28 shlokas
- 1
देवा वा ओषधीषु पक्वास्व् आजिम् अयुः
devā vā oṣadhīṣu pakvāsv ājim ayuḥ
- 2
स इन्द्रो ऽवेद् अग्निर्वावेमाः प्रथम उज्जेष्यतीति
sa indro 'ved agnirvāvemāḥ prathama ujjeṣyatīti
- 3
सो ऽब्रवीद्यतरो नौ पूर्व उज्जयात्तन्नौ सहेति
so 'bravīdyataro nau pūrva ujjayāttannau saheti
- 4
ता अग्निर् उदजयत्
tā agnir udajayat
- 5
तद् इन्द्रो ऽनूदजयत्
tad indro 'nūdajayat
- 6
स एष ऐन्द्राग्नः सन्न् आग्नेन्द्रः
sa eṣa aindrāgnaḥ sann āgnendraḥ
- 7
एका वै तर्हि यवस्य श्नुष्टिर् आसीद् एका व्रीहेर् एका माषस्यैका तिलस्य
ekā vai tarhi yavasya śnuṣṭir āsīd ekā vrīher ekā māṣasyaikā tilasya
- 8
तद्विश्वे देवा अब्रुवन्वयं वा एतत्प्रथयिष्यामो भागो नो ऽस्त्व् इति
tadviśve devā abruvanvayaṃ vā etatprathayiṣyāmo bhāgo no 'stv iti
- 9
तद्भूम एव वैश्वदेवः
tadbhūma eva vaiśvadevaḥ
- 10
अथो प्रथयत्य् एतेनैव
atho prathayaty etenaiva
- 11
पयसि स्याद्वैश्वदेवत्वाय
payasi syādvaiśvadevatvāya
- 12
वैश्वदेवं हि पयः
vaiśvadevaṃ hi payaḥ
- 13
अथेमाव् अब्रूतां न वा ऋत आवाभ्याम् एवैतद्यूयं प्रथयत मयि प्रतिष्ठितम् असौ वृष्ट्या पचति नैतदितो ऽभ्युज्जेष्यतीति
athemāv abrūtāṃ na vā ṛta āvābhyām evaitadyūyaṃ prathayata mayi pratiṣṭhitam asau vṛṣṭyā pacati naitadito 'bhyujjeṣyatīti
- 14
भागो नाव् अस्त्व् इति
bhāgo nāv astv iti
- 15
ताभ्यां वा एष भागः क्रियत उज्जित्या एव
tābhyāṃ vā eṣa bhāgaḥ kriyata ujjityā eva
- 16
अथो प्रतिष्ठित्या एव यो द्यावापृथिवीयः
atho pratiṣṭhityā eva yo dyāvāpṛthivīyaḥ
- 17
सौमीर्वा ओषधीः
saumīrvā oṣadhīḥ
- 18
सोम ओषधीनाम् अधिराजः
soma oṣadhīnām adhirājaḥ
- 19
याश्च ग्राम्या याश्चारण्यास्तासाम् एष उद्धारो यच्छ्यामाकः
yāśca grāmyā yāścāraṇyāstāsām eṣa uddhāro yacchyāmākaḥ
- 20
यच्छ्यामाकः सौम्यस्तम् एव भागिनं कृणुते
yacchyāmākaḥ saumyastam eva bhāginaṃ kṛṇute
- 21
यद् अकृत्वाग्रयणं नवस्याश्नीयाद्देवानां भागं प्रतिकॢप्तम् अद्यात्
yad akṛtvāgrayaṇaṃ navasyāśnīyāddevānāṃ bhāgaṃ pratikḷptam adyāt
- 22
संवत्सराद्वा एतद् अधिप्रजायते यद् आग्रयणम्
saṃvatsarādvā etad adhiprajāyate yad āgrayaṇam
- 23
संवत्सरं वै ब्रह्मा
saṃvatsaraṃ vai brahmā
- 24
तस्माद्ब्रह्मा पुरस्ताद्धोमसंस्थितहोमेष्व् आवपेत
tasmādbrahmā purastāddhomasaṃsthitahomeṣv āvapeta
- 25
एकहायनी दक्षिणा
ekahāyanī dakṣiṇā
- 26
स हि संवत्सरस्य प्रतिमा
sa hi saṃvatsarasya pratimā
- 27
रेत एव ह्य् एषो ऽप्रजातः
reta eva hy eṣo 'prajātaḥ
- 28
प्रजात्यै
prajātyai

