259 shlokas
- 1
अथ वासवदत्ताया वत्सेशहृदयोत्सवः
संबभूवाचिराद्गर्भः कामांशावतरोज्ज्वलः
atha vāsavadattāyā vatseśahṛdayotsavaḥ
saṃbabhūvācirādgarbhaḥ kāmāṃśāvatarojjvalaḥ
- 2
सा बभौ लोलनेत्रेण मुखेनापाण्डुकान्तिना
शशाङ्केनेव गर्भस्थकामप्रेमोपगामिना
sā babhau lolanetreṇa mukhenāpāṇḍukāntinā
śaśāṅkeneva garbhasthakāmapremopagāminā
- 3
आसीनायाः पतिस्नेहाद्रतिप्रीती इवागते
रेजतुः प्रतिमे तस्या मणिपर्यङ्कपार्श्वयोः
āsīnāyāḥ patisnehādratiprītī ivāgate
rejatuḥ pratime tasyā maṇiparyaṅkapārśvayoḥ
- 4
भाविविद्याधराधीशगर्भसेवार्थम् इष्टदाः
मूर्ता विद्या इवायाताः सख्यस्तां पर्युपासत
bhāvividyādharādhīśagarbhasevārtham iṣṭadāḥ
mūrtā vidyā ivāyātāḥ sakhyastāṃ paryupāsata
- 5
विनीलपल्लवश्याममुखौ साथ पयोधरौ
सूनोर्गर्भाभिषेकाय बभार कलशाविव
vinīlapallavaśyāmamukhau sātha payodharau
sūnorgarbhābhiṣekāya babhāra kalaśāviva
- 6
स्वच्छस्फुरितसच्छायमणिकुट्टिमशोभिनः
सुखशय्यागता मध्ये मन्दिरस्य रराज सा
svacchasphuritasacchāyamaṇikuṭṭimaśobhinaḥ
sukhaśayyāgatā madhye mandirasya rarāja sā
- 7
भावितत्तनयाक्रान्तिशङ्काकम्पितवारिभिः
उपेत्य सेव्यमानेव समन्ताद्रत्नराशिभिः
bhāvitattanayākrāntiśaṅkākampitavāribhiḥ
upetya sevyamāneva samantādratnarāśibhiḥ
- 8
तस्या विमानमध्यस्थरत्नोत्था प्रतिमा बभौ
विद्याधरश्रीर्नभसा प्रणामार्थम् इवागता
tasyā vimānamadhyastharatnotthā pratimā babhau
vidyādharaśrīrnabhasā praṇāmārtham ivāgatā
- 9
मन्त्रसाधनसंनद्धसाधकेन्द्रकथासु च
बभूव सा दोहदिनी प्रसङ्गोपनतासु च
mantrasādhanasaṃnaddhasādhakendrakathāsu ca
babhūva sā dohadinī prasaṅgopanatāsu ca
- 10
सरसारब्धसंगीता विद्याधरवराङ्गनाः
स्वप्ने ताम् अम्बरोत्सङ्गम् आरूढाम् उपतस्थिरे
sarasārabdhasaṃgītā vidyādharavarāṅganāḥ
svapne tām ambarotsaṅgam ārūḍhām upatasthire
- 11
प्रबुद्धा सेवितुं साक्षात्तद् एवाभिललाष सा
नभःक्रीडाविलसितं लक्ष्यभूतलकौतुकम्
prabuddhā sevituṃ sākṣāttad evābhilalāṣa sā
nabhaḥkrīḍāvilasitaṃ lakṣyabhūtalakautukam
- 12
तं च दोहदम् एतस्या देव्या यौगन्धरायणः
यन्त्रमन्त्रेन्द्रजालादिप्रयोगैः समपूरयत्
taṃ ca dohadam etasyā devyā yaugandharāyaṇaḥ
yantramantrendrajālādiprayogaiḥ samapūrayat
- 13
विजहार च सा तैस्तैः प्रयोगैर्गगनस्थिता
पौरनारीजनोत्पक्ष्मलोचनाश्चर्यदायिभिः
vijahāra ca sā taistaiḥ prayogairgaganasthitā
pauranārījanotpakṣmalocanāścaryadāyibhiḥ
- 14
एकदा वासकस्थायास्तस्याश्च समजायत
हृदि विद्याधरोदारकथाश्रवणकौतुकम्
ekadā vāsakasthāyāstasyāśca samajāyata
hṛdi vidyādharodārakathāśravaṇakautukam
- 15
ततस्तयार्थितो देव्या तत्र यौगन्धरायणः
तस्याः सर्वेषु शृण्वत्सु निजगाद कथाम् इमाम्
tatastayārthito devyā tatra yaugandharāyaṇaḥ
tasyāḥ sarveṣu śṛṇvatsu nijagāda kathām imām
- 16
अस्त्यम्बिकाजनयिता नगेन्द्रो हिमवान् इति
न केवलं गिरीणां यो गुरुर्गौरीपतेर् अपि
astyambikājanayitā nagendro himavān iti
na kevalaṃ girīṇāṃ yo gururgaurīpater api
- 17
विद्याधरनिवासे च तस्मिन्विद्याधराधिपः
उवास राजा जीमूतकेतुर्नाम महाचले
vidyādharanivāse ca tasminvidyādharādhipaḥ
uvāsa rājā jīmūtaketurnāma mahācale
- 18
तस्याभूत्कल्पवृक्षश्च गृहे पितृक्रमागतः
नाम्नान्वर्थेन विख्यातो यो मनोरथदायकः
tasyābhūtkalpavṛkṣaśca gṛhe pitṛkramāgataḥ
nāmnānvarthena vikhyāto yo manorathadāyakaḥ
- 19
कदाचिच्च स जीमूतकेतू राजाभ्युपेत्य तम्
उद्याने देवतात्मानं कल्पद्रुमम् अयाचत
kadācicca sa jīmūtaketū rājābhyupetya tam
udyāne devatātmānaṃ kalpadrumam ayācata
- 20
सर्वदा प्राप्यते ऽस्माभिस्त्वत्तः सर्वम् अभीप्सितम्
तद् अपुत्राय मे देहि देव पुत्रं गुणान्वितम्
sarvadā prāpyate 'smābhistvattaḥ sarvam abhīpsitam
tad aputrāya me dehi deva putraṃ guṇānvitam
- 21
ततः कल्पद्रुमो ऽवादीद्राजन्न् उत्पत्स्यते तव
जातिस्मरो दानवीरः सर्वभूतहितः सुतः
tataḥ kalpadrumo 'vādīdrājann utpatsyate tava
jātismaro dānavīraḥ sarvabhūtahitaḥ sutaḥ
- 22
तच्छ्रुत्वा स प्रहृष्टः सन्कल्पवृक्षं प्रणम्य तम्
गत्वा निवेद्य तद्राजा निजां देवीम् अनन्दयत्
tacchrutvā sa prahṛṣṭaḥ sankalpavṛkṣaṃ praṇamya tam
gatvā nivedya tadrājā nijāṃ devīm anandayat
- 23
अथ तस्याचिराद् एव राज्ञः सूनुर् अजायत
जीमूतवाहनं तं च नाम्ना स विदधे पिता
atha tasyācirād eva rājñaḥ sūnur ajāyata
jīmūtavāhanaṃ taṃ ca nāmnā sa vidadhe pitā
- 24
ततः सहजया साकं सर्वभूतानुकम्पया
जगाम स महासत्त्वो वृद्धिं जीमूतवाहनः
tataḥ sahajayā sākaṃ sarvabhūtānukampayā
jagāma sa mahāsattvo vṛddhiṃ jīmūtavāhanaḥ
- 25
क्रमाच्च यौवराज्यस्थः परिचर्याप्रसादितम्
लोकानुकम्पी पितरं विजने स व्यजिज्ञपत्
kramācca yauvarājyasthaḥ paricaryāprasāditam
lokānukampī pitaraṃ vijane sa vyajijñapat
- 26
जानामि तात यद्भावा भवे ऽस्मिन्क्षणभङ्गुराः
स्थिरं तु महताम् एकम् आकल्पम् अमलं यशः
jānāmi tāta yadbhāvā bhave 'sminkṣaṇabhaṅgurāḥ
sthiraṃ tu mahatām ekam ākalpam amalaṃ yaśaḥ
- 27
परोपकृतिसम्भूतं तद् एव यदि हन्त तत्
किम् अन्यत्स्याद् उदाराणां धनं प्राणाधिकप्रियम्
paropakṛtisambhūtaṃ tad eva yadi hanta tat
kim anyatsyād udārāṇāṃ dhanaṃ prāṇādhikapriyam
- 28
संपच्च विद्युद् इव सा लोकलोचनखेदकृत्
लोला क्वापि लयं याति या परानुपकारिणी
saṃpacca vidyud iva sā lokalocanakhedakṛt
lolā kvāpi layaṃ yāti yā parānupakāriṇī
- 29
तद् एष कल्पविटपी कामदो यो ऽस्ति नः स चेत्
परार्थं विनियुज्येत तदाप्तं तत्फलं भवेत्
tad eṣa kalpaviṭapī kāmado yo 'sti naḥ sa cet
parārthaṃ viniyujyeta tadāptaṃ tatphalaṃ bhavet
- 30
तत्तथाहं करोमीह यथैतस्य समृद्धिभिः
अदरिद्रा भवत्येषा सर्वार्थिजनसंहतिः
tattathāhaṃ karomīha yathaitasya samṛddhibhiḥ
adaridrā bhavatyeṣā sarvārthijanasaṃhatiḥ

