22 shlokas
- 1
यो ह वा अग्निः सामिधेनीभिः समिद्धः
अतितरां ह वै स इतरस्माद् अग्नेस्तपत्य् अनवधृष्यो हि भवत्यनवमृश्यः
yo ha vā agniḥ sāmidhenībhiḥ samiddhaḥ
atitarāṃ ha vai sa itarasmād agnestapaty anavadhṛṣyo hi bhavatyanavamṛśyaḥ
- 2
स यथा हैवाग्निः
सामिधेनीभिः समिद्धस्तपत्येवं हैव ब्राह्मणः सामिधेनीर्विद्वाननुब्रुवंस्तपत्य् अनवधृष्यो हि भवत्यनवमृश्यः
sa yathā haivāgniḥ
sāmidhenībhiḥ samiddhastapatyevaṃ haiva brāhmaṇaḥ sāmidhenīrvidvānanubruvaṃstapaty anavadhṛṣyo hi bhavatyanavamṛśyaḥ
- 3
सो ऽन्वाह
प्र व इति प्राणो वै प्रवान्प्राणमेवैतया समिन्द्धे ऽग्न आयाहि वीतय इत्य् अपानो वा एतवान् अपानमेवैतया समिन्द्धे बृहच्छोचा यविष्ठ्येत्य् उदानो वै बृहच्छोचा उदानमेवैतया समिन्द्धे
so 'nvāha
pra va iti prāṇo vai pravānprāṇamevaitayā saminddhe 'gna āyāhi vītaya ity apāno vā etavān apānamevaitayā saminddhe bṛhacchocā yaviṣṭhyety udāno vai bṛhacchocā udānamevaitayā saminddhe
- 4
स नः पृथु श्रवाय्यमिति
श्रोत्रं वै पृथु श्रवाय्यं श्रोत्रेण हीदमुरु पृथु शृणोति श्रोत्रमेवैतया समिन्द्धे
sa naḥ pṛthu śravāyyamiti
śrotraṃ vai pṛthu śravāyyaṃ śrotreṇa hīdamuru pṛthu śṛṇoti śrotramevaitayā saminddhe
- 5
ईडेन्यो नमस्य इति
वाग्वा ईडेन्या वाग्घीदं सर्वमीट्टे वाचेदं सर्वमीडितं वाचमेवैतया समिन्द्धे
īḍenyo namasya iti
vāgvā īḍenyā vāgghīdaṃ sarvamīṭṭe vācedaṃ sarvamīḍitaṃ vācamevaitayā saminddhe
- 6
अश्वो न देववाहन इति
मनो वै देववाहनम्मनो हीदम्मनस्विनं भूयिष्ठं वनीवाह्यते मन एवैतया समिन्द्धे
aśvo na devavāhana iti
mano vai devavāhanammano hīdammanasvinaṃ bhūyiṣṭhaṃ vanīvāhyate mana evaitayā saminddhe
- 7
अग्ने दीद्यतम्बृहदिति
चक्षुर्वै दीदयेव चक्षुरेवैतया समिन्द्धे
agne dīdyatambṛhaditi
cakṣurvai dīdayeva cakṣurevaitayā saminddhe
- 8
अग्निं दूतं वृणीमह इति
य एवायम्मध्यमः प्राण एतमेवैतया समिन्द्धे सा हैषान्तस्था प्राणानाम् अतो ह्यन्य ऊर्ध्वाः प्राणा अतो ऽन्ये ऽवाञ्चो ऽन्तस्था ह भवन्त्य् अन्तस्थाम् एनम्मन्यन्ते य एवम् एताम् अन्तस्थाम्प्राणानां वेद
agniṃ dūtaṃ vṛṇīmaha iti
ya evāyammadhyamaḥ prāṇa etamevaitayā saminddhe sā haiṣāntasthā prāṇānām ato hyanya ūrdhvāḥ prāṇā ato 'nye 'vāñco 'ntasthā ha bhavanty antasthām enammanyante ya evam etām antasthāmprāṇānāṃ veda
- 9
शोचिष्केशस्तम् ईमह इति
शिश्नं वै शोचिष्केशं शिश्नं हीदं शिश्निनम्भूयिष्ठं शोचयति शिश्नम् एवैतयासमिन्द्धे
śociṣkeśastam īmaha iti
śiśnaṃ vai śociṣkeśaṃ śiśnaṃ hīdaṃ śiśninambhūyiṣṭhaṃ śocayati śiśnam evaitayāsaminddhe
- 10
समिद्धो अग्न आहुतेति
य एवायमवाङ्प्राण एतमेवैतया समिन्द्ध आ जुहोता दुवस्यतेति सर्वमात्मानं समिन्द्ध आ नखेभ्यो ऽथो लोमभ्यः
samiddho agna āhuteti
ya evāyamavāṅprāṇa etamevaitayā saminddha ā juhotā duvasyateti sarvamātmānaṃ saminddha ā nakhebhyo 'tho lomabhyaḥ
- 11
स यद्येनम्प्रथमायां सामिधेन्यामनुव्याहरेत्
तम्प्रति ब्रूयात्प्राणं वा एतदात्मनो ऽग्नावाधाः प्राणेनात्मन आर्त्तिमारिष्यसीति तथा हैव स्यात्
sa yadyenamprathamāyāṃ sāmidhenyāmanuvyāharet
tamprati brūyātprāṇaṃ vā etadātmano 'gnāvādhāḥ prāṇenātmana ārttimāriṣyasīti tathā haiva syāt
- 12
यदि द्वितीयस्यामनुव्याहरेत्
तम्प्रति ब्रूयाद् अपानं वा एतदात्मनो ऽग्नावाधा अपानेनात्मन आर्त्तिमारिष्यसीति तथा हैव स्यात्
yadi dvitīyasyāmanuvyāharet
tamprati brūyād apānaṃ vā etadātmano 'gnāvādhā apānenātmana ārttimāriṣyasīti tathā haiva syāt
- 13
यदि तृतीयस्यामनुव्याहरेत्
तम्प्रति ब्रूयादुदानं वै ॥। उदानेनात्मनः ॥। स्यात्
yadi tṛtīyasyāmanuvyāharet
tamprati brūyādudānaṃ vai ||| udānenātmanaḥ ||| syāt
- 14
यदि चतुर्थ्यामनुव्याहरेत्
तम्प्रतिब्रूयाच्छ्रोत्रं वा एतदात्मनो ऽग्नावाधाः श्रोत्रेणात्मन आर्त्तिमारिष्यसि बधिरो भविष्यसीति तथा हैव स्यात्
yadi caturthyāmanuvyāharet
tampratibrūyācchrotraṃ vā etadātmano 'gnāvādhāḥ śrotreṇātmana ārttimāriṣyasi badhiro bhaviṣyasīti tathā haiva syāt
- 15
यदि पञ्चम्यामनुव्याहरेत्
तम्प्रति ब्रूयाद्वाचं वा एतदात्मनो ऽग्नावाधा वाचात्मन आर्त्तिमारिष्यसि मूको भविष्यसीति तथा हैव स्यात्
yadi pañcamyāmanuvyāharet
tamprati brūyādvācaṃ vā etadātmano 'gnāvādhā vācātmana ārttimāriṣyasi mūko bhaviṣyasīti tathā haiva syāt
- 16
यदि षष्ठ्यामनुव्याहरेत्
तम्प्रति ब्रूयान्मनो वा एतदात्मनो ऽग्नावाधा मनसात्मन आर्त्तिमारिष्यसि मनोमुषिगृहीतो मोमुघश्चरिष्यसीति तथा हैव स्यात्
yadi ṣaṣṭhyāmanuvyāharet
tamprati brūyānmano vā etadātmano 'gnāvādhā manasātmana ārttimāriṣyasi manomuṣigṛhīto momughaścariṣyasīti tathā haiva syāt
- 17
यदि सप्तम्यां अनुव्याहरेत्
तं प्रति ब्रूयाच्चक्षुर्वा एतदात्मनो ऽग्नावाधाश्चक्षुषात्मन आर्त्तिमारिष्यस्यन्धो भविष्यसीति तथा हैव स्यात्
yadi saptamyāṃ anuvyāharet
taṃ prati brūyāccakṣurvā etadātmano 'gnāvādhāścakṣuṣātmana ārttimāriṣyasyandho bhaviṣyasīti tathā haiva syāt
- 18
यद्यष्टम्याम् अनुव्याहरेत्
तं प्रति ब्रूयान्मध्यं वा एतत्प्राणमात्मनो ऽग्नावाधा मध्येन प्राणेनात्मन आर्तिम् आरिष्यस्युद्ध्माय मरिष्यसीति तथा हैव स्यात्
yadyaṣṭamyām anuvyāharet
taṃ prati brūyānmadhyaṃ vā etatprāṇamātmano 'gnāvādhā madhyena prāṇenātmana ārtim āriṣyasyuddhmāya mariṣyasīti tathā haiva syāt
- 19
यदि नवम्याम् अनुव्याहरेत्
तं प्रति ब्रूयाच्छिश्नं वा एतदात्मनो ऽग्नावाधाः शिश्नेनात्मन आर्त्तिमारिष्यसि क्लीबो भविष्यसीति तथा हैव स्यात्
yadi navamyām anuvyāharet
taṃ prati brūyācchiśnaṃ vā etadātmano 'gnāvādhāḥ śiśnenātmana ārttimāriṣyasi klībo bhaviṣyasīti tathā haiva syāt
- 20
यदि दशम्यामनुव्याहरेत्
तं प्रति ब्रूयाद् अवाञ्चं वा एतत्प्राणमात्मनो ऽग्नावाधा अवाचा प्राणेनात्मन आर्त्तिमारिष्यस्य् अपिनद्धो मरिष्यसीति तथा हैव स्यात्
yadi daśamyāmanuvyāharet
taṃ prati brūyād avāñcaṃ vā etatprāṇamātmano 'gnāvādhā avācā prāṇenātmana ārttimāriṣyasy apinaddho mariṣyasīti tathā haiva syāt
- 21
यद्येकादश्यामनुव्याहरेत्तं प्रति ब्रूयात्
सर्वं वा एतदात्मानमग्नावाधाः सर्वेणात्मनार्तिम् आरिष्यसि क्षिप्रे ऽमुं लोकम् एष्यसीति तथा हैव स्यात्
yadyekādaśyāmanuvyāharettaṃ prati brūyāt
sarvaṃ vā etadātmānamagnāvādhāḥ sarveṇātmanārtim āriṣyasi kṣipre 'muṃ lokam eṣyasīti tathā haiva syāt
- 22
स यथा हैवाग्निम्
सामिधेनीभिः समिद्धमापद्यार्त्तिं न्येत्येवं हैव ब्राह्मणं सामिधेनीर्विद्वांसं समनुब्रुवन्तम् अनुव्याहृत्यार्त्तिं न्येति
sa yathā haivāgnim
sāmidhenībhiḥ samiddhamāpadyārttiṃ nyetyevaṃ haiva brāhmaṇaṃ sāmidhenīrvidvāṃsaṃ samanubruvantam anuvyāhṛtyārttiṃ nyeti

