6 shlokas
- 1
अथ यदि ब्रह्मचार्य् अव्रत्यम् इव चरेन्मांसं वाश्नीयात्स्त्रियं वोपेयात्सर्वास्व् एवार्तिषु
atha yadi brahmacāry avratyam iva carenmāṃsaṃ vāśnīyātstriyaṃ vopeyātsarvāsv evārtiṣu
- 2
अन्तरागारे ऽग्निम् उपसमाधाय संपरिस्तीर्याग्निमुखात्कृत्वाथाज्याहुतीर् उपजुहोति
कामेन कृतं कामः करोति कामायैवेदं सर्वं यो मा कारयति तस्मै स्वाहा
मनसा कृतं मनः करोति मनस एवेदं सर्वं यो मा कारयति तस्मै स्वाहा
रजसा कृतं रजः करोति रजस एवेदं सर्वं यो मा कारयति तस्मै स्वाहा
तमसा कृतं तमः करोति तमस एवेदं सर्वं यो मा कारयति तस्मै स्वाहा
पाप्मना कृतं पाप्मा करोति पाप्मन एवेदं सर्वं यो मा कारयति तस्मै स्वाहा
मन्युना कृतं मन्युः करोति मन्यव एवेदं सर्वं यो मा कारयति तस्मै स्वाहेति
antarāgāre 'gnim upasamādhāya saṃparistīryāgnimukhātkṛtvāthājyāhutīr upajuhoti
kāmena kṛtaṃ kāmaḥ karoti kāmāyaivedaṃ sarvaṃ yo mā kārayati tasmai svāhā
manasā kṛtaṃ manaḥ karoti manasa evedaṃ sarvaṃ yo mā kārayati tasmai svāhā
rajasā kṛtaṃ rajaḥ karoti rajasa evedaṃ sarvaṃ yo mā kārayati tasmai svāhā
tamasā kṛtaṃ tamaḥ karoti tamasa evedaṃ sarvaṃ yo mā kārayati tasmai svāhā
pāpmanā kṛtaṃ pāpmā karoti pāpmana evedaṃ sarvaṃ yo mā kārayati tasmai svāhā
manyunā kṛtaṃ manyuḥ karoti manyava evedaṃ sarvaṃ yo mā kārayati tasmai svāheti
- 3
जयप्रभृति सिद्धम् आ धेनुवरप्रदानात्
jayaprabhṛti siddham ā dhenuvarapradānāt
- 4
अपरेणाग्निं कृष्णाजिनेन प्राचीनग्रीवेणोत्तरलोम्ना प्रावृत्य वसति
apareṇāgniṃ kṛṣṇājinena prācīnagrīveṇottaralomnā prāvṛtya vasati
- 5
व्युष्टायां जघनार्धाद् आत्मानम् अपकृष्य तीर्थं गत्वा प्रसिद्धं स्नात्वान्तर्जलगतो ऽघमर्षणेन षोडश प्राणायामान्धारयित्वा प्रसिद्धम् आदित्योपस्थानात्कृत्वाचार्यस्यगृहान् एति
vyuṣṭāyāṃ jaghanārdhād ātmānam apakṛṣya tīrthaṃ gatvā prasiddhaṃ snātvāntarjalagato 'ghamarṣaṇena ṣoḍaśa prāṇāyāmāndhārayitvā prasiddham ādityopasthānātkṛtvācāryasyagṛhān eti
- 6
यथाश्वमेधावभृथ एवम् एवैतद्विजानीयाद् इति
yathāśvamedhāvabhṛtha evam evaitadvijānīyād iti

