19 shlokas
- 1
वपायां हुतायां धिष्ण्यान् उपतिष्ठेरन्
vapāyāṃ hutāyāṃ dhiṣṇyān upatiṣṭheran
- 2
चात्वाले तु मार्जनं पूर्वं सत्रेष्व् इदम् आपः प्रवहतावद्यं च मलं च यद्यच्चाभिदुद्रोहानृतं यच्च शेपे अभीरुणम् आपो मा तस्मादेनसो दुरितात्पान्तु विश्वतो निर्मा मुञ्चामि शपथान्निर्मा वरुणाद् उत निर्मा यमस्य षड्विंशात्सर्वस्माद् एव किल्बिषात्सुमित्रिया न आप ओषधयः सन्तु दुर्मित्रियास्तस्मै सन्तु यो ऽस्मान्द्वेष्टि यं च वयं द्विष्मः इति
cātvāle tu mārjanaṃ pūrvaṃ satreṣv idam āpaḥ pravahatāvadyaṃ ca malaṃ ca yadyaccābhidudrohānṛtaṃ yacca śepe abhīruṇam āpo mā tasmādenaso duritātpāntu viśvato nirmā muñcāmi śapathānnirmā varuṇād uta nirmā yamasya ṣaḍviṃśātsarvasmād eva kilbiṣātsumitriyā na āpa oṣadhayaḥ santu durmitriyāstasmai santu yo 'smāndveṣṭi yaṃ ca vayaṃ dviṣmaḥ iti
- 3
सम्राडसीत्याहवनीयमुपस्थायोदञ्चो गत्वास्तावचात्वालशामित्रान् उदङ्मुखास्तुथो नभः संमृष्ट इति
samrāḍasītyāhavanīyamupasthāyodañco gatvāstāvacātvālaśāmitrān udaṅmukhāstutho nabhaḥ saṃmṛṣṭa iti
- 4
विभुर् असीत्य् आग्नीध्रीयम् उपतिष्ठेरन्
vibhur asīty āgnīdhrīyam upatiṣṭheran
- 5
तमुत्तरेण संचरः सर्वत्र
tamuttareṇa saṃcaraḥ sarvatra
- 6
दक्षिणेनोत्तरयोः सवनयोर्यदा हविर्धानम् आहवनीयं च पृष्ठहोमाय
dakṣiṇenottarayoḥ savanayoryadā havirdhānam āhavanīyaṃ ca pṛṣṭhahomāya
- 7
पूर्वस्यां सदसो द्वारि प्रत्यङ्मुखास्तिष्ठन्तो वह्निरिति होतुर्धिष्ण्यम्
pūrvasyāṃ sadaso dvāri pratyaṅmukhāstiṣṭhanto vahniriti hoturdhiṣṇyam
- 8
श्वात्र इति मैत्रावरुणस्य
śvātra iti maitrāvaruṇasya
- 9
तुथ उशिग् अङ्घारिर् अवस्युर् इति ब्राह्मणाच्छंसिप्रभृतीनामुदञ्चः
tutha uśig aṅghārir avasyur iti brāhmaṇācchaṃsiprabhṛtīnāmudañcaḥ
- 10
शुन्ध्युर् इति मार्जालीयं तत्रैव तिष्ठन्तः
śundhyur iti mārjālīyaṃ tatraiva tiṣṭhantaḥ
- 11
ऋतधामेत्यौदुम्बरीम्
ṛtadhāmetyaudumbarīm
- 12
समुद्र इति ब्रह्मणः सदनम्
samudra iti brahmaṇaḥ sadanam
- 13
उत्तरेण सदो गत्वान्तर्वेदि प्रत्यङ्मुखास्तिष्ठन्तो ऽहिर् इति प्राजहितम्
uttareṇa sado gatvāntarvedi pratyaṅmukhāstiṣṭhanto 'hir iti prājahitam
- 14
अज इति गार्हपत्यम्
aja iti gārhapatyam
- 15
सगरा इति दक्षिणाग्नेरायतनम्
sagarā iti dakṣiṇāgnerāyatanam
- 16
कव्य इति दक्षिणं वेद्यन्तम्
kavya iti dakṣiṇaṃ vedyantam
- 17
तत्रैव तिष्ठन्तः सर्वान्समन्वीक्षमाणः पात मेति
tatraiva tiṣṭhantaḥ sarvānsamanvīkṣamāṇaḥ pāta meti
- 18
एकैकम् उपस्थायैतद्ब्रूयुर् इति शाण्डिल्यः
ekaikam upasthāyaitadbrūyur iti śāṇḍilyaḥ
- 19
बहुशब्दानेकवत्कुर्वन्तः
bahuśabdānekavatkurvantaḥ

