29 shlokas
- 1
अथैतद्धविरुच्छिष्टम् उदग् उद्वास्योद्धृत्य ब्रह्मणे प्रयच्छेत्
athaitaddhavirucchiṣṭam udag udvāsyoddhṛtya brahmaṇe prayacchet
- 2
तं तितर्पयिषेत्
taṃ titarpayiṣet
- 3
ब्राह्मणस्य तृप्तिम् अनुतृप्यामीति ह यज्ञस्य वेदयन्ते
brāhmaṇasya tṛptim anutṛpyāmīti ha yajñasya vedayante
- 4
अथ यद् अस्यान्यद् अन्नम् उपसिद्धं स्यात्
atha yad asyānyad annam upasiddhaṃ syāt
- 5
अथ ब्राह्मणान्भक्तेनोपेप्सेत्
atha brāhmaṇānbhaktenopepset
- 6
पूर्णपात्रो दक्षिणा तं ब्रह्मणे दद्यात्
pūrṇapātro dakṣiṇā taṃ brahmaṇe dadyāt
- 7
कंसं चमसं वान्नस्य पूरयित्वा कृतस्य वाकृतस्य वापि वा फलानाम् एवैतं पूर्णपात्रम् इत्य् आचक्षते
kaṃsaṃ camasaṃ vānnasya pūrayitvā kṛtasya vākṛtasya vāpi vā phalānām evaitaṃ pūrṇapātram ity ācakṣate
- 8
ब्रह्मैवैक ऋत्विक्
brahmaivaika ṛtvik
- 9
पाकयज्ञेषु स्वयं होता भवति
pākayajñeṣu svayaṃ hotā bhavati
- 10
पूर्णपात्रो ऽवमः पाकयज्ञानां दक्षिणा
pūrṇapātro 'vamaḥ pākayajñānāṃ dakṣiṇā
- 11
अपरिमितं परार्ध्यम्
aparimitaṃ parārdhyam
- 12
अपि ह सुदाः पैजवन ऐन्द्राग्नेन स्थालीपाकेनेष्ट्वा शतं सहस्राणि ददौ
api ha sudāḥ paijavana aindrāgnena sthālīpākeneṣṭvā śataṃ sahasrāṇi dadau
- 13
अथ यदि गृह्ये ऽग्नौ सायंप्रातर्होमयोर्वा दर्शपूर्णमासयोर्वा हव्यं वा होतारं वा नाधिगच्छेत्कथं कुर्याद् इति
atha yadi gṛhye 'gnau sāyaṃprātarhomayorvā darśapūrṇamāsayorvā havyaṃ vā hotāraṃ vā nādhigacchetkathaṃ kuryād iti
- 14
आ सायमाहुतेः प्रातराहुतिर्नात्येत्य् आ प्रातराहुतेः सायमाहुतिर् आमावास्यायाः पौर्णमासं नात्येत्य् आ पौर्णमास्या आमावास्यम्
ā sāyamāhuteḥ prātarāhutirnātyety ā prātarāhuteḥ sāyamāhutir āmāvāsyāyāḥ paurṇamāsaṃ nātyety ā paurṇamāsyā āmāvāsyam
- 15
एतेनैवावकाशेन हव्यं वा होतारं वा लिप्सेत
etenaivāvakāśena havyaṃ vā hotāraṃ vā lipseta
- 16
अपि वा यज्ञियानाम् एवौषधिवनस्पतीनां फलानि वा पलाशानि वा श्रपयित्वा जुहुयात्
api vā yajñiyānām evauṣadhivanaspatīnāṃ phalāni vā palāśāni vā śrapayitvā juhuyāt
- 17
अप्य् अप एवान्ततो जुहुयाद् इति ह स्माह पाकयज्ञ ऐडो हुतं ह्य् एव
apy apa evāntato juhuyād iti ha smāha pākayajña aiḍo hutaṃ hy eva
- 18
अहुतस्य प्रायश्चित्तं भवतीति
ahutasya prāyaścittaṃ bhavatīti
- 19
नाव्रतो ब्राह्मणः स्याद् इति
nāvrato brāhmaṇaḥ syād iti
- 20
अथाप्य् उदाहरन्ति
athāpy udāharanti
- 21
यावन्न हूयेताभोजनेनैव तावत्संतनुयात्
yāvanna hūyetābhojanenaiva tāvatsaṃtanuyāt
- 22
अथ यदाधिगच्छेत्प्रतिजुहुयात्
atha yadādhigacchetpratijuhuyāt
- 23
एवम् अप्य् अस्य व्रतं संततं भवतीति
evam apy asya vrataṃ saṃtataṃ bhavatīti
- 24
एषो ऽत ऊर्ध्वं हविराहुतिषु न्यायः
eṣo 'ta ūrdhvaṃ havirāhutiṣu nyāyaḥ
- 25
मन्त्रान्ते स्वाहाकारः
mantrānte svāhākāraḥ
- 26
आज्याहुतिष्व् आज्यम् एव संस्कृत्योपघातं जुहुयान्नाज्यभागौ न स्विष्टकृत्
ājyāhutiṣv ājyam eva saṃskṛtyopaghātaṃ juhuyānnājyabhāgau na sviṣṭakṛt
- 27
आज्याहुतिष्व् अनादेशे पुरस्ताच्चोपरिष्टाच्च महाव्याहृतिभिर्होमः
ājyāhutiṣv anādeśe purastāccopariṣṭācca mahāvyāhṛtibhirhomaḥ
- 28
यथा पाणिग्रहणे तथा चूडाकर्मण्य् उपनयने गोदाने
yathā pāṇigrahaṇe tathā cūḍākarmaṇy upanayane godāne
- 29
अपवृत्ते कर्मणि वामदेव्यगानं शान्त्यर्थं शान्त्यर्थम्
apavṛtte karmaṇi vāmadevyagānaṃ śāntyarthaṃ śāntyartham

