15 shlokas
- 1
अथातः सप्तपाकयज्ञानां प्रायश्चित्तसमुच्चयं व्याख्यास्यामः
athātaḥ saptapākayajñānāṃ prāyaścittasamuccayaṃ vyākhyāsyāmaḥ
- 2
हुतः प्रहुत आहुतः शूलगवो बलिहरणं प्रत्यवरोहणम् अष्टकाहोम इति सप्तपाकयज्ञानां न प्रयाजा इज्यन्ते नानूयाजाः न सामिधेनीः
hutaḥ prahuta āhutaḥ śūlagavo baliharaṇaṃ pratyavarohaṇam aṣṭakāhoma iti saptapākayajñānāṃ na prayājā ijyante nānūyājāḥ na sāmidhenīḥ
- 3
अन्वाहतेषु कर्मस्व् अग्निम् उपसमाधाय संपरिस्तीर्य यत्र यत्र दर्वीहोमं कुर्यात्तत्र तत्र चरुं समवदाय जुहोति
anvāhateṣu karmasv agnim upasamādhāya saṃparistīrya yatra yatra darvīhomaṃ kuryāttatra tatra caruṃ samavadāya juhoti
- 4
सर्वत्र स्कन्ने भिन्ने छिन्ने क्षामे विपर्यासे उद्दाहे ऊनातिरिक्ते पवित्रनाशे पात्रभेदे द्वे मिन्दाहुती जुहोति
sarvatra skanne bhinne chinne kṣāme viparyāse uddāhe ūnātirikte pavitranāśe pātrabhede dve mindāhutī juhoti
- 5
मक्षिकैर्मशकैर्वा रोमभिः पिपीलिकैर्वा व्यापद्येत प्रजापतये होमं कुर्यात्
makṣikairmaśakairvā romabhiḥ pipīlikairvā vyāpadyeta prajāpataye homaṃ kuryāt
- 6
व्यापन्नम् आज्यम् अव्यापन्नम् अन्तर्हितम् अनाज्ञातप्रायश्चित्तं यज्ञसमृद्धीर्जुहोति
vyāpannam ājyam avyāpannam antarhitam anājñātaprāyaścittaṃ yajñasamṛddhīrjuhoti
- 7
अन्तरागमने प्रायश्चित्तं दशहोतारं चानुख्यां च जुहोति
antarāgamane prāyaścittaṃ daśahotāraṃ cānukhyāṃ ca juhoti
- 8
अन्तर्हृते प्रायश्चित्तं चतुर्होतारं चानुख्यां च जुहोति
antarhṛte prāyaścittaṃ caturhotāraṃ cānukhyāṃ ca juhoti
- 9
मण्डूकसर्पमूषिकमार्जारान्तरागमने प्रायश्चित्तं पञ्चहोतारं चानुख्यां च जुहोति
maṇḍūkasarpamūṣikamārjārāntarāgamane prāyaścittaṃ pañcahotāraṃ cānukhyāṃ ca juhoti
- 10
विकृतरूपे विकृतशब्दे विस्फुटे प्रायश्चित्तं शंयुवाकं चानुख्यां च जुहोति
vikṛtarūpe vikṛtaśabde visphuṭe prāyaścittaṃ śaṃyuvākaṃ cānukhyāṃ ca juhoti
- 11
अनादिष्टं सर्वप्रायश्चित्तं व्याख्यातं वारुणीम् इति निर्दिशेत्
anādiṣṭaṃ sarvaprāyaścittaṃ vyākhyātaṃ vāruṇīm iti nirdiśet
- 12
संस्कारान्ते ऽग्नाव् उत्सन्ने तद्भस्मसमारोपणं समिधं वा यदि नोपविन्देद्याज्ञिकं वा प्रायश्चित्तं महाव्याहृतीः प्रणवं मनस्वतीं च जुहोति
saṃskārānte 'gnāv utsanne tadbhasmasamāropaṇaṃ samidhaṃ vā yadi nopavindedyājñikaṃ vā prāyaścittaṃ mahāvyāhṛtīḥ praṇavaṃ manasvatīṃ ca juhoti
- 13
स्वराक्षरपदवृत्तभ्रेषेषु आभिर्गीर्भिः इति
svarākṣarapadavṛttabhreṣeṣu ābhirgīrbhiḥ iti
- 14
सर्वत्र पाकयज्ञानां सदस्येभ्यो धेनुम् ऋषभम् अनड्वाहं दद्यात्
sarvatra pākayajñānāṃ sadasyebhyo dhenum ṛṣabham anaḍvāhaṃ dadyāt
- 15
सदस्याः सर्वप्रायश्चित्तानि प्रतिनिधींश्च बोधयिष्यन्तीति
sadasyāḥ sarvaprāyaścittāni pratinidhīṃśca bodhayiṣyantīti

