32 shlokas
- 1
अथातो ऽनश्नत्संहितायाः कल्पं व्याख्यास्यामः
athāto 'naśnatsaṃhitāyāḥ kalpaṃ vyākhyāsyāmaḥ
- 2
शुचिवासाः स्याच्चीरवासा वा
śucivāsāḥ syāccīravāsā vā
- 3
हविष्यम् अन्नम् अशनम् इच्छेद् अपः फलानि वा
haviṣyam annam aśanam icched apaḥ phalāni vā
- 4
ब्राह्मणस्त्वेव प्रत्याहरेत्
brāhmaṇastveva pratyāharet
- 5
प्राङ्वोदङ्वा ग्रामान्निष्क्रम्य शुचौ देश उदकान्ते वा गोमयेन गोचर्ममात्रं स्थण्डिलम् उपलिप्य प्रोक्ष्य लक्षणम् उल्लिख्याद्भिर् अभ्युक्ष्याग्निम् उपसमाधायाघाराव् आज्यभागौ हुत्वाज्याहुतीर्जुहोत्य् अग्नये सोमाय रुद्रायेन्द्राय ब्रह्मणे प्रजापतये बृहस्पतये विश्वेभ्यो देवेभ्यो ऋषिभ्य ऋग्भ्यो यजुर्भ्यः सामभ्यः श्रद्धायै प्रज्ञायै मेधायै सावित्र्यै सदसस्पतये ऽनुमतये च
prāṅvodaṅvā grāmānniṣkramya śucau deśa udakānte vā gomayena gocarmamātraṃ sthaṇḍilam upalipya prokṣya lakṣaṇam ullikhyādbhir abhyukṣyāgnim upasamādhāyāghārāv ājyabhāgau hutvājyāhutīrjuhoty agnaye somāya rudrāyendrāya brahmaṇe prajāpataye bṛhaspataye viśvebhyo devebhyo ṛṣibhya ṛgbhyo yajurbhyaḥ sāmabhyaḥ śraddhāyai prajñāyai medhāyai sāvitryai sadasaspataye 'numataye ca
- 6
हुत्वा दर्भेष्व् आसीनः प्राक्तूलेषूदक्तूलेषु वा दक्षिणेन पाणिना दर्भान्धारयन्न् ॐपूर्वा व्याहृतीः सावित्रीं च चतुर् अनुद्रुत्य मनसा सामसावित्रीं च सोमं राजानं ब्रह्मजज्ञानीये चोभे वेदादिम् आरभेत
hutvā darbheṣv āsīnaḥ prāktūleṣūdaktūleṣu vā dakṣiṇena pāṇinā darbhāndhārayann oṃpūrvā vyāhṛtīḥ sāvitrīṃ ca catur anudrutya manasā sāmasāvitrīṃ ca somaṃ rājānaṃ brahmajajñānīye cobhe vedādim ārabheta
- 7
संततम् अधीयीत मौनी
saṃtatam adhīyīta maunī
- 8
न चान्तरा विरमेत्
na cāntarā viramet
- 9
अथान्तरा व्याहरेद् अथान्तरा विरमेत्
athāntarā vyāhared athāntarā viramet
- 10
त्रीन्प्राणान् आयम्यातम्याचम्य वृत्तान्ताद् एवारभेत
trīnprāṇān āyamyātamyācamya vṛttāntād evārabheta
- 11
अप्रतिभायां यावता कालेन वेदम् अधीयीत तावत्कालम् अधीयीत यज्जानीयाद् ऋक्तो यजुष्टः सामतस्तद् अवाप्नुयात्
apratibhāyāṃ yāvatā kālena vedam adhīyīta tāvatkālam adhīyīta yajjānīyād ṛkto yajuṣṭaḥ sāmatastad avāpnuyāt
- 12
तद्ब्राह्मणं तच्छान्दसं तद्दैवतं साम वा
tadbrāhmaṇaṃ tacchāndasaṃ taddaivataṃ sāma vā
- 13
अक्रान् इत्य् एतद् एव वाभ्यस्येत्
akrān ity etad eva vābhyasyet
- 14
तिष्ठन्न् आसीनः शयानश्चङ्क्रम्यमाणो वा संहितां प्रयुञ्ज्यात्
tiṣṭhann āsīnaḥ śayānaścaṅkramyamāṇo vā saṃhitāṃ prayuñjyāt
- 15
समृद्धिर् एवास्य भवति
samṛddhir evāsya bhavati
- 16
आद्यं त्रिवर्गं वा सहस्रकृत्व इति जैमिनिश्च
ādyaṃ trivargaṃ vā sahasrakṛtva iti jaiminiśca
- 17
वार्यमन्तं वा
vāryamantaṃ vā
- 18
यथाकामी वा
yathākāmī vā
- 19
द्वादश संहिता अधीत्य यद् अनेनानध्यायेष्व् अधीतं यद्गुरवः कोपिता यान्य् अकार्याणि कृतानि ताभिः पवते
dvādaśa saṃhitā adhītya yad anenānadhyāyeṣv adhītaṃ yadguravaḥ kopitā yāny akāryāṇi kṛtāni tābhiḥ pavate
- 20
शुद्धम् अस्य पूतं ब्रह्म भवति
śuddham asya pūtaṃ brahma bhavati
- 21
अथापरा द्वादश संहिता अधीत्य ताभिः प्रजापतेर्लोकम् अवाप्नोति
athāparā dvādaśa saṃhitā adhītya tābhiḥ prajāpaterlokam avāpnoti
- 22
अथापरा द्वादश संहिता अधीत्य ताभिर् उशनसो लोकम् अवाप्नोति
athāparā dvādaśa saṃhitā adhītya tābhir uśanaso lokam avāpnoti
- 23
अनश्नत्संहितासहस्रम् अधीत्य ब्रह्मभूतो विरजो भवति कामचारी सर्वान्कामान् अवाप्नोति
anaśnatsaṃhitāsahasram adhītya brahmabhūto virajo bhavati kāmacārī sarvānkāmān avāpnoti
- 24
संवत्सरं भैक्षभक्षः प्रयुञ्जानश्चक्षुर्लभते
saṃvatsaraṃ bhaikṣabhakṣaḥ prayuñjānaścakṣurlabhate
- 25
षण्मासान्यावकभक्षश्चतुरो मासान् उदकसक्तुभक्षो द्वौ मासौ फलभक्षो मासम् अब्भक्षो द्वादशरात्रं वानश्नन्क्षिप्रम् अन्तर्धीयते
ṣaṇmāsānyāvakabhakṣaścaturo māsān udakasaktubhakṣo dvau māsau phalabhakṣo māsam abbhakṣo dvādaśarātraṃ vānaśnankṣipram antardhīyate
- 26
ज्ञातीन्पुनाति
jñātīnpunāti
- 27
सप्तातीतान्सप्तानागतान् आत्मानं च पञ्चदशं तारयते
saptātītānsaptānāgatān ātmānaṃ ca pañcadaśaṃ tārayate
- 28
ताम् एतां देवनिश्रेणीत्य् आचक्षते
tām etāṃ devaniśreṇīty ācakṣate
- 29
एतया वै देवा देवत्वम् अगच्छन्न् ऋषय ऋषित्वम्
etayā vai devā devatvam agacchann ṛṣaya ṛṣitvam
- 30
तस्य ह वा एतस्य ब्रह्मसत्त्रस्य त्रिविध एवारम्भो भवति प्रातःसवने माध्यंदिने सवने ब्राह्मे वापररात्रे
tasya ha vā etasya brahmasattrasya trividha evārambho bhavati prātaḥsavane mādhyaṃdine savane brāhme vāpararātre

