10 shlokas
- 1
हस्त एषाभ्रिर्भवत्य् अथ पशून् अभिमन्त्रयते
एतद्वा एषु देवा अन्वेषिष्यन्तः पुरस्ताद्वीर्यमदधुस्तथैवैष्वयम् एतद् अन्वेषिष्यन्पुरस्ताद्वीर्यं दधाति
hasta eṣābhrirbhavaty atha paśūn abhimantrayate
etadvā eṣu devā anveṣiṣyantaḥ purastādvīryamadadhustathaivaiṣvayam etad anveṣiṣyanpurastādvīryaṃ dadhāti
- 2
सो ऽश्वमभिमन्त्रयते
प्रतूर्तं वाजिन्नाद्रवेति यद्वै क्षिप्रं तत्तूर्तम् अथ यत्क्षिप्रात्क्षेपीयस्तत्प्रतूर्तं वरिष्ठाम् अनु संवतम् इतीयं वै वरिष्ठा संवद् इमामनु संवतम् इत्येतद्दिवि ते जन्म परमम् अन्तरिक्षे तव नाभिः पृथिव्याम् अधि योनिरिद् इति तद् एनमेता देवताः करोत्य् अग्निं वायुम् आदित्यं तद् अश्वे वीर्यं दधाति
so 'śvamabhimantrayate
pratūrtaṃ vājinnādraveti yadvai kṣipraṃ tattūrtam atha yatkṣiprātkṣepīyastatpratūrtaṃ variṣṭhām anu saṃvatam itīyaṃ vai variṣṭhā saṃvad imāmanu saṃvatam ityetaddivi te janma paramam antarikṣe tava nābhiḥ pṛthivyām adhi yonirid iti tad enametā devatāḥ karoty agniṃ vāyum ādityaṃ tad aśve vīryaṃ dadhāti
- 3
अथ रासभम्
युञ्जाथां रासभं युवम् इत्यध्वर्युं चैतद्यजमानं चाहास्मिन्यामे वृषण्वसू इत्यस्मिन्कर्मणि वृषण्वसू इत्य् एतद् अग्निम्भरन्तम् अस्मयुम् इत्यग्निम्भरन्तम् अस्मत्प्रेषितम् इत्य् एतत्तद्रासभे वीर्यं दधाति
atha rāsabham
yuñjāthāṃ rāsabhaṃ yuvam ityadhvaryuṃ caitadyajamānaṃ cāhāsminyāme vṛṣaṇvasū ityasminkarmaṇi vṛṣaṇvasū ity etad agnimbharantam asmayum ityagnimbharantam asmatpreṣitam ity etattadrāsabhe vīryaṃ dadhāti
- 4
अथाजम्
योगे योगे तवस्तरं वाजे वाजे हवामह इत्य् अन्नं वै वाजः कर्मणि कर्मणि तवस्तरमन्ने ऽन्ने हवामह इत्येतत्सखाय इन्द्रमूतय इतीन्द्रियवन्तमूतय इत्येतत्तद् अजे वीर्यं दधाति
athājam
yoge yoge tavastaraṃ vāje vāje havāmaha ity annaṃ vai vājaḥ karmaṇi karmaṇi tavastaramanne 'nne havāmaha ityetatsakhāya indramūtaya itīndriyavantamūtaya ityetattad aje vīryaṃ dadhāti
- 5
त्रिभिरभिमन्त्रयते
त्रिवृदग्निर्यावानग्निर्यावत्यस्य मात्रा तावतैवैष्वेतद्वीर्यं दधाति
tribhirabhimantrayate
trivṛdagniryāvānagniryāvatyasya mātrā tāvataivaiṣvetadvīryaṃ dadhāti
- 6
अथैनान्प्राच उत्क्रमयति
तदेनमेतैः पशुभिर् अन्विच्छति नोपस्पृशत्य् अग्निरेष यत्पशवो नेन्मायमग्निर्हिनसदिति
athainānprāca utkramayati
tadenametaiḥ paśubhir anvicchati nopaspṛśaty agnireṣa yatpaśavo nenmāyamagnirhinasaditi
- 7
सो ऽश्वमुत्क्रमयति
प्रतूर्वन्नेह्यवक्रामन्नशस्तीर् इति पाप्मा वा अशस्तिस्त्वरमाण एह्य् अवक्रामन्पाप्मानमित्य् एतद्रुद्रस्य गाणपत्यम्मयोभूरेहीति रौद्रा वै पशवो या ते देवता तस्यै गाणपत्यम्मयोभूर् एहीत्य् एतत्तद् एनम् अश्वेनान्विच्छति
so 'śvamutkramayati
pratūrvannehyavakrāmannaśastīr iti pāpmā vā aśastistvaramāṇa ehy avakrāmanpāpmānamity etadrudrasya gāṇapatyammayobhūrehīti raudrā vai paśavo yā te devatā tasyai gāṇapatyammayobhūr ehīty etattad enam aśvenānvicchati
- 8
अथ रासभम्
उर्वन्तरिक्षं वीहि स्वस्तिगव्यूतिरभयानि कृण्वन्निति यथैव यजुस्तथा बन्धुः पूष्णा सयुजा सहेतीयं वै पूषानया सयुजा सहेत्येतत्तद् एनं रासभेनान्विच्छति
atha rāsabham
urvantarikṣaṃ vīhi svastigavyūtirabhayāni kṛṇvanniti yathaiva yajustathā bandhuḥ pūṣṇā sayujā sahetīyaṃ vai pūṣānayā sayujā sahetyetattad enaṃ rāsabhenānvicchati
- 9
अथाजम्
पृथिव्याः सधस्थादग्निम्पुरीष्यम् अङ्गिरस्वद् आभरेति पृथिव्या उपस्थाद् अग्निम्पशव्यम् अग्निवद् आभरेत्य् एतत्तद् एनम् अजेनान्विच्छति
athājam
pṛthivyāḥ sadhasthādagnimpurīṣyam aṅgirasvad ābhareti pṛthivyā upasthād agnimpaśavyam agnivad ābharety etattad enam ajenānvicchati
- 10
त्रिभिरन्विच्छति
त्रिवृदग्निर्यावानग्निर्यावत्यस्य मात्रा तावतैवैनम् एतदन्विच्छति त्रिभिः पुरस्ताद् अभिमन्त्रयते तत्षट्षडृतवः संवत्सरः संवत्सरो ऽग्निर्यावान् अग्निर्यावत्यस्य मात्रा तावत्तद्भवति
tribhiranvicchati
trivṛdagniryāvānagniryāvatyasya mātrā tāvataivainam etadanvicchati tribhiḥ purastād abhimantrayate tatṣaṭṣaḍṛtavaḥ saṃvatsaraḥ saṃvatsaro 'gniryāvān agniryāvatyasya mātrā tāvattadbhavati

