23 shlokas
- 1
स्तोमयोगे ऽग्निर्युनक्त्वित्येतस्य स्थाने वायुर्युनक्तु सूर्यो युनक्त्विति नानासवनयोः
stomayoge 'gniryunaktvityetasya sthāne vāyuryunaktu sūryo yunaktviti nānāsavanayoḥ
- 2
विहारं धानंजय्यः
vihāraṃ dhānaṃjayyaḥ
- 3
अग्नेस्तेजसा बृहस्पतिस्त्वेति प्रातःसवन इन्द्रियस्येन्द्रियेण बृहस्पतिस्त्वेति माध्यंदिने सूर्यस्य वर्चसेति तृतीयसवने
agnestejasā bṛhaspatistveti prātaḥsavana indriyasyendriyeṇa bṛhaspatistveti mādhyaṃdine sūryasya varcaseti tṛtīyasavane
- 4
सर्वैर् एकैकं यथाम्नायं शाण्डिल्यः
sarvair ekaikaṃ yathāmnāyaṃ śāṇḍilyaḥ
- 5
साम्ने साम्ने हिंकुर्युः
sāmne sāmne hiṃkuryuḥ
- 6
वृषको ऽसि स्वरो ऽसीति यजमानवाचने
vṛṣako 'si svaro 'sīti yajamānavācane
- 7
स्तुत्वा बहिष्पवमानेन प्रस्तरादुभयतश्चतुरङ्गुलं परिच्छिद्य तृणं चात्वाले प्रविध्येद्यदि स्तुतं यदि वाद्य सुष्टुतम् अर्वाक्स्तुतं यदि वातिष्टुतं यत्तयोरन्येन दिवमारुहेमेममन्येन जयेम लोकमिति
stutvā bahiṣpavamānena prastarādubhayataścaturaṅgulaṃ paricchidya tṛṇaṃ cātvāle pravidhyedyadi stutaṃ yadi vādya suṣṭutam arvākstutaṃ yadi vātiṣṭutaṃ yattayoranyena divamāruhememamanyena jayema lokamiti
- 8
तत्रैवोदपात्रं निनयेत्समुद्रं वः प्रहिणोमि स्वां योनिमपि गच्छतारिष्टास्तन्वा भूयास्म मा परासेचि नो धनमिति
tatraivodapātraṃ ninayetsamudraṃ vaḥ prahiṇomi svāṃ yonimapi gacchatāriṣṭāstanvā bhūyāsma mā parāseci no dhanamiti
- 9
बहिर्वेद्युदञ्चो ऽयुञ्जि पदान्युत्क्रामेयुः प्राग्दशभ्यः
bahirvedyudañco 'yuñji padānyutkrāmeyuḥ prāgdaśabhyaḥ
- 10
अभिदक्षिणम् आवृत्याव्रज्याग्नीध्रीयं बहिष्पवमानर्चो ऽधीयीरन्
abhidakṣiṇam āvṛtyāvrajyāgnīdhrīyaṃ bahiṣpavamānarco 'dhīyīran
- 11
अनुव्याहार्षीन्मामिति यम् अतिशङ्केत तस्मा आग्नीध्रीय आहुतिवर्जं प्रहरेद्यज्ञ शं च त उप च ते नमश्च ते सत्यो ऽसि सत्यसंस्कृतस्तस्य ते य ऊनं यो ऽकृतं यो ऽतिरिक्तमदर्शं तस्य प्राणेनाप्यायस्व स्वाहेति
anuvyāhārṣīnmāmiti yam atiśaṅketa tasmā āgnīdhrīya āhutivarjaṃ praharedyajña śaṃ ca ta upa ca te namaśca te satyo 'si satyasaṃskṛtastasya te ya ūnaṃ yo 'kṛtaṃ yo 'tiriktamadarśaṃ tasya prāṇenāpyāyasva svāheti
- 12
न व्यभिचरेदिति धानंजय्यः
na vyabhicarediti dhānaṃjayyaḥ
- 13
अहीनबहिष्पवमानैः सदसि स्तुवीरन्प्रथमाद् अह्नो ऽन्यत्र
ahīnabahiṣpavamānaiḥ sadasi stuvīranprathamād ahno 'nyatra
- 14
आद्यन्तयोश्च सत्रेषु
ādyantayośca satreṣu
- 15
प्राग्धिष्ण्यविहरणान्निष्क्रम्य तृणप्रासनप्रभृति समापयेयुः
prāgdhiṣṇyaviharaṇānniṣkramya tṛṇaprāsanaprabhṛti samāpayeyuḥ
- 16
वैदत्रिरात्रे सत्रन्यायं गौतमः
vaidatrirātre satranyāyaṃ gautamaḥ
- 17
अहीनन्यायं धानंजय्यः
ahīnanyāyaṃ dhānaṃjayyaḥ
- 18
मन्द्रं प्रातःसवने स्तुवीरन्
mandraṃ prātaḥsavane stuvīran
- 19
उत्तरोत्तर्युत्तरयोः सवनयोः
uttarottaryuttarayoḥ savanayoḥ
- 20
समेन वोभयोः
samena vobhayoḥ
- 21
एतस्यां वेलायां प्राश्नीयुः
etasyāṃ velāyāṃ prāśnīyuḥ
- 22
अनुसवनं तु सत्रेषु
anusavanaṃ tu satreṣu
- 23
सवनमुखीयान्भक्षयित्वा सन्नेषु नाराशंसेषु
savanamukhīyānbhakṣayitvā sanneṣu nārāśaṃseṣu

