21 shlokas
- 1
अथैनाम् उदीचीं सप्तपदानि प्रक्रामयति एकम् इषे द्वे ऊर्जे त्रीणि रायस्पोषाय चत्वारि मायोभवाय पञ्च पशुभ्यः षड् ऋतुभ्यः सखे सप्तपदा भव सा माम् अनुव्रता भव
athainām udīcīṃ saptapadāni prakrāmayati ekam iṣe dve ūrje trīṇi rāyaspoṣāya catvāri māyobhavāya pañca paśubhyaḥ ṣaḍ ṛtubhyaḥ sakhe saptapadā bhava sā mām anuvratā bhava
- 2
विष्णुस्त्वा नयत्व् इति सर्वत्रानुषजति
viṣṇustvā nayatv iti sarvatrānuṣajati
- 3
निष्क्रमणप्रभृत्य् उदकुम्भं स्कन्धे कृत्वा दक्षिणतो ऽग्नेर्वाग्यतः स्थितो भवति
niṣkramaṇaprabhṛty udakumbhaṃ skandhe kṛtvā dakṣiṇato 'gnervāgyataḥ sthito bhavati
- 4
उत्तरत एकेषाम्
uttarata ekeṣām
- 5
तत एनां मूर्धन्य् अभिषिञ्चति आपः शिवाः शिवतमाः शान्ताः शान्ततमास्तास्ते कृण्वन्तु भेषजम् इति
tata enāṃ mūrdhany abhiṣiñcati āpaḥ śivāḥ śivatamāḥ śāntāḥ śāntatamāstāste kṛṇvantu bheṣajam iti
- 6
आपो हि ष्ठेति च तिसृभिः
āpo hi ṣṭheti ca tisṛbhiḥ
- 7
अथैनां सूर्यम् उदीक्षयति तच्चक्षुर् इति
athaināṃ sūryam udīkṣayati taccakṣur iti
- 8
अथास्यै दक्षिणांसम् अधि हृदयम् आलभते मम व्रते ते हृदयं दधामि मम चित्तम् अनु चित्तं ते अस्तु मम वाचम् एकमना जुषस्व प्रजापतिष्ट्वा नियुनक्तु मह्यम् इति
athāsyai dakṣiṇāṃsam adhi hṛdayam ālabhate mama vrate te hṛdayaṃ dadhāmi mama cittam anu cittaṃ te astu mama vācam ekamanā juṣasva prajāpatiṣṭvā niyunaktu mahyam iti
- 9
अथैनाम् अभिमन्त्रयते सुमङ्गलीर् इयम्वधूर् इमां समेत पश्यत सौभाग्यम् अस्यै दत्त्वायाथास्तं विपरेतनेति
athainām abhimantrayate sumaṅgalīr iyamvadhūr imāṃ sameta paśyata saubhāgyam asyai dattvāyāthāstaṃ viparetaneti
- 10
तां दृढपुरुष उन्मथ्य प्राग्वोदग्वानुगुप्त आगार आनडुहे रोहिते चर्मण्य् उपवेशयति इह गावो निषीदन्त्व् इहाश्वा इह पूरुषाः
इहो सहस्रदक्षिणो यज्ञ इह पूषा निषीदन्त्व् इति
tāṃ dṛḍhapuruṣa unmathya prāgvodagvānugupta āgāra ānaḍuhe rohite carmaṇy upaveśayati iha gāvo niṣīdantv ihāśvā iha pūruṣāḥ
iho sahasradakṣiṇo yajña iha pūṣā niṣīdantv iti
- 11
ग्रामवचनं च कुर्युः
grāmavacanaṃ ca kuryuḥ
- 12
विवाहश्मशानयोर्ग्रामं प्रविशताद् इति वचनात्
vivāhaśmaśānayorgrāmaṃ praviśatād iti vacanāt
- 13
तस्मात्तयोर्ग्रामः प्रमाणम् इति श्रुतेः
tasmāttayorgrāmaḥ pramāṇam iti śruteḥ
- 14
आचार्याय वरं ददाति
ācāryāya varaṃ dadāti
- 15
गौर्ब्राह्मणस्य वरः
gaurbrāhmaṇasya varaḥ
- 16
ग्रामो राजन्यस्य
grāmo rājanyasya
- 17
अश्वो वैश्यस्य
aśvo vaiśyasya
- 18
अधिरथं शतं दुहितृमते
adhirathaṃ śataṃ duhitṛmate
- 19
अस्तमिते ध्रुवं दर्शयति
ध्रुवम् असि ध्रुवं त्वा पश्यामि ध्रुवैधि पोष्ये मयि मह्यं त्वादाद्बृहस्पतिर्मया पत्या प्रजावती संजीव शरदः शतम् इति
astamite dhruvaṃ darśayati
dhruvam asi dhruvaṃ tvā paśyāmi dhruvaidhi poṣye mayi mahyaṃ tvādādbṛhaspatirmayā patyā prajāvatī saṃjīva śaradaḥ śatam iti
- 20
सा यदि न पश्येत्पश्यामीत्य् एव ब्रूयात्
sā yadi na paśyetpaśyāmīty eva brūyāt
- 21
त्रिरात्रम् अक्षारालवणाशिनौ स्याताम् अधः शयीयातां संवत्सरं न मिथुनम् उपेयातां द्वादशरात्रं षड्रात्रं त्रिरात्रम् अन्ततः
trirātram akṣārālavaṇāśinau syātām adhaḥ śayīyātāṃ saṃvatsaraṃ na mithunam upeyātāṃ dvādaśarātraṃ ṣaḍrātraṃ trirātram antataḥ

