24 shlokas
- 1
ऐन्द्रो वा एष यज्ञक्रतुर्यत्साकमेधाः
aindro vā eṣa yajñakraturyatsākamedhāḥ
- 2
तद्यथा महाराजः पुरस्तात्सेनानीकानि व्युह्याभयं पन्थानम् अन्वियाद् एवम् एवैतत्पुरस्ताद्देवता यजति
tadyathā mahārājaḥ purastātsenānīkāni vyuhyābhayaṃ panthānam anviyād evam evaitatpurastāddevatā yajati
- 3
तद्यथैवादः सोमस्य महाव्रतम् एवम् एवैतद् इष्टिमहाव्रतम्
tadyathaivādaḥ somasya mahāvratam evam evaitad iṣṭimahāvratam
- 4
अथ यद् अग्निम् अनीकवन्तं प्रथमं देवतानां यजत्य् अग्निर्वै देवानां मुखम्
atha yad agnim anīkavantaṃ prathamaṃ devatānāṃ yajaty agnirvai devānāṃ mukham
- 5
मुखत एव तद्देवान्प्रीणाति
mukhata eva taddevānprīṇāti
- 6
अथ यन्मध्यंदिने मरुतः सांतपनान्यजतीन्द्रो वै मरुतः सांतपनाः
atha yanmadhyaṃdine marutaḥ sāṃtapanānyajatīndro vai marutaḥ sāṃtapanāḥ
- 7
ऐन्द्रं माध्यंदिनम्
aindraṃ mādhyaṃdinam
- 8
तस्माद् एतान् इन्द्रेणोपसंहितान्यजति
tasmād etān indreṇopasaṃhitānyajati
- 9
अथ यत्सायं गृहमेधीयेन चरन्ति पुष्टिकर्म वै गृहमेधीयः
atha yatsāyaṃ gṛhamedhīyena caranti puṣṭikarma vai gṛhamedhīyaḥ
- 10
सायं पोषः पशूनाम्
sāyaṃ poṣaḥ paśūnām
- 11
तस्मात्सायं गृहमेधीयेन चरन्ति
tasmātsāyaṃ gṛhamedhīyena caranti
- 12
अथ यच्छ्वो भूते गृहमेधीयस्य निष्काशमिश्रेण पूर्णदर्वेण चरन्ति पूर्वेद्युः कर्मणैवैतत्प्रातःकर्मोपसंतन्वन्ति
atha yacchvo bhūte gṛhamedhīyasya niṣkāśamiśreṇa pūrṇadarveṇa caranti pūrvedyuḥ karmaṇaivaitatprātaḥkarmopasaṃtanvanti
- 13
अथ यत्प्रातर्मरुतः क्रीडिनो यजतीन्द्रो वै मरुतः क्रीडिनः
atha yatprātarmarutaḥ krīḍino yajatīndro vai marutaḥ krīḍinaḥ
- 14
तस्माद् एनान् इन्द्रेणोपसंहितान्यजति
tasmād enān indreṇopasaṃhitānyajati
- 15
अथ यद् अग्निं प्रणयन्ति यम् एवामुं वैश्वदेवे मन्थन्ति तम् एव तत्प्रणयन्ति
atha yad agniṃ praṇayanti yam evāmuṃ vaiśvadeve manthanti tam eva tatpraṇayanti
- 16
यन्मथ्यते तस्योक्तं ब्राह्मणम्
yanmathyate tasyoktaṃ brāhmaṇam
- 17
अथ यत्सप्तदश सामिधेन्यः सद्वन्ताव् आज्यभागौ विराजौ संयाज्ये तेषाम् उक्तं ब्राह्मणम्
atha yatsaptadaśa sāmidhenyaḥ sadvantāv ājyabhāgau virājau saṃyājye teṣām uktaṃ brāhmaṇam
- 18
अथ यन्नव प्रयाजा नवानुयाजा अष्टौ हवींषि समानानि त्व् एव षट्संचराणि हवींषि भवन्त्य् ऐन्द्राग्नान्तानि
atha yannava prayājā navānuyājā aṣṭau havīṃṣi samānāni tv eva ṣaṭsaṃcarāṇi havīṃṣi bhavanty aindrāgnāntāni
- 19
तेषाम् उक्तं ब्राह्मणम्
teṣām uktaṃ brāhmaṇam
- 20
अथ यन्महेन्द्रम् अन्ततो यजत्य् अन्तं वै श्रेष्ठी भजते
atha yanmahendram antato yajaty antaṃ vai śreṣṭhī bhajate
- 21
तस्माद् एनम् अन्ततो यजति
tasmād enam antato yajati
- 22
अथ यद्वैश्वकर्मण एककपालो ऽसौ वै विश्वकर्मा यो ऽसौ तपति
atha yadvaiśvakarmaṇa ekakapālo 'sau vai viśvakarmā yo 'sau tapati
- 23
एतम् एव तेन प्रीणाति
etam eva tena prīṇāti
- 24
अथ यद् ऋषभं ददात्य् ऐन्द्रो ह यज्ञक्रतुः
atha yad ṛṣabhaṃ dadāty aindro ha yajñakratuḥ

