15 shlokas
- 1
आहिताग्निर् असोमयाजी परं सोमेन याजयित्वा परिभक्षं कुर्वीत
āhitāgnir asomayājī paraṃ somena yājayitvā paribhakṣaṃ kurvīta
- 2
सोमयाज्यपीति शाण्डिल्यः
somayājyapīti śāṇḍilyaḥ
- 3
हुतायां प्रातराहुतावाज्यं गार्हपत्ये ऽधिश्रित्योदग् उद्वासयेत्
hutāyāṃ prātarāhutāvājyaṃ gārhapatye 'dhiśrityodag udvāsayet
- 4
कंसे चमसे वा द्रप्सान् अवधाय दक्षिणाग्नावुपसादयेत्
kaṃse camase vā drapsān avadhāya dakṣiṇāgnāvupasādayet
- 5
स्फ्यदर्भमुष्टी च
sphyadarbhamuṣṭī ca
- 6
पश्चिमेन गार्हपत्यं गत्वा पश्चाद् आहवनीयस्योपविश्य स्रुवेण स्रुच्याज्यं गृह्णीयाद्यावद्गृहीती स्यात्
paścimena gārhapatyaṃ gatvā paścād āhavanīyasyopaviśya sruveṇa srucyājyaṃ gṛhṇīyādyāvadgṛhītī syāt
- 7
तज्जुहुयात्
इमाम् अग्ने शरणिं मीमृषो न इममध्वानं यमगाम दूरात्
आपिः पिता प्रमतिः सोम्यानां भूमिर् अस्य् ऋषिकृन्मर्त्यानां स्वाहेति
tajjuhuyāt
imām agne śaraṇiṃ mīmṛṣo na imamadhvānaṃ yamagāma dūrāt
āpiḥ pitā pramatiḥ somyānāṃ bhūmir asy ṛṣikṛnmartyānāṃ svāheti
- 8
एवमेव गृहीत्वापां पुष्पम् अस्योषधीनां रसो ऽग्नेः प्रियतमा तनूर् इन्द्रस्य प्रियतमं हविः स्वाहेति
evameva gṛhītvāpāṃ puṣpam asyoṣadhīnāṃ raso 'gneḥ priyatamā tanūr indrasya priyatamaṃ haviḥ svāheti
- 9
आज्यस्य पूर्वान्ग्रहान्गृहीत्वा दध्न उत्तमं विश्वेभ्यो देवेभ्यः स्वाहेति
ājyasya pūrvāngrahāngṛhītvā dadhna uttamaṃ viśvebhyo devebhyaḥ svāheti
- 10
दधिशेषं स्रुच्यानीयोदङ्ङावृत्य प्राश्नीयात्तव सोमव्रते वयं मनस्तनूषु पिप्रतः प्रजावन्तो अशीमहीति
dadhiśeṣaṃ srucyānīyodaṅṅāvṛtya prāśnīyāttava somavrate vayaṃ manastanūṣu piprataḥ prajāvanto aśīmahīti
- 11
प्रक्षाल्य स्रुचं यथेतं प्रत्याव्रज्य प्राचीनावीती भूत्वाप उपस्पृश्य दक्षिणाग्नेः स्थण्डिलं समूह्याद्भिः सम्प्रोक्ष्य स्फ्येन सकृद् उल्लिख्योल्मुकम् उपनिधाय दर्भान् उपस्तीर्याप उपनिनीयामीषां द्रप्सानां निपृणुयाद् अवमेभ्यः पितृभ्यः स्वधा सहभक्षेभ्य इति प्रथमम्
prakṣālya srucaṃ yathetaṃ pratyāvrajya prācīnāvītī bhūtvāpa upaspṛśya dakṣiṇāgneḥ sthaṇḍilaṃ samūhyādbhiḥ samprokṣya sphyena sakṛd ullikhyolmukam upanidhāya darbhān upastīryāpa upaninīyāmīṣāṃ drapsānāṃ nipṛṇuyād avamebhyaḥ pitṛbhyaḥ svadhā sahabhakṣebhya iti prathamam
- 12
और्वेभ्यः काव्येभ्य इत्य् एवमेव दक्षिणा पृथक्
aurvebhyaḥ kāvyebhya ity evameva dakṣiṇā pṛthak
- 13
अत्र पितरो मादयध्वं यथाभागम् आवृषायध्वम् इत्य् उक्त्वोदङ्ङावृत्यासित्वा यावन्मन्येत तावत्
atra pitaro mādayadhvaṃ yathābhāgam āvṛṣāyadhvam ity uktvodaṅṅāvṛtyāsitvā yāvanmanyeta tāvat
- 14
अभिपर्यावर्तमानो जपेद् अमीमदन्त पितरो यथाभागम् अनन्तरिताः पितरः सोमपीथादिति
abhiparyāvartamāno japed amīmadanta pitaro yathābhāgam anantaritāḥ pitaraḥ somapīthāditi
- 15
तान्दर्भान्द्रप्सांश्च दक्षिणाग्नौ प्रहरेत्
tāndarbhāndrapsāṃśca dakṣiṇāgnau praharet

