12 shlokas
- 1
ऊर्ध्वम् आग्रहायण्यास्त्रयो ऽपरपक्षास्तेषाम् एकैकस्मिन्न् एकैकाष्टका भवति शाकाष्टका मांसाष्टकापूपाष्टकेति
ūrdhvam āgrahāyaṇyāstrayo 'parapakṣāsteṣām ekaikasminn ekaikāṣṭakā bhavati śākāṣṭakā māṃsāṣṭakāpūpāṣṭaketi
- 2
तत्र शाकमांसापूपानि हवींष्य् ओदनं च
tatra śākamāṃsāpūpāni havīṃṣy odanaṃ ca
- 3
तेषां हविषां स्थालीपाकावृताग्नौ जुहुयाद् अष्टकायै स्वाहा एकाष्टकायै स्वाहा अष्टकायै सुराधसे स्वाहा संवत्सराय परिवत्सरायेदावत्सरायेद्वत्सरायावत्सराय कृणुत नमोभिः
त्वया वयं सुमतौ यज्ञियानां ज्योग् अजीता अहताः स्याम स्वाहेति
teṣāṃ haviṣāṃ sthālīpākāvṛtāgnau juhuyād aṣṭakāyai svāhā ekāṣṭakāyai svāhā aṣṭakāyai surādhase svāhā saṃvatsarāya parivatsarāyedāvatsarāyedvatsarāyāvatsarāya kṛṇuta namobhiḥ
tvayā vayaṃ sumatau yajñiyānāṃ jyog ajītā ahatāḥ syāma svāheti
- 4
हुत्वोपतिष्ठत एहि भगैहि भगैहि भगेति
hutvopatiṣṭhata ehi bhagaihi bhagaihi bhageti
- 5
मध्यमायां गां कारयेत्
madhyamāyāṃ gāṃ kārayet
- 6
ताम् अष्टकायै प्रोक्षेत्
tām aṣṭakāyai prokṣet
- 7
तस्यास्त्रीणि सव्यान्य् उपोद्धरति पार्श्वम् अपघनीं श्रोणीम् इति
tasyāstrīṇi savyāny upoddharati pārśvam apaghanīṃ śroṇīm iti
- 8
श्वो भूते श्राद्धम् अन्वष्टक्यं तद् अहर्वा
śvo bhūte śrāddham anvaṣṭakyaṃ tad aharvā
- 9
ब्राह्मणान्हविरर्हान् उपवेश्य तांस्तर्पयित्वा तस्माद् अग्नेर्दक्षिणतः षडग्नीन्प्रणीय तेषाम् एकैकस्मिन्न् एकैकां कर्षूं खानयेद् आयामेन प्रादेशमात्रीं पार्थिवेन त्र्यङ्गुलाम् अवाग्वैकाङ्गुलाम् इति
brāhmaṇānhavirarhān upaveśya tāṃstarpayitvā tasmād agnerdakṣiṇataḥ ṣaḍagnīnpraṇīya teṣām ekaikasminn ekaikāṃ karṣūṃ khānayed āyāmena prādeśamātrīṃ pārthivena tryaṅgulām avāgvaikāṅgulām iti
- 10
तासु पिण्डान्निदधात्य् अनुनामापहस्तेन
tāsu piṇḍānnidadhāty anunāmāpahastena
- 11
मज्जाः पितृभ्य उपकर्षति पार्श्वानि स्त्रीणाम्
majjāḥ pitṛbhya upakarṣati pārśvāni strīṇām
- 12
तत्राध्वर्यवः केचिद् अधीयते मध्यमं पिण्डं पत्नी प्राश्नीयात्प्रजाकामस्य तथा श्राद्धस्य स्थालीपाकं वा
tatrādhvaryavaḥ kecid adhīyate madhyamaṃ piṇḍaṃ patnī prāśnīyātprajākāmasya tathā śrāddhasya sthālīpākaṃ vā

