11 shlokas
- 1
अथातः सप्तपाकयज्ञानां प्रायश्चित्तानि व्याख्यास्यामः
athātaḥ saptapākayajñānāṃ prāyaścittāni vyākhyāsyāmaḥ
- 2
तत्रादित एवोपलिप्ते श्वा वेटको वा यदि गच्छेत्कीटो वा पिण्डकारी स्यात्तत्पुनर् उपलिप्य प्रोक्षति देवस्य त्वा सवितुः प्रसवे ऽश्विनोर्बाहुभ्यां पूष्णो हस्ताभ्याम् अग्नेस्तेजसा प्रोक्षामि इति प्रोक्ष्य स्थण्डिलम् उपलिप्य स्थण्डिलम् उद्धरेत्
tatrādita evopalipte śvā veṭako vā yadi gacchetkīṭo vā piṇḍakārī syāttatpunar upalipya prokṣati devasya tvā savituḥ prasave 'śvinorbāhubhyāṃ pūṣṇo hastābhyām agnestejasā prokṣāmi iti prokṣya sthaṇḍilam upalipya sthaṇḍilam uddharet
- 3
स्थण्डिलम् उद्धृतं गौर् अश्वो वा यदि विकिरेद् अन्यद्वा श्वापदम् अधितिष्ठेत्तस्य पदम् अभ्युक्ष्य जपति पृथिवि देवयजन्य् ओषध्यास्ते मूलं मा हिंसिषम् इति
sthaṇḍilam uddhṛtaṃ gaur aśvo vā yadi vikired anyadvā śvāpadam adhitiṣṭhettasya padam abhyukṣya japati pṛthivi devayajany oṣadhyāste mūlaṃ mā hiṃsiṣam iti
- 4
अथ कृतान्तेन प्रतिपद्यते
atha kṛtāntena pratipadyate
- 5
अथ यदि प्रणीतापात्रं भिद्येत तद् अभिमन्त्रयते अभिन्नो घर्मो जीरदानुर्यत आत्तस्तद् अगन्पुनर् इति
atha yadi praṇītāpātraṃ bhidyeta tad abhimantrayate abhinno gharmo jīradānuryata āttastad aganpunar iti
- 6
अथान्यद् आहरति घर्मो देवान् अप्येतु इति पूरयित्वा व्याहृतिभिर् उपतिष्ठते
athānyad āharati gharmo devān apyetu iti pūrayitvā vyāhṛtibhir upatiṣṭhate
- 7
अथ यदि प्रणीताः प्रणीयमानाः प्रणीता वा परासिच्येरंस्ता अभिमन्त्रयते अक्षितो ऽस्य् अक्षित्यै त्वा मा मे क्षेष्ठा अमुत्रामुष्मिन्लोके इति
atha yadi praṇītāḥ praṇīyamānāḥ praṇītā vā parāsicyeraṃstā abhimantrayate akṣito 'sy akṣityai tvā mā me kṣeṣṭhā amutrāmuṣminloke iti
- 8
पूरयित्वोपतिष्ठते भूर् आयुर्मे धारयत प्राणं मे धारयत प्रजां मे धारयत पशून्मे धारयत मा म आयुः प्राणाः प्रजाः पशवः परासिच्येरन् इति
pūrayitvopatiṣṭhate bhūr āyurme dhārayata prāṇaṃ me dhārayata prajāṃ me dhārayata paśūnme dhārayata mā ma āyuḥ prāṇāḥ prajāḥ paśavaḥ parāsicyeran iti
- 9
अथ यदि कन्योपसाद्यमाना वोह्यमाना वा पतेत्ताम् उत्थापयेयुः
उदस्थाद्देव्य् अदितिर्विश्वरूप्य् आयुर्यज्ञपताव् अधात्
इन्द्राय कृण्वती भागं मित्राय वरुणाय च इति
atha yadi kanyopasādyamānā vohyamānā vā patettām utthāpayeyuḥ
udasthāddevy aditirviśvarūpy āyuryajñapatāv adhāt
indrāya kṛṇvatī bhāgaṃ mitrāya varuṇāya ca iti
- 10
अथ यदि कन्योपसाद्यमाना वोह्यमाना वा रजस्वला स्यात्ताम् अनुमन्त्रयते
पुमांसौ मित्रावरुणौ पुमांसाव् अश्विनाव् उभौ
पुमान् इन्द्रश्च सूर्यश्च पुमांसं वर्धयेताम् इति
atha yadi kanyopasādyamānā vohyamānā vā rajasvalā syāttām anumantrayate
pumāṃsau mitrāvaruṇau pumāṃsāv aśvināv ubhau
pumān indraśca sūryaśca pumāṃsaṃ vardhayetām iti
- 11
अथ यदि कन्योपसाद्यमाना वोह्यमाना वाश्रु कुर्यात्ताम् अनुमन्त्रयते
जीवां रुदन्ति वि मयन्ते अध्वरे दीर्घामनु प्रसितिं दीधियुर्नरः
वामं पितृभ्यो य इदं समेरिरे मयः पतिभ्यो जनयः परिष्वजे इति
atha yadi kanyopasādyamānā vohyamānā vāśru kuryāttām anumantrayate
jīvāṃ rudanti vi mayante adhvare dīrghāmanu prasitiṃ dīdhiyurnaraḥ
vāmaṃ pitṛbhyo ya idaṃ samerire mayaḥ patibhyo janayaḥ pariṣvaje iti

