27 shlokas
- 1
आहवनीयं गत्वायं सहोहा इति त्रिर् उद्गाता गायेत्
āhavanīyaṃ gatvāyaṃ sahohā iti trir udgātā gāyet
- 2
निधनम् इतरावनूपेयाताम्
nidhanam itarāvanūpeyātām
- 3
अभिदक्षिणम् आवृत्य पूर्वया द्वारा सदः प्रविशेयुः
abhidakṣiṇam āvṛtya pūrvayā dvārā sadaḥ praviśeyuḥ
- 4
यदाध्वर्युर् उपाकुर्यात्तदा मानसेन स्तुवीरन्
yadādhvaryur upākuryāttadā mānasena stuvīran
- 5
आयं गौः पृश्निर् अक्रमीदिति गायत्रेण
āyaṃ gauḥ pṛśnir akramīditi gāyatreṇa
- 6
पृथक्स्तोत्रीयाभ्यो हिंकारम्
pṛthakstotrīyābhyo hiṃkāram
- 7
त्रिकेण स्तोमेनास्तोमयोगायजमानवाचनाकुशाविधानेन
trikeṇa stomenāstomayogāyajamānavācanākuśāvidhānena
- 8
प्रतिहारवेलायां प्रतिहर्तापान्यात्
pratihāravelāyāṃ pratihartāpānyāt
- 9
उत्तमां प्रस्तुत्यैषेति होतारम् ईक्षेत
uttamāṃ prastutyaiṣeti hotāram īkṣeta
- 10
सर्वमेतस्मिन्स्तोत्रे मनसा कुर्युः समीक्षणेन विज्ञापयन्तः
sarvametasminstotre manasā kuryuḥ samīkṣaṇena vijñāpayantaḥ
- 11
यम् अध्वर्युर्भक्षं प्रयच्छन्मन्येत तस्य मनसोपहूय कस्त्वा कं भक्षयामीति भक्षयेयुः
yam adhvaryurbhakṣaṃ prayacchanmanyeta tasya manasopahūya kastvā kaṃ bhakṣayāmīti bhakṣayeyuḥ
- 12
ब्रह्मोद्यं वदन्तीति
brahmodyaṃ vadantīti
- 13
गायत्रीं त्रिर्ब्रूयुर् इति धानंजय्यः
gāyatrīṃ trirbrūyur iti dhānaṃjayyaḥ
- 14
चतुर्होतारम् अभिप्रेत्यैतद् इति गौतमः
caturhotāram abhipretyaitad iti gautamaḥ
- 15
तर्के वा कथयेयुर्यथाश्वत्रिरात्र इति शाण्डिल्यः
tarke vā kathayeyuryathāśvatrirātra iti śāṇḍilyaḥ
- 16
प्रजापतिं परिवदन्ति
prajāpatiṃ parivadanti
- 17
पापैः कर्मभिर् इत्य् एके न त्वधीमहे
pāpaiḥ karmabhir ity eke na tvadhīmahe
- 18
अपि वाध्वर्युबह्वृचानां किंचित्स्यात्
api vādhvaryubahvṛcānāṃ kiṃcitsyāt
- 19
एतस्यां वेलायां वरान्वृणीरन्मनसा यानिच्छेयुः
etasyāṃ velāyāṃ varānvṛṇīranmanasā yāniccheyuḥ
- 20
अभयं धानंजय्यः सर्वकामान् अपराधात्
abhayaṃ dhānaṃjayyaḥ sarvakāmān aparādhāt
- 21
उत्तरत उद्गातौदुम्बरीं गृह्णीयात्पश्चात्प्रतिहर्ता दक्षिणतो ब्रह्मा पुरस्तादितरे सर्वे
uttarata udgātaudumbarīṃ gṛhṇīyātpaścātpratihartā dakṣiṇato brahmā purastāditare sarve
- 22
अथ जपेयुर् इह धृतिर् इह स्वधृतिर् इह रन्तिर् इह रमध्वं मयि धृतिर्मयि स्वधृतिर्मयि रमो मयि रमध्वमिति वोभौ वा
atha japeyur iha dhṛtir iha svadhṛtir iha rantir iha ramadhvaṃ mayi dhṛtirmayi svadhṛtirmayi ramo mayi ramadhvamiti vobhau vā
- 23
वाग्यता अपिधाय द्वारे आसीरन्न् आ नक्षत्रप्रवचनात्
vāgyatā apidhāya dvāre āsīrann ā nakṣatrapravacanāt
- 24
प्रोक्ते नक्षत्रे पूर्वया द्वारोपनिष्क्रम्य सुब्रह्मण्याप्रणवैर्वाचं विसृजेरन्निति धानंजय्यः
prokte nakṣatre pūrvayā dvāropaniṣkramya subrahmaṇyāpraṇavairvācaṃ visṛjeranniti dhānaṃjayyaḥ
- 25
श्रुत्वैवाहूयमानाया इति शाण्डिल्यः
śrutvaivāhūyamānāyā iti śāṇḍilyaḥ
- 26
वरवरणवाग्यमने यजमान एव कुर्याद् अहीनेषु
varavaraṇavāgyamane yajamāna eva kuryād ahīneṣu
- 27
कृत्वेतरे यथार्थं कृत्वेतरे यथार्थम्
kṛtvetare yathārthaṃ kṛtvetare yathārtham

