11 shlokas
- 1
अथ य आहिताग्निस्तन्त्रे प्रवासे मृतः स्यात्कथं तत्र कुर्यात्
atha ya āhitāgnistantre pravāse mṛtaḥ syātkathaṃ tatra kuryāt
- 2
कथम् अस्याग्निहोत्रं जुहुयुः
katham asyāgnihotraṃ juhuyuḥ
- 3
अन्यवत्साया गोः पयसेत्य् आहुर् अदुग्धाया वा शूद्रदुग्धाया वा
anyavatsāyā goḥ payasety āhur adugdhāyā vā śūdradugdhāyā vā
- 4
असर्वं वा एतत्पयो यद् अन्यवत्साया गोः शूद्रदुग्धाया वासर्वं वा एतद् अग्निहोत्रं यन्मृतस्याग्निहोत्रम्
asarvaṃ vā etatpayo yad anyavatsāyā goḥ śūdradugdhāyā vāsarvaṃ vā etad agnihotraṃ yanmṛtasyāgnihotram
- 5
तावद् अग्निं परिचरेयुर्यावद् अस्थ्नाम् आहरणम्
tāvad agniṃ paricareyuryāvad asthnām āharaṇam
- 6
आहृत्याग्निभिः संस्पृश्य तं पितृमेधेन समाप्नुयुः
āhṛtyāgnibhiḥ saṃspṛśya taṃ pitṛmedhena samāpnuyuḥ
- 7
अथ यः समारोपितासमारोपिते मृतः स्यात्कथं तत्र कुर्यात्
atha yaḥ samāropitāsamāropite mṛtaḥ syātkathaṃ tatra kuryāt
- 8
सो ऽग्नये तन्तुमते पथिकृते व्रतभृते पुरोडाशं निर्वपेद् एककपालं सप्तकपालं नवकपालम्
so 'gnaye tantumate pathikṛte vratabhṛte puroḍāśaṃ nirvaped ekakapālaṃ saptakapālaṃ navakapālam
- 9
नित्याः पुरस्ताद्धोमाः
nityāḥ purastāddhomāḥ
- 10
संस्थितहोमेषु
त्वम् अग्ने सप्रथा असि येन पथा वैवस्वतः त्वम् अग्ने व्रतपा असीति मध्यत ओप्याथ संस्रावभागैः संस्थापयेत्
saṃsthitahomeṣu
tvam agne saprathā asi yena pathā vaivasvataḥ tvam agne vratapā asīti madhyata opyātha saṃsrāvabhāgaiḥ saṃsthāpayet
- 11
अथ नष्टे अरणी स्याताम् अन्ययोर् अरण्योर्विहृत्य तं मथित्वैताभिर् एव हुत्वाथैनं समाप्नुयुः
atha naṣṭe araṇī syātām anyayor araṇyorvihṛtya taṃ mathitvaitābhir eva hutvāthainaṃ samāpnuyuḥ

