29 shlokas
- 1
सर्वत्रानादेशे परिसामानि प्रस्तोता गायेत्स्वाध्यायवत्स्वासु
sarvatrānādeśe parisāmāni prastotā gāyetsvādhyāyavatsvāsu
- 2
तृचापत्तीनि तृचेषु त्रिरितराणि
tṛcāpattīni tṛceṣu triritarāṇi
- 3
शार्ङ्गारूढवद् आङ्गिरसे वा त्रिर् अभ्यस्येद् अन्तरा पराचा
śārṅgārūḍhavad āṅgirase vā trir abhyasyed antarā parācā
- 4
तथा च होता
tathā ca hotā
- 5
लिङ्गोपपत्तिश्चैवम्
liṅgopapattiścaivam
- 6
अन्तरेण चात्वालोत्करौ संचरः सर्वत्रानादेशे
antareṇa cātvālotkarau saṃcaraḥ sarvatrānādeśe
- 7
तदाप्नानं तीर्थम्
tadāpnānaṃ tīrtham
- 8
अग्नौ चीयमाने पश्चिमेन पुच्छं गत्वा दक्षिणे ऽपिकक्षे तिष्ठेद्यत्र वोपदध्युः
agnau cīyamāne paścimena pucchaṃ gatvā dakṣiṇe 'pikakṣe tiṣṭhedyatra vopadadhyuḥ
- 9
पश्चिमेन पक्षाव् अपिकक्षौ
paścimena pakṣāv apikakṣau
- 10
पूर्वेणोपप्लवौ
pūrveṇopaplavau
- 11
पुष्करपलाश उपधीयमाने हिरण्मये पुरुषे स्वयमातृण्णासु च शर्करासु व्याहृतिसामानि गायेद्यजमानं सत्यं पुरुषो भूर्भुवः स्वर् इत्य् एतासु पृथक्
puṣkarapalāśa upadhīyamāne hiraṇmaye puruṣe svayamātṛṇṇāsu ca śarkarāsu vyāhṛtisāmāni gāyedyajamānaṃ satyaṃ puruṣo bhūrbhuvaḥ svar ity etāsu pṛthak
- 12
तेषां स्थाने स्वयं चिन्वान ऋतनिधनम् आज्यदोहं पुरुषव्रतम् एकानुगानं रथन्तरं वामदेव्यं बृहद् इति
teṣāṃ sthāne svayaṃ cinvāna ṛtanidhanam ājyadohaṃ puruṣavratam ekānugānaṃ rathantaraṃ vāmadevyaṃ bṛhad iti
- 13
रथन्तरप्रभृतीनि विकल्पन्ते लोकसामभिर् आवृत्तैः
rathantaraprabhṛtīni vikalpante lokasāmabhir āvṛttaiḥ
- 14
संचितम् अग्निं दक्षिणेन गत्वा अग्न आयूंषीति प्रत्यङ्मुखस्तिष्ठञ्छिरसि गायत्रं गायेन्निरुक्तम्
saṃcitam agniṃ dakṣiṇena gatvā agna āyūṃṣīti pratyaṅmukhastiṣṭhañchirasi gāyatraṃ gāyenniruktam
- 15
प्रत्याव्रज्य रथन्तरं दक्षिणे पक्ष उदङ्मुखः पश्चाद्वा प्राङ्मुखः
pratyāvrajya rathantaraṃ dakṣiṇe pakṣa udaṅmukhaḥ paścādvā prāṅmukhaḥ
- 16
पश्चिमेन पुच्छं गत्वा बृहदुत्तरे पक्षे दक्षिणामुखः पश्चाद्वा प्राङ्मुखः
paścimena pucchaṃ gatvā bṛhaduttare pakṣe dakṣiṇāmukhaḥ paścādvā prāṅmukhaḥ
- 17
प्रत्याव्रज्य यज्ञायज्ञीयं पुच्छे संवत्सरश्चेद्दैक्षः सौत्यो वा
pratyāvrajya yajñāyajñīyaṃ pucche saṃvatsaraśceddaikṣaḥ sautyo vā
- 18
ऋतुष्ठायज्ञायज्ञीयम् अन्यत्र
ṛtuṣṭhāyajñāyajñīyam anyatra
- 19
वामदेव्यं दक्षिणे ऽपिकक्षे
vāmadevyaṃ dakṣiṇe 'pikakṣe
- 20
प्रजापतिहृदयम् उत्तरे
prajāpatihṛdayam uttare
- 21
एतानि गौतम उत्तरेणाग्निं गत्वा
etāni gautama uttareṇāgniṃ gatvā
- 22
एतान्येव प्रदक्षिणं प्रत्यन्ताद्धानञ्जय्यः
etānyeva pradakṣiṇaṃ pratyantāddhānañjayyaḥ
- 23
यज्ञायज्ञीयं पुच्छे
yajñāyajñīyaṃ pucche
- 24
प्रजापतिहृदयस्थाने च वामदेव्यम्
prajāpatihṛdayasthāne ca vāmadevyam
- 25
दक्षिणेनाग्निं गत्वा गौतमीये व्यत्ययं ये पक्षयोः शाण्डिल्यः
dakṣiṇenāgniṃ gatvā gautamīye vyatyayaṃ ye pakṣayoḥ śāṇḍilyaḥ
- 26
शिरसि च गीत्वोत्तरे पक्षे
śirasi ca gītvottare pakṣe
- 27
यथागीतम् इतराणि
yathāgītam itarāṇi
- 28
उत्तरे चोपप्लवे स्वं हृदयदेशम् आलभ्य प्रजापतेर्हृदयम्
uttare copaplave svaṃ hṛdayadeśam ālabhya prajāpaterhṛdayam
- 29
अध्वर्युपथे श्यैतम्
adhvaryupathe śyaitam

