24 shlokas
- 1
यूपम् उच्छ्रीयमाणम् अनुमन्त्रयेरन्नृमण ऊर्ध्वभरसं त्वेति
yūpam ucchrīyamāṇam anumantrayerannṛmaṇa ūrdhvabharasaṃ tveti
- 2
एतान्येवोहस्थानानि यावन्तः स्युः
etānyevohasthānāni yāvantaḥ syuḥ
- 3
यत्र तिष्ठन्त उच्छ्रीयमाणं पश्येयुरिति शाण्डिल्यः
yatra tiṣṭhanta ucchrīyamāṇaṃ paśyeyuriti śāṇḍilyaḥ
- 4
अन्तर्वेद्येवेति धानंजय्यः
antarvedyeveti dhānaṃjayyaḥ
- 5
न बहिर्वेदि यजुर् अवकल्पत इति
na bahirvedi yajur avakalpata iti
- 6
विश्वरूपाणां गानं ज्योतिष्टोमे यजमानेनोक्तः प्रत्याचक्षीत चतुष्टोमस्तोमसंपदतिरेकाद्ग्रहशस्त्राभावाच्च
viśvarūpāṇāṃ gānaṃ jyotiṣṭome yajamānenoktaḥ pratyācakṣīta catuṣṭomastomasaṃpadatirekādgrahaśastrābhāvācca
- 7
वसतीवर्यो ग्रहः प्रातरनुवाकः शस्त्रमासां न च संपत्कोपो यथान्यैः परिसामभिर्गायैवेति चेद्ब्रूयात्
vasatīvaryo grahaḥ prātaranuvākaḥ śastramāsāṃ na ca saṃpatkopo yathānyaiḥ parisāmabhirgāyaiveti cedbrūyāt
- 8
न माम् अनामन्त्र्य प्रातरनुवाकमुपाकुर्यादित्यध्वर्युं ब्रूयात्
na mām anāmantrya prātaranuvākamupākuryādityadhvaryuṃ brūyāt
- 9
होतारं प्रातरनुवाकायोपविष्टं पूर्वेण गत्वा यजमानश्च पूर्वया द्वारा प्रपद्यान्तरेण हविर्धानं पूर्वेण चक्रे उदङ्मुख उपविशेत्तूष्णीम्
hotāraṃ prātaranuvākāyopaviṣṭaṃ pūrveṇa gatvā yajamānaśca pūrvayā dvārā prapadyāntareṇa havirdhānaṃ pūrveṇa cakre udaṅmukha upaviśettūṣṇīm
- 10
पुरस्ताद्यजमानः प्रत्यङ्मुखः
purastādyajamānaḥ pratyaṅmukhaḥ
- 11
युञ्जे वाचं शतपदीं गायेत्सहस्रवर्तनि गायत्रं त्रैष्टुभं जगद्विश्वा रूपाणि संभृता देवा ओकांसि चक्रिर इत्येतस्यां पङ्क्तौ त्रिर्गायत्रं गायेदिति धानंजय्यः स्वाध्यायस्वरेण
yuñje vācaṃ śatapadīṃ gāyetsahasravartani gāyatraṃ traiṣṭubhaṃ jagadviśvā rūpāṇi saṃbhṛtā devā okāṃsi cakrira ityetasyāṃ paṅktau trirgāyatraṃ gāyediti dhānaṃjayyaḥ svādhyāyasvareṇa
- 12
मनसैव यजमान उपस्वरेत्
manasaiva yajamāna upasvaret
- 13
त्रिषु त्रिषु पादेषु गायेदिति गौतमः
triṣu triṣu pādeṣu gāyediti gautamaḥ
- 14
पूर्वं पूर्वमतिसृजन्गायत्रीकारम्
pūrvaṃ pūrvamatisṛjangāyatrīkāram
- 15
प्रगाथकारं वा
pragāthakāraṃ vā
- 16
गीत्वा यथार्थं स्यात्
gītvā yathārthaṃ syāt
- 17
विश्वरूपाश्चेद्गायेज्ज्योतींष्य् अपि गायेत्
viśvarūpāścedgāyejjyotīṃṣy api gāyet
- 18
परिहिते प्रातरनुवाके ऽपोनप्त्रीयं नाम सूक्तं पुरा तस्माद्धोतारम् आरमेत्य् उक्त्वा
parihite prātaranuvāke 'ponaptrīyaṃ nāma sūktaṃ purā tasmāddhotāram āramety uktvā
- 19
आग्रयणस्य वानु हिंकारं पवित्रं धारयन्
āgrayaṇasya vānu hiṃkāraṃ pavitraṃ dhārayan
- 20
आस्तावं वा प्राप्य स्तोमयोगात्
āstāvaṃ vā prāpya stomayogāt
- 21
अग्निर्ज्योतिर्ज्योतिर् अग्निर् इन्द्रो ज्योतिर्ज्योतिर् इन्द्रः सूर्यो ज्योतिर्ज्योतिः सूर्य इत्येतेषु पादेषु त्रिस्त्रिर् एकैकम् अभ्यासं मनसा गायत्रं गायेत्
agnirjyotirjyotir agnir indro jyotirjyotir indraḥ sūryo jyotirjyotiḥ sūrya ityeteṣu pādeṣu tristrir ekaikam abhyāsaṃ manasā gāyatraṃ gāyet
- 22
तानि नान्यत्र विश्वरूपाभ्यः
tāni nānyatra viśvarūpābhyaḥ
- 23
नान्यत्र विश्वरूपा ज्योतिष्टोमात्
nānyatra viśvarūpā jyotiṣṭomāt
- 24
सहचराणि ह्येतानि विश्वरूपाश्च ज्योतींषि च ज्योतींषि च
sahacarāṇi hyetāni viśvarūpāśca jyotīṃṣi ca jyotīṃṣi ca

