9 shlokas
- 1
प्रजापतिर् इमांल्लोकान् ऐप्सत्
स एतं वयोविधम् आत्मानम् अपश्यद् अग्निम्
तं व्यधत्त
तेनेमं लोकम् आप्नोत्
स द्वितीयं वयोविधम् आत्मानम् अपश्यन्महाव्रतम्
तद्व्यधत्त
तेनान्तरिक्षम् आप्नोत्
स तृतीयं वयोविधम् आत्मानम् अपश्यन्महद् उक्थम्
तद्व्यधत्त
तेन दिवम् आप्नोत्
prajāpatir imāṃllokān aipsat
sa etaṃ vayovidham ātmānam apaśyad agnim
taṃ vyadhatta
tenemaṃ lokam āpnot
sa dvitīyaṃ vayovidham ātmānam apaśyanmahāvratam
tadvyadhatta
tenāntarikṣam āpnot
sa tṛtīyaṃ vayovidham ātmānam apaśyanmahad uktham
tadvyadhatta
tena divam āpnot
- 2
अयं वाव लोक एषो ऽग्निश्चितः अन्तरिक्षम्महाव्रतं द्यौर्महद् उक्थम्
तस्माद् एतानि सर्वाणि सहोपेयाद् अग्निम्महाव्रतम्महद् उक्थम्
सह हीमे लोका असृज्यन्त
तद्यद् अग्निः प्रथमश्चीयते ऽयं ह्य् एषां लोकानां प्रथमो ऽसृज्यतेत्य् अधिदेवतम्
ayaṃ vāva loka eṣo 'gniścitaḥ antarikṣammahāvrataṃ dyaurmahad uktham
tasmād etāni sarvāṇi sahopeyād agnimmahāvratammahad uktham
saha hīme lokā asṛjyanta
tadyad agniḥ prathamaścīyate 'yaṃ hy eṣāṃ lokānāṃ prathamo 'sṛjyatety adhidevatam
- 3
अथाध्यात्मम्
मन एवाग्निः
प्राणो महाव्रतम्
वाङ्महद् उक्थम्
तस्माद् एतानि सर्वाणि सहोपेयात्
सह हि मनः प्राणो वाक्
तद्यद् अग्निः प्रथमश्चीयते मनो हि प्रथमम्प्राणानाम्
athādhyātmam
mana evāgniḥ
prāṇo mahāvratam
vāṅmahad uktham
tasmād etāni sarvāṇi sahopeyāt
saha hi manaḥ prāṇo vāk
tadyad agniḥ prathamaścīyate mano hi prathamamprāṇānām
- 4
आत्मैवाग्निः
प्राणो महाव्रतम्
वाङ्महद् उक्थम्
तस्माद् एतानि सर्वाणि सहोपेयात्
सह ह्य् आत्मा प्राणो वाक्
तद्यद् अग्निः प्रथमश्चीयत आत्मा हि प्रथमः सम्भवतः सम्भवति
ātmaivāgniḥ
prāṇo mahāvratam
vāṅmahad uktham
tasmād etāni sarvāṇi sahopeyāt
saha hy ātmā prāṇo vāk
tadyad agniḥ prathamaścīyata ātmā hi prathamaḥ sambhavataḥ sambhavati
- 5
शिर एवाग्निः
प्राणो महाव्रतम्
आत्मा महद् उक्थम्
तस्माद् एतानि सर्वाणि सहोपेयात्
सह हि शिरः प्राण आत्मा
तद्यद् अग्निः प्रथमश्चीयते शिरो हि प्रथमं जायमानस्य जायते
तस्माद्यत्रैतानि सर्वाणि सह क्रियन्ते महद् एवोक्थम् आतमां ख्यायते
आत्मा हि महद् उक्थम्
śira evāgniḥ
prāṇo mahāvratam
ātmā mahad uktham
tasmād etāni sarvāṇi sahopeyāt
saha hi śiraḥ prāṇa ātmā
tadyad agniḥ prathamaścīyate śiro hi prathamaṃ jāyamānasya jāyate
tasmādyatraitāni sarvāṇi saha kriyante mahad evoktham ātamāṃ khyāyate
ātmā hi mahad uktham
- 6
तद् आहुर्यद् एतानि सर्वाणि सह दुरुपापानि कैतेषाम् उपाप्तिर् इति
ज्योतिष्टोम एवाग्निष्टोमे
ज्योतिष्टोमेनैवाग्निष्टोमेन यजेत
tad āhuryad etāni sarvāṇi saha durupāpāni kaiteṣām upāptir iti
jyotiṣṭoma evāgniṣṭome
jyotiṣṭomenaivāgniṣṭomena yajeta
- 7
तस्य वा एतस्य ज्योतिष्टोमस्याग्निष्टोमस्य त्रिवृद्बहिष्पवमानम्
तद्व्रतस्य शिरः
पञ्चदशसप्तदशा उत्तरौ पवमानौ
तौ पक्षौ
पञ्चदशं होतुर् आज्यं सप्तदशम्पृष्ठम् एकविंशं यज्ञायज्ञियम्
तत्पुच्छम्
tasya vā etasya jyotiṣṭomasyāgniṣṭomasya trivṛdbahiṣpavamānam
tadvratasya śiraḥ
pañcadaśasaptadaśā uttarau pavamānau
tau pakṣau
pañcadaśaṃ hotur ājyaṃ saptadaśampṛṣṭham ekaviṃśaṃ yajñāyajñiyam
tatpuccham
- 8
तयोर्वा एतयोः पञ्चदशसप्तदशयोर्द्वात्रिंशत्स्तोत्रियाः
ततो याः पञ्चविंशतिः स पञ्चविंश आत्मा
अथ याः सप्तातियन्ति ताः परिमादः
पशवो हैताः
पशवः परिमादः
एतावद्वै महाव्रतम्
तद् एतद् अत्रैव महाव्रतम् आप्नोति
tayorvā etayoḥ pañcadaśasaptadaśayordvātriṃśatstotriyāḥ
tato yāḥ pañcaviṃśatiḥ sa pañcaviṃśa ātmā
atha yāḥ saptātiyanti tāḥ parimādaḥ
paśavo haitāḥ
paśavaḥ parimādaḥ
etāvadvai mahāvratam
tad etad atraiva mahāvratam āpnoti
- 9
अथ होता सप्त छन्दांसि शंसति चतुरुत्तराण्य् एकर्चानि विराडष्टमानि
तेषां तिस्रश्चाशीतयो ऽक्षराणि पञ्चचत्वारिंशच्च
ततो या अशीतयः सैवाशीतीनाम् आप्तिः
अशीतिभिर्हि महद् उक्थम् आख्यायते
अथ यानि पञ्चचत्वारिंशत्ततो यानि पञ्चविंशतिः स पञ्चविंश आत्मा
यत्र वा आत्मा तद् एव शिरस्तत्पक्षपुच्छानि
अथ यानि विंशतिस्तद् आवपनम्
एतावद्वै महद् उक्थम्
तद् एतद् अत्रैव महद् उक्थम् आप्नोति
तानि वा एतानि सर्वाणि ज्योतिष्टोम एवाग्निष्टोम आप्यन्ते
तस्माद् उ ज्योतिष्टोमेनैवाग्निष्टोमेन यजेत
atha hotā sapta chandāṃsi śaṃsati caturuttarāṇy ekarcāni virāḍaṣṭamāni
teṣāṃ tisraścāśītayo 'kṣarāṇi pañcacatvāriṃśacca
tato yā aśītayaḥ saivāśītīnām āptiḥ
aśītibhirhi mahad uktham ākhyāyate
atha yāni pañcacatvāriṃśattato yāni pañcaviṃśatiḥ sa pañcaviṃśa ātmā
yatra vā ātmā tad eva śirastatpakṣapucchāni
atha yāni viṃśatistad āvapanam
etāvadvai mahad uktham
tad etad atraiva mahad uktham āpnoti
tāni vā etāni sarvāṇi jyotiṣṭoma evāgniṣṭoma āpyante
tasmād u jyotiṣṭomenaivāgniṣṭomena yajeta

