14 shlokas
- 1
यथो हि नु वा एतत्तद्यत्र स्वरसंस्कारौ समर्थौ प्रादेशिकेन विकारेणान्वितौ स्यातां सर्वं प्रादेशिकम् इत्य् एवं सत्य् अनुपालम्भ एष भवति
yatho hi nu vā etattadyatra svarasaṃskārau samarthau prādeśikena vikāreṇānvitau syātāṃ sarvaṃ prādeśikam ity evaṃ saty anupālambha eṣa bhavati
- 2
यथो एतद्यः कश्च तत्कर्म कुर्यात्सर्वं तत्सत्त्वं तथाचक्षीरन्न् इति पश्यामः समानकर्मणां नामधेयप्रतिलम्भम् एकेषां नैकेषां यथा तक्षा परिव्राजको जीवनो भूमिज इति
yatho etadyaḥ kaśca tatkarma kuryātsarvaṃ tatsattvaṃ tathācakṣīrann iti paśyāmaḥ samānakarmaṇāṃ nāmadheyapratilambham ekeṣāṃ naikeṣāṃ yathā takṣā parivrājako jīvano bhūmija iti
- 3
एतेनैव उत्तरः प्रत्युक्तः
etenaiva uttaraḥ pratyuktaḥ
- 4
यथो एतद्यथा चापि प्रतीतार्थानि स्युस्तथैनान्य् आचक्षीरन्न् इति सन्त्य् अल्पप्रयोगाः कृतो अप्य् ऐकपदिका यथा व्रततिर्दमूना जाट्य आट्णारो जागरूको दर्विहोमीति
yatho etadyathā cāpi pratītārthāni syustathaināny ācakṣīrann iti santy alpaprayogāḥ kṛto apy aikapadikā yathā vratatirdamūnā jāṭya āṭṇāro jāgarūko darvihomīti
- 5
यथो एतन्निष्पन्ने ऽभिव्याहारे ऽभिविचारयन्तीति भवति हि निष्पन्ने ऽभिव्याहारे योगपरीष्टिः
yatho etanniṣpanne 'bhivyāhāre 'bhivicārayantīti bhavati hi niṣpanne 'bhivyāhāre yogaparīṣṭiḥ
- 6
प्रथनात्पृथिवीत्य् आहुः
prathanātpṛthivīty āhuḥ
- 7
क एनाम् अप्रथयिष्यत्किमाधारश्चेति
ka enām aprathayiṣyatkimādhāraśceti
- 8
अथ वै दर्शनेन पृथुः
atha vai darśanena pṛthuḥ
- 9
अप्रथिता चेद् अप्य् अन्यैः
aprathitā ced apy anyaiḥ
- 10
अथाप्य् एवं सर्व एव दृष्टप्रवादा उपालभ्यन्ते
athāpy evaṃ sarva eva dṛṣṭapravādā upālabhyante
- 11
यथो एतत्पदेभ्यः पदेतरार्धान्त्संचस्कारेति यो ऽनन्विते ऽर्थे संचस्कार स तेन गर्ह्यः
yatho etatpadebhyaḥ padetarārdhāntsaṃcaskāreti yo 'nanvite 'rthe saṃcaskāra sa tena garhyaḥ
- 12
सैषा पुरुषगर्हा न शास्त्रगर्हेति
saiṣā puruṣagarhā na śāstragarheti
- 13
यथो एतद् अपरस्माद्भावात्पूर्वस्य प्रदेशो नोपपद्यत इति पश्यामः पूर्वोत्पन्नानां सत्त्वानाम् अपरस्माद्भावान्नामधेयप्रतिलम्भम् एकेषां नैकेषां यथा बिल्वादो लम्बचूडक इति
yatho etad aparasmādbhāvātpūrvasya pradeśo nopapadyata iti paśyāmaḥ pūrvotpannānāṃ sattvānām aparasmādbhāvānnāmadheyapratilambham ekeṣāṃ naikeṣāṃ yathā bilvādo lambacūḍaka iti
- 14
बिल्वं भरणाद्वा भेदनाद्वा
bilvaṃ bharaṇādvā bhedanādvā

