18 shlokas
- 1
उक्तो वर्णधर्मश्चाश्रमधर्मश्च
ukto varṇadharmaścāśramadharmaśca
- 2
अथ खल्व् अयं पुरुषो याप्येन कर्मणा मिथ्या वा चरत्य् अयाज्यं वा याजयत्य् अप्रतिग्राह्यस्य वा प्रतिगृह्णात्य् अनाश्यान्नस्य वान्नम् अश्नात्य् अचरणीयेन वा चरति
atha khalv ayaṃ puruṣo yāpyena karmaṇā mithyā vā caraty ayājyaṃ vā yājayaty apratigrāhyasya vā pratigṛhṇāty anāśyānnasya vānnam aśnāty acaraṇīyena vā carati
- 3
तत्र प्रायश्चित्तं कुर्यान्न कुर्याद् इति मीमांसन्ते
tatra prāyaścittaṃ kuryānna kuryād iti mīmāṃsante
- 4
नहि कर्म क्षीयत इति
nahi karma kṣīyata iti
- 5
कुर्याद् इत्य् एव
kuryād ity eva
- 6
पुनस्तोमेनेष्ट्वा पुनः सवनम् आयान्तीति विज्ञायते
punastomeneṣṭvā punaḥ savanam āyāntīti vijñāyate
- 7
अथाप्य् उदाहरन्ति
सर्वं पाप्मानं तरति तरति ब्रह्महत्यां यो ऽश्वमेधेन यजत इति
athāpy udāharanti
sarvaṃ pāpmānaṃ tarati tarati brahmahatyāṃ yo 'śvamedhena yajata iti
- 8
अग्निष्टुता वाभिशस्यमानो यजेतेति च
agniṣṭutā vābhiśasyamāno yajeteti ca
- 9
तस्य निष्क्रयणानि जपस्तपो होम उपवासो दानम्
tasya niṣkrayaṇāni japastapo homa upavāso dānam
- 10
उपनिषदो वेदादयो वेदान्ताः सर्वच्छन्दःसु संहिता मधून्य् अघमर्षणम् अथर्वशिरो रुद्राः पुरुषसूक्तं राजनरौहिणे सामनी बृहद्रथंतरे पुरुषगतिर्महानाम्न्यो महावैराजं महादिवाकीर्त्यं ज्येष्ठसाम्नाम् अन्यतमं बहिष्पवमानः कूश्माण्ड्यः पावमान्यः सावित्री चेति पावनानि
upaniṣado vedādayo vedāntāḥ sarvacchandaḥsu saṃhitā madhūny aghamarṣaṇam atharvaśiro rudrāḥ puruṣasūktaṃ rājanarauhiṇe sāmanī bṛhadrathaṃtare puruṣagatirmahānāmnyo mahāvairājaṃ mahādivākīrtyaṃ jyeṣṭhasāmnām anyatamaṃ bahiṣpavamānaḥ kūśmāṇḍyaḥ pāvamānyaḥ sāvitrī ceti pāvanāni
- 11
उपसन्न्यायेन पयोव्रतता शाकभक्षता फलभक्षता मूलभक्षता प्रसृतियावको हिरण्यप्राशनं घृतप्राशनं सोमपानम् इति मेध्यानि
upasannyāyena payovratatā śākabhakṣatā phalabhakṣatā mūlabhakṣatā prasṛtiyāvako hiraṇyaprāśanaṃ ghṛtaprāśanaṃ somapānam iti medhyāni
- 12
सर्वे शिलोच्चयाः सर्वाः स्रवन्त्यः सरितः पुण्या ह्रदास्तीर्थान्य् ऋषिनिकेतनानि गोष्ठक्षेत्रपरिष्कन्दा इति देशाः
sarve śiloccayāḥ sarvāḥ sravantyaḥ saritaḥ puṇyā hradāstīrthāny ṛṣiniketanāni goṣṭhakṣetrapariṣkandā iti deśāḥ
- 13
अहिंसा सत्यम् अस्तैन्यं सवनेषूदकोपस्पर्शनं गुरुशुश्रूषा ब्रह्मचर्यम् अधःशयनम् एकवस्त्रतानाशक इति तपांसि
ahiṃsā satyam astainyaṃ savaneṣūdakopasparśanaṃ guruśuśrūṣā brahmacaryam adhaḥśayanam ekavastratānāśaka iti tapāṃsi
- 14
हिरण्यं गौर्वासो ऽश्वो भूमिस्तिला घृतम् अन्नम् इति देयानि
hiraṇyaṃ gaurvāso 'śvo bhūmistilā ghṛtam annam iti deyāni
- 15
संवत्सरः षण्मासाश्चत्वारस्त्रयो द्वाव् एकश्चतुर्विंशत्यहो द्वादशाहः षडहस्त्र्यहो ऽहोरात्र एकाह इति कालाः
saṃvatsaraḥ ṣaṇmāsāścatvārastrayo dvāv ekaścaturviṃśatyaho dvādaśāhaḥ ṣaḍahastryaho 'horātra ekāha iti kālāḥ
- 16
एतान्य् अनादेशे क्रियेरन्
etāny anādeśe kriyeran
- 17
एनःसु गुरुषु गुरूणि लघुषु लघूनि
enaḥsu guruṣu gurūṇi laghuṣu laghūni
- 18
कृच्छ्रातिकृच्छ्रौ चान्द्रायणम् इति सर्वप्रायश्चित्तिः
सर्वप्रायश्चित्तिः
kṛcchrātikṛcchrau cāndrāyaṇam iti sarvaprāyaścittiḥ
sarvaprāyaścittiḥ

