22 shlokas
- 1
चातुर्मास्येषु वरुणप्रघासानां स्तम्बयजुर्हरिष्यत्सु यजुषोपविशेत्
cāturmāsyeṣu varuṇapraghāsānāṃ stambayajurhariṣyatsu yajuṣopaviśet
- 2
विलिखिते चात्वाले ऽध्वर्युणा सह प्रत्याव्रज्याहवनीयम् उपविशेत्
vilikhite cātvāle 'dhvaryuṇā saha pratyāvrajyāhavanīyam upaviśet
- 3
अग्नी प्रणीयमानौ यथैतमनुगच्छेत्
agnī praṇīyamānau yathaitamanugacchet
- 4
अध्वर्युश्चेद्ब्रूयाद्ब्रह्मन्न् एकस्फ्ययोपसंभिन्द्धीति स्फ्येनाहवनीयात्पांसून् उपहत्योत्तरस्या वेदेर्दक्षिणाद् अन्तात्कर्षन्नियात्
adhvaryuścedbrūyādbrahmann ekasphyayopasaṃbhinddhīti sphyenāhavanīyātpāṃsūn upahatyottarasyā vederdakṣiṇād antātkarṣanniyāt
- 5
आ वेदिमध्याद् एका चेत्
ā vedimadhyād ekā cet
- 6
प्रोह्य स्फ्यं पश्चिमेन वेदिं गत्वा निधीयमानयोर् अग्न्योस्तूष्णीम् उपविशेत्
prohya sphyaṃ paścimena vediṃ gatvā nidhīyamānayor agnyostūṣṇīm upaviśet
- 7
एतत्कर्माग्निप्रणयनेषु सर्वेषु
etatkarmāgnipraṇayaneṣu sarveṣu
- 8
अवभृथन्यङ्गं गच्छत्सु पूर्वेणाग्नी चात्वालं च गच्छेत्
avabhṛthanyaṅgaṃ gacchatsu pūrveṇāgnī cātvālaṃ ca gacchet
- 9
पश्चिमेन वेदी चात्वालं च स्वे यज्ञे
paścimena vedī cātvālaṃ ca sve yajñe
- 10
हविर्यज्ञेष्व् एष संचर उत्तरेण विहारं कर्मभ्यः
haviryajñeṣv eṣa saṃcara uttareṇa vihāraṃ karmabhyaḥ
- 11
यथा चात्वाले तथा यूपे शामित्रे च पशौ
yathā cātvāle tathā yūpe śāmitre ca paśau
- 12
अवभृथन्यङ्गं प्राप्याभ्युक्षणप्रभृति सौत्यं कर्म समापयेयुः
avabhṛthanyaṅgaṃ prāpyābhyukṣaṇaprabhṛti sautyaṃ karma samāpayeyuḥ
- 13
साकमेधेषु क्षीरोदनस्य यथार्थं प्राश्नीयात्
sākamedheṣu kṣīrodanasya yathārthaṃ prāśnīyāt
- 14
यजमानं ब्रूयात्प्रभूतम् अन्नं कारय सुहिता अलंकृता भवतेत्य् अमात्यान्ब्रूहि
वत्सांश्च मातृभिः सह वासयेत
yajamānaṃ brūyātprabhūtam annaṃ kāraya suhitā alaṃkṛtā bhavatety amātyānbrūhi
vatsāṃśca mātṛbhiḥ saha vāsayeta
- 15
पूर्वाह्णे ऽध्वर्युः क्षीरौदनम् ऋषभस्य रवथे जुहोति ब्रह्माणम् उपवेश्य
pūrvāhṇe 'dhvaryuḥ kṣīraudanam ṛṣabhasya ravathe juhoti brahmāṇam upaveśya
- 16
ऋषभे ऽरुवति ब्रह्मैव ब्रूयाज्जुहुधीति
ṛṣabhe 'ruvati brahmaiva brūyājjuhudhīti
- 17
तूष्णीं पैतृकयज्ञिकायां सर्वं कुर्यात्
tūṣṇīṃ paitṛkayajñikāyāṃ sarvaṃ kuryāt
- 18
ओम् इत्य् एवानुमन्त्रयेत्
om ity evānumantrayet
- 19
यज्ञोपवीतप्राचीनावीतयोर् अध्वर्युम् अनुविदधीत
yajñopavītaprācīnāvītayor adhvaryum anuvidadhīta
- 20
तस्या हवींषि निर्वप्स्यत्सु दक्षिणया द्वारा प्रपद्य पश्चात्प्राङ्मुख उपविशेत्
tasyā havīṃṣi nirvapsyatsu dakṣiṇayā dvārā prapadya paścātprāṅmukha upaviśet
- 21
एवमेव वेदिं गत्वा स्तम्बयजुर्हरिष्यत्सु
evameva vediṃ gatvā stambayajurhariṣyatsu
- 22
आज्यभागयोर्हतयोर्दक्षिणेनाग्निं परिक्रम्य पुरस्तात्प्रत्यङ्मुख उपविशेद्यजमानश्च
ājyabhāgayorhatayordakṣiṇenāgniṃ parikramya purastātpratyaṅmukha upaviśedyajamānaśca

