44 shlokas
- 1
एतद्वै देवा अब्रुवन्
चेतयध्वम् इति चितिमिच्छतेति वाव तदब्रुवंस्तेषां चेतयमानानां सवितैतानि सावित्राण्यपश्यद्यत्सवितापश्यत्तस्मात्सावित्राणि स एताम् अष्टागृहीताम् आहुतिम् अजुहोत्तां हुत्वेमाम् अष्टधाविहिताम् अषाढाम् अपश्यत्पुरैव सृष्टां सतीम्
etadvai devā abruvan
cetayadhvam iti citimicchateti vāva tadabruvaṃsteṣāṃ cetayamānānāṃ savitaitāni sāvitrāṇyapaśyadyatsavitāpaśyattasmātsāvitrāṇi sa etām aṣṭāgṛhītām āhutim ajuhottāṃ hutvemām aṣṭadhāvihitām aṣāḍhām apaśyatpuraiva sṛṣṭāṃ satīm
- 2
ते यदब्रुवन्चेतयध्वमिति चितिमिच्छतेति वाव तदब्रुवन्यच्चेतयमाना अपश्यंस्तस्माच्चितिर् आहुतिर्वै यज्ञो यदिष्ट्वापश्यत्तस्मादिष्टका
te yadabruvancetayadhvamiti citimicchateti vāva tadabruvanyaccetayamānā apaśyaṃstasmāccitir āhutirvai yajño yadiṣṭvāpaśyattasmādiṣṭakā
- 3
तां वा एताम्
एकां सतीम् अष्टागृहीताम् अष्टाभिर्यजुर्भिर्जुहोति तस्माद् इयमेका सत्यष्टधाविहिता
tāṃ vā etām
ekāṃ satīm aṣṭāgṛhītām aṣṭābhiryajurbhirjuhoti tasmād iyamekā satyaṣṭadhāvihitā
- 4
तामूर्ध्वामुद्गृह्णन्जुहोति
इमां तदूर्ध्वां रूपैरुद्गृह्णाति तस्मादियमूर्ध्वा रूपैः
tāmūrdhvāmudgṛhṇanjuhoti
imāṃ tadūrdhvāṃ rūpairudgṛhṇāti tasmādiyamūrdhvā rūpaiḥ
- 5
तां संततां जुहोति
एतद्वै देवा अबिभयुर्यद्वै न इह रक्षांसि नाष्ट्रा नान्ववेयुरिति त एतं संततहोमम् अपश्यन्रक्षसां नाष्ट्राणाम् अनन्ववायनाय तस्मात्संततां जुहोति
tāṃ saṃtatāṃ juhoti
etadvai devā abibhayuryadvai na iha rakṣāṃsi nāṣṭrā nānvaveyuriti ta etaṃ saṃtatahomam apaśyanrakṣasāṃ nāṣṭrāṇām ananvavāyanāya tasmātsaṃtatāṃ juhoti
- 6
यद्व् एवैताम् आहुतिं जुहोति
सवितैषो ऽग्निस्तमेतयाहुत्या पुरस्तात्प्रीणाति तमिष्ट्वा प्रीत्वाथैनं संभरति तद्यदेतया सवितारम्प्रीणाति तस्मात्सावित्राणि तस्माद्वा एतामाहुतिं जुहोति
yadv evaitām āhutiṃ juhoti
savitaiṣo 'gnistametayāhutyā purastātprīṇāti tamiṣṭvā prītvāthainaṃ saṃbharati tadyadetayā savitāramprīṇāti tasmātsāvitrāṇi tasmādvā etāmāhutiṃ juhoti
- 7
यद्व् एवैतामाहुतिं जुहोति
सवितैषो ऽग्निस्तम् एतयाहुत्या पुरस्ताद्रेतो भूतं सिञ्चति यादृग्वै योनौ रेतः सिच्यते तादृग्जायते तद्यद् एतया सवितारं रेतो भूतं सिञ्चति तस्मात्सावित्राणि तस्माद्वा एतामाहुतिं जुहोति
yadv evaitāmāhutiṃ juhoti
savitaiṣo 'gnistam etayāhutyā purastādreto bhūtaṃ siñcati yādṛgvai yonau retaḥ sicyate tādṛgjāyate tadyad etayā savitāraṃ reto bhūtaṃ siñcati tasmātsāvitrāṇi tasmādvā etāmāhutiṃ juhoti
- 8
स्रुवश्चात्र स्रुक्च प्रयुज्येते
वाग्वै स्रुक्प्राणः स्रुवो वाचा च वै प्राणेन चैतद् अग्रे देवाः कर्मान्वैच्छंस्तस्मात्स्रुवश्च स्रुक्च
sruvaścātra srukca prayujyete
vāgvai srukprāṇaḥ sruvo vācā ca vai prāṇena caitad agre devāḥ karmānvaicchaṃstasmātsruvaśca srukca
- 9
यद्व् एव स्रुवश्च स्रुक्च
यो वै स प्रजापतिर् आसीद् एष स स्रुवः प्राणो वै स्रुवः प्राणः प्रजापतिर् अथ या सा वागासीदेषा सा स्रुग्योषा वै वाग्योषा स्रुग् अथ यास्ता आप आयन्वाचो लोकाद् एतास्ता याम् एताम् आहुतिं जुहोति
yadv eva sruvaśca srukca
yo vai sa prajāpatir āsīd eṣa sa sruvaḥ prāṇo vai sruvaḥ prāṇaḥ prajāpatir atha yā sā vāgāsīdeṣā sā srugyoṣā vai vāgyoṣā srug atha yāstā āpa āyanvāco lokād etāstā yām etām āhutiṃ juhoti
- 10
तां संततां जुहोति
संतता हि ता आप आयन्न् अथ यः स प्रजापतिस्त्रय्या विद्यया सहापः प्राविशद् एष स यैर् एतद्यजुर्भिर्जुहोति
tāṃ saṃtatāṃ juhoti
saṃtatā hi tā āpa āyann atha yaḥ sa prajāpatistrayyā vidyayā sahāpaḥ prāviśad eṣa sa yair etadyajurbhirjuhoti
- 11
तद्यानि त्रीणि प्रथमानि
इमे ते लोका अथ यच्चतुर्थं यजुस्त्रयी सा विद्या जगती सा भवति जगती सर्वाणि छन्दांसि सर्वाणि छन्दांसि त्रयी विद्याथ यानि चत्वार्युत्तमानि दिशस्तानीमे च वै लोका दिशश्च प्रजापतिर् अथैषा त्रयी विद्या
tadyāni trīṇi prathamāni
ime te lokā atha yaccaturthaṃ yajustrayī sā vidyā jagatī sā bhavati jagatī sarvāṇi chandāṃsi sarvāṇi chandāṃsi trayī vidyātha yāni catvāryuttamāni diśastānīme ca vai lokā diśaśca prajāpatir athaiṣā trayī vidyā
- 12
स जुहोति
युञ्जानः प्रथमम्मन इति प्रजापतिर्वै युञ्जानः स मन एतस्मै कर्मणे ऽयुङ्क्त तद्यन्मन एतस्मै कर्मणे ऽयुङ्क्त तस्मात्प्रजापतिर्युञ्जानः
sa juhoti
yuñjānaḥ prathamammana iti prajāpatirvai yuñjānaḥ sa mana etasmai karmaṇe 'yuṅkta tadyanmana etasmai karmaṇe 'yuṅkta tasmātprajāpatiryuñjānaḥ
- 13
तत्वाय सविता धिय इति
मनो वै सविता प्राणा धियो ऽग्नेर्ज्योतिर्निचाय्येत्य् अग्नेर्ज्योतिर्दृष्ट्वेत्य् एतत्पृथिव्या अध्याभरद् इति पृथिव्यै ह्येनद् अध्याभरति
tatvāya savitā dhiya iti
mano vai savitā prāṇā dhiyo 'gnerjyotirnicāyyety agnerjyotirdṛṣṭvety etatpṛthivyā adhyābharad iti pṛthivyai hyenad adhyābharati
- 14
युक्तेन मनसा वयमिति
मन एवैतदेतस्मै कर्मणे युङ्क्ते न ह्ययुक्तेन मनसा किंचन सम्प्रति शक्नोति कर्तुं देवस्य सवितुः सव इति देवेन सवित्रा प्रसूता इत्य् एतत्स्वर्ग्याय शक्त्येति यथैतेन कर्मणा स्वर्गं लोकमियाद् एवमेतदाह शक्त्येति शक्त्या हि स्वर्गं लोकमेति
yuktena manasā vayamiti
mana evaitadetasmai karmaṇe yuṅkte na hyayuktena manasā kiṃcana samprati śaknoti kartuṃ devasya savituḥ sava iti devena savitrā prasūtā ity etatsvargyāya śaktyeti yathaitena karmaṇā svargaṃ lokamiyād evametadāha śaktyeti śaktyā hi svargaṃ lokameti
- 15
युक्त्वाय सविता देवानिति
मनो वै सविता प्राणा देवाः स्वर्यतो धिया दिवमिति स्वर्गं हैनां लोकं यतो धियैतस्मै कर्मणे युयुजे बृहज्ज्योतिः करिष्यत इत्य् असौ वा आदित्यो बृहज्ज्योतिर् एष उ एषो ऽग्निर् एतम्व् एते संस्करिष्यन्तो भवन्ति सविता प्रसुवाति तानिति सवितृप्रसूता एतत्कर्म करवन्न् इत्येतत्
yuktvāya savitā devāniti
mano vai savitā prāṇā devāḥ svaryato dhiyā divamiti svargaṃ haināṃ lokaṃ yato dhiyaitasmai karmaṇe yuyuje bṛhajjyotiḥ kariṣyata ity asau vā ādityo bṛhajjyotir eṣa u eṣo 'gnir etamv ete saṃskariṣyanto bhavanti savitā prasuvāti tāniti savitṛprasūtā etatkarma karavann ityetat
- 16
युञ्जते मन उत युञ्जते धिय इति
मनश्चैवैतत्प्राणांश्चैतस्मै कर्मणे युङ्क्ते विप्रा विप्रस्येति प्रजापतिर्वै विप्रो देवा विप्रा बृहतो विपश्चित इति प्रजापतिर्वै बृहन्विपश्चिद्वि होत्रा दध इति यद्वा एष चीयते तद् एष होत्रा विधत्ते चिते ह्येतस्मिन्होत्रा अधिविधीयन्ते वयुनाविद् इत्य् एष हीदं वयुनम् अविन्दद् एक इद् इत्य् एको ह्य् एष इदं सर्वं वयुनम् अविन्दन्मही देवस्य सवितुः परिष्टुतिर् इति महती देवस्य सवितुः परिष्टुतिर् इत्येतत्
yuñjate mana uta yuñjate dhiya iti
manaścaivaitatprāṇāṃścaitasmai karmaṇe yuṅkte viprā viprasyeti prajāpatirvai vipro devā viprā bṛhato vipaścita iti prajāpatirvai bṛhanvipaścidvi hotrā dadha iti yadvā eṣa cīyate tad eṣa hotrā vidhatte cite hyetasminhotrā adhividhīyante vayunāvid ity eṣa hīdaṃ vayunam avindad eka id ity eko hy eṣa idaṃ sarvaṃ vayunam avindanmahī devasya savituḥ pariṣṭutir iti mahatī devasya savituḥ pariṣṭutir ityetat
- 17
युजे वाम्ब्रह्म पूर्व्यं नमोभिर् इति
प्राणो वै ब्रह्म पूर्व्यम् अन्नं नमस्तत्तद् एषैवाहुतिर् अन्नम् एतयैव तद् आहुत्यैतेनान्नेन प्राणान् एतस्मै कर्मणे युङ्क्ते वि श्लोक एतु पथ्येव सूरेरिति यथोभयेषु देवमनुष्येषु कीर्तिश्लोको यजमानस्य स्याद् एवम् एतद् आह शृण्वन्तु विश्वे अमृतस्य पुत्रा इति प्रजापतिर्वा अमृतस्तस्य विश्वे देवाः पुत्रा आ ये धामानि दिव्यानि तस्थुर् इतीमे वै लोका दिव्यानि धामानि तद्य एषु लोकेषु देवास्तान् एतद् आह
yuje vāmbrahma pūrvyaṃ namobhir iti
prāṇo vai brahma pūrvyam annaṃ namastattad eṣaivāhutir annam etayaiva tad āhutyaitenānnena prāṇān etasmai karmaṇe yuṅkte vi śloka etu pathyeva sūreriti yathobhayeṣu devamanuṣyeṣu kīrtiśloko yajamānasya syād evam etad āha śṛṇvantu viśve amṛtasya putrā iti prajāpatirvā amṛtastasya viśve devāḥ putrā ā ye dhāmāni divyāni tasthur itīme vai lokā divyāni dhāmāni tadya eṣu lokeṣu devāstān etad āha
- 18
यस्य प्रयाणमन्वन्य इद्ययुरिति
प्रजापतिर्वा एतदग्रे कर्माकरोत्तत्ततो देवा अकुर्वन्देवा देवस्य महिमानमोजसेति यज्ञो वै महिमा देवा देवस्य यज्ञं वीर्यम् ओजसेत्य् एतद्यः पार्थिवानि विममे स एतश इति यद्वै किंचास्यां तत्पार्थिवं तद् एष सर्वं विमिमीते रश्मिभिर्ह्येनद् अभ्यवतनोति रजांसि देवः सविता महित्वनेतीमे वै लोका रजांस्य् असावादित्यो देवः सविता तान् एष महिम्ना विमिमीते
yasya prayāṇamanvanya idyayuriti
prajāpatirvā etadagre karmākarottattato devā akurvandevā devasya mahimānamojaseti yajño vai mahimā devā devasya yajñaṃ vīryam ojasety etadyaḥ pārthivāni vimame sa etaśa iti yadvai kiṃcāsyāṃ tatpārthivaṃ tad eṣa sarvaṃ vimimīte raśmibhirhyenad abhyavatanoti rajāṃsi devaḥ savitā mahitvanetīme vai lokā rajāṃsy asāvādityo devaḥ savitā tān eṣa mahimnā vimimīte
- 19
देव सवितः प्रसुव यज्ञम्प्रसुव यज्ञपतिम्भगायेति
असौ वा आदित्यो देवः सविता यज्ञो भगस्तम् एतद् आह प्रसुव यज्ञम्प्रसुव यज्ञपतिम्भगायेति दिव्यो गन्धर्वः केतपूः केतं नः पुनात्वित्य् असौ वा आदित्यो दिव्यो गन्धर्वो ऽन्नं केतो ऽन्नपूरन्नं नः पुनात्व् इत्य् एतद्वाचस्पतिर्वाचं नः स्वदत्व् इति वाग्वा इदं कर्म प्राणो वाचस्पतिः प्राणो न इदं कर्म स्वदत्व् इत्येतत्
deva savitaḥ prasuva yajñamprasuva yajñapatimbhagāyeti
asau vā ādityo devaḥ savitā yajño bhagastam etad āha prasuva yajñamprasuva yajñapatimbhagāyeti divyo gandharvaḥ ketapūḥ ketaṃ naḥ punātvity asau vā ādityo divyo gandharvo 'nnaṃ keto 'nnapūrannaṃ naḥ punātv ity etadvācaspatirvācaṃ naḥ svadatv iti vāgvā idaṃ karma prāṇo vācaspatiḥ prāṇo na idaṃ karma svadatv ityetat
- 20
इमं नो देव सवितर्यज्ञम्प्रणयेति
असौ वा आदित्यो देवः सविता यद् उ वा एष यज्ञियं कर्म प्रणयति तद् अनार्तं स्वस्त्युदृचम् अश्नुते देवाव्यमिति यो देवान् अवद् इत्य् एतत्सखिविदं सत्राजितं धनजितं स्वर्जितम् इति य एतत्सर्वं विन्दाद् इत्य् एतदृचेत्यृचा स्तोमं समर्धय गायत्रेण रथन्तरम्बृहद्गायत्रवर्तनीति सामानि स्वाहेति यजूंषि सैषा त्रयी विद्या प्रथमं जायते यथैवादो ऽमुत्राजायतैवम् अथ यः सो ऽग्निर् असृज्यतैष स यो ऽत ऊर्ध्वम् अग्निश्चीयते
imaṃ no deva savitaryajñampraṇayeti
asau vā ādityo devaḥ savitā yad u vā eṣa yajñiyaṃ karma praṇayati tad anārtaṃ svastyudṛcam aśnute devāvyamiti yo devān avad ity etatsakhividaṃ satrājitaṃ dhanajitaṃ svarjitam iti ya etatsarvaṃ vindād ity etadṛcetyṛcā stomaṃ samardhaya gāyatreṇa rathantarambṛhadgāyatravartanīti sāmāni svāheti yajūṃṣi saiṣā trayī vidyā prathamaṃ jāyate yathaivādo 'mutrājāyataivam atha yaḥ so 'gnir asṛjyataiṣa sa yo 'ta ūrdhvam agniścīyate
- 21
तान्येतान्यष्टौ सावित्राणि
अष्टाक्षरा गायत्री गायत्रो ऽग्निर्यावान् अग्निर्यावत्यस्य मात्रा तावतैवैनम् एतद्रेतो भूतं सिञ्चति तानि नव भवन्ति स्वाहाकारो नवमो नव दिशो दिशो ऽग्निर्नव प्राणाः प्राणा अग्निर्यावान् अग्निर्यावत्यस्य मात्रा तावतैवैनम् एतद्रेतो भूतं सिञ्चति तानि दश भवन्त्य् आहुतिर्दशमी दशाक्षरा विराड्विराड् अग्निर्दश दिशो दिशो ऽग्निर्दश प्राणाः प्राणा अग्निर्यावान् अग्निर्यावत्यस्य मात्रा तावत्तद्भवति
tānyetānyaṣṭau sāvitrāṇi
aṣṭākṣarā gāyatrī gāyatro 'gniryāvān agniryāvatyasya mātrā tāvataivainam etadreto bhūtaṃ siñcati tāni nava bhavanti svāhākāro navamo nava diśo diśo 'gnirnava prāṇāḥ prāṇā agniryāvān agniryāvatyasya mātrā tāvataivainam etadreto bhūtaṃ siñcati tāni daśa bhavanty āhutirdaśamī daśākṣarā virāḍvirāḍ agnirdaśa diśo diśo 'gnirdaśa prāṇāḥ prāṇā agniryāvān agniryāvatyasya mātrā tāvattadbhavati
- 22
एतस्यामाहुत्यां हुतायाम्
अग्निर्देवेभ्य उदक्रामत्ते देवा अब्रुवन्पशुर्वा अग्निः पशुभिर् इममन्विच्छाम स स्वाय रूपायाविर्भविष्यतीति तम्पशुभिर् अन्वैच्छन्त्स स्वाय रूपायाविरभवत्तस्माद् उ हैतत्पशुः स्वाय रूपायाविर्भवति गौर्वा गवे ऽश्वो वाश्वाय पुरुषो वा पुरुषाय
etasyāmāhutyāṃ hutāyām
agnirdevebhya udakrāmatte devā abruvanpaśurvā agniḥ paśubhir imamanvicchāma sa svāya rūpāyāvirbhaviṣyatīti tampaśubhir anvaicchantsa svāya rūpāyāvirabhavattasmād u haitatpaśuḥ svāya rūpāyāvirbhavati gaurvā gave 'śvo vāśvāya puruṣo vā puruṣāya
- 23
ते ऽब्रुवन्
यद्यह सर्वैर् अन्वेषिष्यामो यातयामा अनुपजीवनीया भविष्यन्ति यद्य् उ असर्वैर् असर्वम् अनुवेत्स्याम इति त एतमेकम्पशुं द्वाभ्याम्पशुभ्याम्प्रत्यपश्यन्रासभं गोश्चावेश्च तद्यदेतमेकम्पशुं द्वाभ्याम्पशुभ्याम्प्रत्यपश्यंस्तस्माद् एष एकः सन्द्विरेताः
te 'bruvan
yadyaha sarvair anveṣiṣyāmo yātayāmā anupajīvanīyā bhaviṣyanti yady u asarvair asarvam anuvetsyāma iti ta etamekampaśuṃ dvābhyāmpaśubhyāmpratyapaśyanrāsabhaṃ goścāveśca tadyadetamekampaśuṃ dvābhyāmpaśubhyāmpratyapaśyaṃstasmād eṣa ekaḥ sandviretāḥ
- 24
अनद्धापुरुषम्पुरुषात्
एष ह वा अनद्धापुरुषो यो न देवानवति न पितॄन्न मनुष्यांस्तत्सर्वैरह पशुभिर् अन्वैच्छन्नो यातयामा अनुपजीवनीया अभवन्
anaddhāpuruṣampuruṣāt
eṣa ha vā anaddhāpuruṣo yo na devānavati na pitṝnna manuṣyāṃstatsarvairaha paśubhir anvaicchanno yātayāmā anupajīvanīyā abhavan
- 25
त्रिभिरन्विच्छति
त्रिवृद् अग्निर्यावान् अग्निर्यावत्यस्य मात्रा तावतैवैनमेतदन्विच्छति पञ्च संपदा भवन्ति पञ्चचितिको ऽग्निः पञ्चर्तवः संवत्सरः संवत्सरो ऽग्निर्यावान् अग्निर्यावत्यस्य मात्रा तावत्तद्भवति
tribhiranvicchati
trivṛd agniryāvān agniryāvatyasya mātrā tāvataivainametadanvicchati pañca saṃpadā bhavanti pañcacitiko 'gniḥ pañcartavaḥ saṃvatsaraḥ saṃvatsaro 'gniryāvān agniryāvatyasya mātrā tāvattadbhavati
- 26
ते मौञ्जीभिर् अभिधानीभिर् अभिहिता भवन्ति
अग्निर्देवेभ्य उदक्रामत्स मुञ्जम्प्राविशत्तस्मात्स सुषिरस्तस्माद्व् एवान्तरतो धूमरक्त इव सैषा योनिर् अग्नेर्यन्मुञ्जो ऽग्निर् इमे पशवो न वै योनिर्गर्भं हिनस्त्यहिंसायै योनिर्वै जायमानो जायते योनेर्जायमानो जायाता इति
te mauñjībhir abhidhānībhir abhihitā bhavanti
agnirdevebhya udakrāmatsa muñjamprāviśattasmātsa suṣirastasmādv evāntarato dhūmarakta iva saiṣā yonir agneryanmuñjo 'gnir ime paśavo na vai yonirgarbhaṃ hinastyahiṃsāyai yonirvai jāyamāno jāyate yonerjāyamāno jāyātā iti
- 27
त्रिवृतो भवन्ति
त्रिवृद्ध्यग्निर् अश्वाभिधानीकृता भवन्ति सर्वतो वा अश्वाभिधानी मुखम्परिशेते सर्वतो योनिर्गर्भम्परिशेते योनिरूपमेतत्क्रियते
trivṛto bhavanti
trivṛddhyagnir aśvābhidhānīkṛtā bhavanti sarvato vā aśvābhidhānī mukhampariśete sarvato yonirgarbhampariśete yonirūpametatkriyate
- 28
ते प्राञ्चस्तिष्ठन्ति
अश्वः प्रथमो ऽथ रासभो ऽथाज एवं ह्येते ऽनुपूर्वं यद्वै तदश्रु संक्षरितम् आसीद् एष सो ऽश्वो ऽथ यत्तदरसदिवैष रासभो ऽथ यः स कपाले रसो लिप्त आसीदेष सो ऽजो ऽथ यत्तत्कपालमासीद् एषा सा मृद्याम् एतद् आहरिष्यन्तो भवन्त्य् एतेभ्यो वा एष रूपेभ्यो ऽग्रे ऽसृज्यत तेभ्य एवैनम् एतज्जनयति
te prāñcastiṣṭhanti
aśvaḥ prathamo 'tha rāsabho 'thāja evaṃ hyete 'nupūrvaṃ yadvai tadaśru saṃkṣaritam āsīd eṣa so 'śvo 'tha yattadarasadivaiṣa rāsabho 'tha yaḥ sa kapāle raso lipta āsīdeṣa so 'jo 'tha yattatkapālamāsīd eṣā sā mṛdyām etad āhariṣyanto bhavanty etebhyo vā eṣa rūpebhyo 'gre 'sṛjyata tebhya evainam etajjanayati
- 29
ते दक्षिणतस्तिष्ठन्ति
एतद्वै देवा अबिभयुर्यद्वै नो यज्ञं दक्षिणतो रक्षांसि नाष्ट्रा न हन्युरिति त एतं वज्रम् अपश्यन्न् अमुम् एवादित्यम् असौ वा आदित्य एषो ऽश्वस्त एतेन वज्रेण दक्षिणतो रक्षांसि नाष्ट्रा अपहत्याभये ऽनाष्ट्र एतं यज्ञम् अतन्वत तथैवैतद्यजमान एतेन वज्रेण दक्षिणतो रक्षांसि नाष्ट्रा अपहत्याभये ऽनाष्ट्र एतं यज्ञं तनुते
te dakṣiṇatastiṣṭhanti
etadvai devā abibhayuryadvai no yajñaṃ dakṣiṇato rakṣāṃsi nāṣṭrā na hanyuriti ta etaṃ vajram apaśyann amum evādityam asau vā āditya eṣo 'śvasta etena vajreṇa dakṣiṇato rakṣāṃsi nāṣṭrā apahatyābhaye 'nāṣṭra etaṃ yajñam atanvata tathaivaitadyajamāna etena vajreṇa dakṣiṇato rakṣāṃsi nāṣṭrā apahatyābhaye 'nāṣṭra etaṃ yajñaṃ tanute
- 30
दक्षिणत आहवनीयो भवति
उत्तरत एषाभ्रिर् उपशेते वृषा वा आहवनीयो योषाभ्रिर्दक्षिणतो वै वृषा योषाम् उपशेते ऽरत्निमात्रे ऽरत्निमात्राद्धि वृषा योषाम् उपशेते
dakṣiṇata āhavanīyo bhavati
uttarata eṣābhrir upaśete vṛṣā vā āhavanīyo yoṣābhrirdakṣiṇato vai vṛṣā yoṣām upaśete 'ratnimātre 'ratnimātrāddhi vṛṣā yoṣām upaśete

