऽग्निर्यावानग्निर्यावत्यस्य मात्रा तावतैवैनमेतत्संसृजति
dvābhyāṃ saṃsṛjati
dvipādyajamāno yajamāno 'gniryāvānagniryāvatyasya mātrā tāvataivainametatsaṃsṛjati
- 9
अथ प्रयौति
संसृष्टां वसुभी रुद्रैरिति संसृष्टा ह्येषा वसुभिश्च भवति यन्मित्रेण तद्वसुभिर्यद्रुद्रैस्तद्रुद्रैर्धीरैः कर्मण्याम्मृदमिति धीरा हि ते कर्मण्यो इयम्मृद्धस्ताभ्याम्मृद्वीं कृत्वा सिनीवाली कृणोतु तामिति वाग्वै सिनीवाली सैनां हस्ताभ्याम्मृद्वीं कृत्वा करोत्वित्येतत्
atha prayauti
saṃsṛṣṭāṃ vasubhī rudrairiti saṃsṛṣṭā hyeṣā vasubhiśca bhavati yanmitreṇa tadvasubhiryadrudraistadrudrairdhīraiḥ karmaṇyāmmṛdamiti dhīrā hi te karmaṇyo iyammṛddhastābhyāmmṛdvīṃ kṛtvā sinīvālī kṛṇotu tāmiti vāgvai sinīvālī saināṃ hastābhyāmmṛdvīṃ kṛtvā karotvityetat
- 10
सिनीवाली सुकपर्दा सुकुरीरा स्वौपशेति
योषा वै सिनीवाल्य् एतद् उ वै योषायै समृद्धं रूपं यत्सुकपर्दा सुकुरीरा स्वौपशा समर्धयत्येवैनामेतत्सा तुभ्यमदिते मह्योखां दधातु हस्तयोरितीयं वा अदितिर्मह्यस्यै तद् आह
sinīvālī sukapardā sukurīrā svaupaśeti
yoṣā vai sinīvāly etad u vai yoṣāyai samṛddhaṃ rūpaṃ yatsukapardā sukurīrā svaupaśā samardhayatyevaināmetatsā tubhyamadite mahyokhāṃ dadhātu hastayoritīyaṃ vā aditirmahyasyai tad āha
- 11
उखां कृणोतु
शक्त्या बाहुभ्यामदितिर्धियेति शक्त्या च हि करोति बाहुभ्यां च धिया च माता पुत्रं यथोपस्थे साग्निम्बिभर्तु गर्भ एति यथा माता पुत्रमुपस्थे बिभृयादेवमग्निं गर्भे बिभर्त्वित्येतत्
ukhāṃ kṛṇotu
śaktyā bāhubhyāmaditirdhiyeti śaktyā ca hi karoti bāhubhyāṃ ca dhiyā ca mātā putraṃ yathopasthe sāgnimbibhartu garbha eti yathā mātā putramupasthe bibhṛyādevamagniṃ garbhe bibhartvityetat
- 12
त्रिभिः प्रयौति
त्रिवृद् अग्निर्यावानग्निर्यावत्यस्य मात्रा तावतैवैनम् एतत्प्रयौति द्वाभ्यां संसृजति तत्पञ्च पञ्चचितिको ऽग्निः पञ्चर्तवः संवत्सरः संवत्सरो ऽग्निर्यावानग्निर्यावत्यस्य मात्रा तावत्तद्भवति त्रिभिर् अप उपसृजति तदष्टावष्टाक्षरा गायत्री गायत्रो ऽग्निर्यावानग्निर्यावत्यस्य मात्रा तावत्तद्भवत्य् अथो ऽष्टाक्षरा वा इयम् अग्रे ऽसृज्यत तद्यावतीयम् अग्रे ऽसृज्यत तावतीम् एवैनाम् एतत्करोति
tribhiḥ prayauti
trivṛd agniryāvānagniryāvatyasya mātrā tāvataivainam etatprayauti dvābhyāṃ saṃsṛjati tatpañca pañcacitiko 'gniḥ pañcartavaḥ saṃvatsaraḥ saṃvatsaro 'gniryāvānagniryāvatyasya mātrā tāvattadbhavati tribhir apa upasṛjati tadaṣṭāvaṣṭākṣarā gāyatrī gāyatro 'gniryāvānagniryāvatyasya mātrā tāvattadbhavaty atho 'ṣṭākṣarā vā iyam agre 'sṛjyata tadyāvatīyam agre 'sṛjyata tāvatīm evainām etatkaroti

