18 shlokas
- 1
यूपं करोति सक्षीरं स्थूलं मूले बालाग्रम् अनुरूपम्
yūpaṃ karoti sakṣīraṃ sthūlaṃ mūle bālāgram anurūpam
- 2
वज्रो वै यूपो वज्रेणैवास्मै भ्रातृव्यं प्रहरति
vajro vai yūpo vajreṇaivāsmai bhrātṛvyaṃ praharati
- 3
अष्टाश्रीः करोति
aṣṭāśrīḥ karoti
- 4
दश दिशः परिगृह्णाति
उभयतः पाङ्क्ते द्वे यूपे करोति
daśa diśaḥ parigṛhṇāti
ubhayataḥ pāṅkte dve yūpe karoti
- 5
पञ्चदशसप्तदशैकविंशत्यरत्निं वा
pañcadaśasaptadaśaikaviṃśatyaratniṃ vā
- 6
पालाशं पुष्टिकामस्य
बैल्वं ब्रह्मवर्चसकामस्य
औदुम्बरम् अन्नाद्यकामस्य
खादिरं बलकामस्य
वैभीतकराजवृक्षौ भ्रातृव्यवतः
क्रमुकाश्वत्थपाषाणाः यशस्कामस्य
यत्किंच यज्ञियं पशुकामस्य
pālāśaṃ puṣṭikāmasya
bailvaṃ brahmavarcasakāmasya
audumbaram annādyakāmasya
khādiraṃ balakāmasya
vaibhītakarājavṛkṣau bhrātṛvyavataḥ
kramukāśvatthapāṣāṇāḥ yaśaskāmasya
yatkiṃca yajñiyaṃ paśukāmasya
- 7
तत्र वर्जनीया भवन्ति
गडुलो व्रणिलो व्यावृत्तः कुठिः कुब्जः शूलो दग्धः शुष्कः सुषिरो घुणजग्ध इत्य् अप्रशस्ताः
tatra varjanīyā bhavanti
gaḍulo vraṇilo vyāvṛttaḥ kuṭhiḥ kubjaḥ śūlo dagdhaḥ śuṣkaḥ suṣiro ghuṇajagdha ity apraśastāḥ
- 8
अथ प्रशस्ताः
शुद्धावर्ता अनुपूर्वसमाः प्रशस्ताः
atha praśastāḥ
śuddhāvartā anupūrvasamāḥ praśastāḥ
- 9
यूपस्याश्रिदैवतानि
अग्निः पूर्वायाम्
यमो दक्षिणायाम्
वरुणः पश्चिमायाम्
सोम उत्तरायाम्
या विदिशस्तास्व् आदित्यरुद्रमरुद्वसवः
अपराजिताः पितरश्चाधरायाम्
साध्याश्चोर्ध्वायाम्
yūpasyāśridaivatāni
agniḥ pūrvāyām
yamo dakṣiṇāyām
varuṇaḥ paścimāyām
soma uttarāyām
yā vidiśastāsv ādityarudramarudvasavaḥ
aparājitāḥ pitaraścādharāyām
sādhyāścordhvāyām
- 10
सर्वदेवत्यो वै यूपः
यूपो वै बहुरूपः वज्रीभूत्वा देवान् उपतिष्ठते
sarvadevatyo vai yūpaḥ
yūpo vai bahurūpaḥ vajrībhūtvā devān upatiṣṭhate
- 11
ते देवाः प्रजापतिम् उपाधावन्
यूपेन प्रहरन्त्य् आरोपयन्त्य् आयोधयन्ति च
तद्यूपस्य यूपत्वम्
te devāḥ prajāpatim upādhāvan
yūpena praharanty āropayanty āyodhayanti ca
tadyūpasya yūpatvam
- 12
मूलम् अरत्निं सत्वचं निखनेत्
mūlam aratniṃ satvacaṃ nikhanet
- 13
तस्य यन्नैखान्यं तत्पितॄणाम्
यद् ऊर्ध्वं तन्मनुष्याणाम्यत्तदधो रशनाया ओषधिवनस्पतीनाम्
यद् ऊर्ध्वं रशनायास्तद्विश्वेषां देवानाम्
tasya yannaikhānyaṃ tatpitṝṇām
yad ūrdhvaṃ tanmanuṣyāṇāmyattadadho raśanāyā oṣadhivanaspatīnām
yad ūrdhvaṃ raśanāyāstadviśveṣāṃ devānām
- 14
आप्लावयन्त्य् अलंकुर्वन्त्य् अहतेन वसनेनाच्छादयन्ति च
āplāvayanty alaṃkurvanty ahatena vasanenācchādayanti ca
- 15
तद्गन्धर्वाप्सरसाम्
tadgandharvāpsarasām
- 16
इन्द्रस्य चषालम्
यद् ऊर्ध्वं चषालस्याङ्गुलमात्रं कार्यं तत्साध्यानां देवानाम्
indrasya caṣālam
yad ūrdhvaṃ caṣālasyāṅgulamātraṃ kāryaṃ tatsādhyānāṃ devānām
- 17
प्राचीं संनमत्य् एतद्वै विष्णोः परमं पदम्
prācīṃ saṃnamaty etadvai viṣṇoḥ paramaṃ padam
- 18
तस्यर्तवः शरीरम्
शिरः संवत्सरः
वेदा रूपाणि
संवत्सर एव प्रतितिष्ठति
य एवं वेद
tasyartavaḥ śarīram
śiraḥ saṃvatsaraḥ
vedā rūpāṇi
saṃvatsara eva pratitiṣṭhati
ya evaṃ veda

