27 shlokas
- 1
अथ ग्रहाणाम् आतिथ्यं बलिकर्मोपरुतं व्याख्यास्यामः
atha grahāṇām ātithyaṃ balikarmoparutaṃ vyākhyāsyāmaḥ
- 2
अश्रद्दधानम् अशुचिकरणम् अजाप्यं त्यक्तमङ्गलं
सुव्यक्तं ग्रहा नयन्ति पुरुषं यमसादनम्
ग्रहाणां दीप्रचेष्टानां नक्षत्रपथचारिणाम्
ग्रहातिथ्यं प्रवक्ष्यामि शान्तिकर्मणि कारयेत्
भास्कराङ्गारकौ रक्तौ श्वेतौ शुक्रनिशाकरौ
सोमपुत्रो गुरुश्चैव ताव् उभौ पीतकौ स्मृतौ
कृष्णं शनैश्चरं विद्याद्राहुं केतुं तथैव च
ग्रहवर्णानि पुष्पाणि प्राज्ञस्तत्रोपकल्पयेत्
गोमयेन गोचर्ममात्रं स्थण्डिलम् उपलिप्य प्रोक्ष्य लक्षणम् उल्लिख्याद्भिर् अभ्युक्ष्याग्निम् उपसमाधायाघाराव् आज्यभागौ हुत्वा ग्रहान् आवाहयन्त्य् आदित्यं मध्ये लोहितं पूर्वदक्षिणतः सोमम्
पूर्वोत्तरतो बुधम् उत्तरेण गुरुं पूर्वेण भार्गवम्
पश्चिमे शनैश्चरं विद्याद्राहुं दक्षिणपश्चिमे पश्चिमोत्तरतः केतुं वृत्तम् आदित्याय त्रिकोणम् अङ्गारकस्य चतुरश्रं सोमाय बाणं बुधाय दीर्घचतुरश्रं बृहस्पतये पञ्चकोणं शुक्राय धनुः शनैश्चराय राहोः शूर्पं केतोर्ध्वजम् इति ईश्वरं भास्करं विद्यात् उमां सोमं तथैव च
स्कन्दम् अङ्गारकं चैव बुधो नारायणं स्थितः
बृहस्पतिः स्वयं ब्रह्म शुक्रः शक्रस्तथैव च
यमं शनैश्चरं विद्याद्राहोः कालदूतिनः केतोश्चित्रगुप्तश्चेत्येते ग्रहदेवताः
aśraddadhānam aśucikaraṇam ajāpyaṃ tyaktamaṅgalaṃ
suvyaktaṃ grahā nayanti puruṣaṃ yamasādanam
grahāṇāṃ dīpraceṣṭānāṃ nakṣatrapathacāriṇām
grahātithyaṃ pravakṣyāmi śāntikarmaṇi kārayet
bhāskarāṅgārakau raktau śvetau śukraniśākarau
somaputro guruścaiva tāv ubhau pītakau smṛtau
kṛṣṇaṃ śanaiścaraṃ vidyādrāhuṃ ketuṃ tathaiva ca
grahavarṇāni puṣpāṇi prājñastatropakalpayet
gomayena gocarmamātraṃ sthaṇḍilam upalipya prokṣya lakṣaṇam ullikhyādbhir abhyukṣyāgnim upasamādhāyāghārāv ājyabhāgau hutvā grahān āvāhayanty ādityaṃ madhye lohitaṃ pūrvadakṣiṇataḥ somam
pūrvottarato budham uttareṇa guruṃ pūrveṇa bhārgavam
paścime śanaiścaraṃ vidyādrāhuṃ dakṣiṇapaścime paścimottarataḥ ketuṃ vṛttam ādityāya trikoṇam aṅgārakasya caturaśraṃ somāya bāṇaṃ budhāya dīrghacaturaśraṃ bṛhaspataye pañcakoṇaṃ śukrāya dhanuḥ śanaiścarāya rāhoḥ śūrpaṃ ketordhvajam iti īśvaraṃ bhāskaraṃ vidyāt umāṃ somaṃ tathaiva ca
skandam aṅgārakaṃ caiva budho nārāyaṇaṃ sthitaḥ
bṛhaspatiḥ svayaṃ brahma śukraḥ śakrastathaiva ca
yamaṃ śanaiścaraṃ vidyādrāhoḥ kāladūtinaḥ ketościtraguptaścetyete grahadevatāḥ
- 3
अग्निर् आपो भूमिर्विष्णुर् इन्द्राणी प्रजापतिः सर्पो ब्रह्मेत्य् एते प्रत्यधिदेवताः
agnir āpo bhūmirviṣṇur indrāṇī prajāpatiḥ sarpo brahmety ete pratyadhidevatāḥ
- 4
जातमर्क कलिङ्गेषु यामुनेषु च चन्द्रमाः
विन्ध्य अङ्गारकदेशो मध्यदेशो बुधः स्मृतः
बृहस्पतिः सिन्धुदेशः शुक्रदेशो घटेषु च
शनैश्चरस्तु सौराष्ट्रो राहुस्तु पूर्वदेशिकः केतुः पर्वत इत्य् एते देशानां ग्रहजात इति
jātamarka kaliṅgeṣu yāmuneṣu ca candramāḥ
vindhya aṅgārakadeśo madhyadeśo budhaḥ smṛtaḥ
bṛhaspatiḥ sindhudeśaḥ śukradeśo ghaṭeṣu ca
śanaiścarastu saurāṣṭro rāhustu pūrvadeśikaḥ ketuḥ parvata ity ete deśānāṃ grahajāta iti
- 5
अर्कसमिधम् आदित्याय प्रदेशमात्राभिघारितानाम्यादिभिर्जुहुयात्
arkasamidham ādityāya pradeśamātrābhighāritānāmyādibhirjuhuyāt
- 6
खादिरम् अङ्गारकाय पालाशं सोमायापामार्गं बुधायाश्वत्थं बृहस्पतय औदुम्बरं शुक्राय शमीं शनैश्चराय राहोर्दूर्वाः केतोः कुशाग्रम् इत्य् अष्टाविंशतिम् आज्याहुतीर्जुहोति
khādiram aṅgārakāya pālāśaṃ somāyāpāmārgaṃ budhāyāśvatthaṃ bṛhaspataya audumbaraṃ śukrāya śamīṃ śanaiścarāya rāhordūrvāḥ ketoḥ kuśāgram ity aṣṭāviṃśatim ājyāhutīrjuhoti
- 7
एताभिः पक्वाग्नेर्जुहोत्य् आदित्याय इलोदनं हविष्यम् अन्नम् अङ्गारकाय सोमाय घृतपायसं पयोदनं बृहस्पतये क्षीरोदनं शुक्राय दध्योदनं बुधाय तिलपिष्टमाषोदनं शनैश्चराय राहोर्मांसोदनं केतोश्चित्रोदनम् इति
etābhiḥ pakvāgnerjuhoty ādityāya ilodanaṃ haviṣyam annam aṅgārakāya somāya ghṛtapāyasaṃ payodanaṃ bṛhaspataye kṣīrodanaṃ śukrāya dadhyodanaṃ budhāya tilapiṣṭamāṣodanaṃ śanaiścarāya rāhormāṃsodanaṃ ketościtrodanam iti
- 8
आ सत्येनेत्य् आदित्याय अग्निर्मूर्धा दिव इत्य् अङ्गारकाय
ā satyenety ādityāya agnirmūrdhā diva ity aṅgārakāya
- 9
आप्यायस्व समेतु इति सोमाय
āpyāyasva sametu iti somāya
- 10
ब्रह्म जज्ञानम् इति बुधाय
brahma jajñānam iti budhāya
- 11
बृहस्पते अति यद् अर्य इति बृहस्पतये
bṛhaspate ati yad arya iti bṛhaspataye
- 12
अस्य प्रत्नाम् अनु द्युतम् इति शुक्राय
asya pratnām anu dyutam iti śukrāya
- 13
शं नो देवीर् अभिष्टय इति शनैश्चराय
śaṃ no devīr abhiṣṭaya iti śanaiścarāya
- 14
कया नश्चित्र आभुवद् इति राहोः
kayā naścitra ābhuvad iti rāhoḥ
- 15
केतुं कृण्वन्न् अकेतव इति केतोः
ketuṃ kṛṇvann aketava iti ketoḥ
- 16
रक्तां धेनुम् आदित्याय
raktāṃ dhenum ādityāya
- 17
रक्तम् अनड्वाहम् अङ्गारकाय
raktam anaḍvāham aṅgārakāya
- 18
सोमाय शङ्खम्
somāya śaṅkham
- 19
बुधाय काञ्चनम्
budhāya kāñcanam
- 20
बृहस्पतये वासः
bṛhaspataye vāsaḥ
- 21
शुक्राय हयं
śukrāya hayaṃ
- 22
नीलां गां शनैश्चराय
nīlāṃ gāṃ śanaiścarāya
- 23
राहोः कृष्णायसं
rāhoḥ kṛṣṇāyasaṃ
- 24
केतोः कुञ्जरम् इति
ketoḥ kuñjaram iti
- 25
सर्वेषाम् अपि हिरण्यं वा
sarveṣām api hiraṇyaṃ vā
- 26
येन वा तुष्यत्य् आचार्यस्तद्ददाति
yena vā tuṣyaty ācāryastaddadāti
- 27
यथा समुत्थितं यन्त्रं यन्त्रेण प्रतिहन्यते
तथा ग्रहोपस्पृष्टानां शान्तिर्भवति दारुणम्
नादिशेत्तपसा युक्तं नादिशेद्दिवमाश्रितम्
न च देवान्तकं विप्रं वृत्तान्तां नारीं परिवृताम्
अहिंसकस्य दान्तस्य धर्मजितधनस्य च
नित्यं च नियमस्थस्य सदानुग्रहा ग्रहाः
ग्रहा गावो नरेन्द्राश्च ब्राह्मणाश्च विशेषतः
पूजिताः पूजयन्त्य् एते निर्दहन्त्य् अवमानिताः
yathā samutthitaṃ yantraṃ yantreṇa pratihanyate
tathā grahopaspṛṣṭānāṃ śāntirbhavati dāruṇam
nādiśettapasā yuktaṃ nādiśeddivamāśritam
na ca devāntakaṃ vipraṃ vṛttāntāṃ nārīṃ parivṛtām
ahiṃsakasya dāntasya dharmajitadhanasya ca
nityaṃ ca niyamasthasya sadānugrahā grahāḥ
grahā gāvo narendrāśca brāhmaṇāśca viśeṣataḥ
pūjitāḥ pūjayanty ete nirdahanty avamānitāḥ

