16 shlokas
- 1
एष वाव यज्ञो यद् अग्निष्टोमः
eṣa vāva yajño yad agniṣṭomaḥ
- 2
एकस्मा अन्यो यज्ञः कामायाह्रियते सर्वेभ्यो ऽग्निष्टोमः
ekasmā anyo yajñaḥ kāmāyāhriyate sarvebhyo 'gniṣṭomaḥ
- 3
द्वादश स्तोत्राण्य् अग्निष्टोमो द्वादश मासाः संव्वत्सरः संव्वत्सरं पशवो ऽनु प्रजायन्ते तेन पशव्यः समृद्धः
dvādaśa stotrāṇy agniṣṭomo dvādaśa māsāḥ saṃvvatsaraḥ saṃvvatsaraṃ paśavo 'nu prajāyante tena paśavyaḥ samṛddhaḥ
- 4
द्वादश स्तोत्राणि द्वादश शस्त्राणि तच्चतुर्विंशतिश्चतुर्विंशतिर् अर्धमासाः संव्वत्सरः संव्वत्सरं पशवो ऽनुप्रजायन्ते तेन पशव्यः समृद्धः
dvādaśa stotrāṇi dvādaśa śastrāṇi taccaturviṃśatiścaturviṃśatir ardhamāsāḥ saṃvvatsaraḥ saṃvvatsaraṃ paśavo 'nuprajāyante tena paśavyaḥ samṛddhaḥ
- 5
अग्नौ स्तोत्रम् अग्नौ शस्त्रं प्रतितिष्ठति तेन ब्रह्मवर्चस्यः
agnau stotram agnau śastraṃ pratitiṣṭhati tena brahmavarcasyaḥ
- 6
किं ज्योतिष्टोमस्य ज्योतिष्टोमत्वम् इत्य् आहुर्विराजं संस्तुतः सम्पद्यते विराड्वै छन्दसां ज्योतिः
kiṃ jyotiṣṭomasya jyotiṣṭomatvam ity āhurvirājaṃ saṃstutaḥ sampadyate virāḍvai chandasāṃ jyotiḥ
- 7
ज्योतिः समानानां भवति य एवं वेद
jyotiḥ samānānāṃ bhavati ya evaṃ veda
- 8
ज्येष्ठयज्ञो वा एष यद् अग्निष्टोमः
jyeṣṭhayajño vā eṣa yad agniṣṭomaḥ
- 9
प्रजापतिः प्रजा असृजत ता अस्मै श्रैष्ठ्याय नातिष्ठन्त स एतम् अग्निष्टोमम् अपश्यत्तम् आहरत्ततो ऽस्मै प्रजाः श्रैष्ठ्यायातिष्ठन्त
prajāpatiḥ prajā asṛjata tā asmai śraiṣṭhyāya nātiṣṭhanta sa etam agniṣṭomam apaśyattam āharattato 'smai prajāḥ śraiṣṭhyāyātiṣṭhanta
- 10
तिष्ठन्ते ऽस्मै समानाः श्रैष्ठ्याय य एवं वेद
tiṣṭhante 'smai samānāḥ śraiṣṭhyāya ya evaṃ veda
- 11
यत्त्व् इत्य् आहुर्गायत्रं प्रातःसवनं त्रैष्टुभं माध्यन्दिनं सवनं जागतं तृतीयसवनं क्व तर्हि तुरीयं छन्दो ऽनुष्टुब् इति
yattv ity āhurgāyatraṃ prātaḥsavanaṃ traiṣṭubhaṃ mādhyandinaṃ savanaṃ jāgataṃ tṛtīyasavanaṃ kva tarhi turīyaṃ chando 'nuṣṭub iti
- 12
छन्दसां वा अन्ववलुप्तिं यजमानो ऽन्ववलुप्यते
chandasāṃ vā anvavaluptiṃ yajamāno 'nvavalupyate
- 13
अष्टाक्षरा गायत्री हिङ्कारो नवम एकादशाक्षरा त्रिष्टुब्द्वादशाक्षरा जगती छन्दोभिरेवानुष्टुभम् आप्नोति यजमानस्यानवलोपाय
aṣṭākṣarā gāyatrī hiṅkāro navama ekādaśākṣarā triṣṭubdvādaśākṣarā jagatī chandobhirevānuṣṭubham āpnoti yajamānasyānavalopāya
- 14
यो वा अनुष्टुभं सर्वत्रापिं सवनान्य् अन्वायत्तां वेद सर्वत्रास्यापिर्भवत्य् एषा वा अनुष्टुप्सर्वत्रापिः सवनान्य् अन्वायत्ता तद्य एवं वेद सर्वत्रापिर्भवति
yo vā anuṣṭubhaṃ sarvatrāpiṃ savanāny anvāyattāṃ veda sarvatrāsyāpirbhavaty eṣā vā anuṣṭupsarvatrāpiḥ savanāny anvāyattā tadya evaṃ veda sarvatrāpirbhavati
- 15
यद्वै राजानो ऽध्वानं धावयन्ति ये ऽश्वानां वीर्यवत्तमास्तान्युञ्जते त्रिवृत्पञ्चदश एकविंश एते वै स्तोमानां वीर्यवत्तमास्तान् एव युङ्क्ते स्वर्गस्य लोकस्य समष्ट्यै
yadvai rājāno 'dhvānaṃ dhāvayanti ye 'śvānāṃ vīryavattamāstānyuñjate trivṛtpañcadaśa ekaviṃśa ete vai stomānāṃ vīryavattamāstān eva yuṅkte svargasya lokasya samaṣṭyai
- 16
चतुष्टोमो भवति प्रतिष्ठा वै चतुष्टोमः प्रतिष्ठित्यै
catuṣṭomo bhavati pratiṣṭhā vai catuṣṭomaḥ pratiṣṭhityai

