23 shlokas
- 1
प्राङ्मुखो ऽन्नानि भुञ्जीत उच्चरेद्दक्षिणामुखः
उदङ्मुखः मूत्रं कुर्यात्प्रत्यक्पादावनेजनम् इति
prāṅmukho 'nnāni bhuñjīta uccareddakṣiṇāmukhaḥ
udaṅmukhaḥ mūtraṃ kuryātpratyakpādāvanejanam iti
- 2
आराच्चावसथान्मूत्रपुरीषे कुर्याद्दक्षिणां दिशं दक्षिणापरां वा
ārāccāvasathānmūtrapurīṣe kuryāddakṣiṇāṃ diśaṃ dakṣiṇāparāṃ vā
- 3
अस्तमिते च बहिर्ग्रामाद् आराद् आवसथाद्वा मूत्रपुरीषयोः कर्म वर्जयेत्
astamite ca bahirgrāmād ārād āvasathādvā mūtrapurīṣayoḥ karma varjayet
- 4
देवताभिधानं चाप्रयतः
devatābhidhānaṃ cāprayataḥ
- 5
परुषम्चोभयोर्देवतानां राज्ञश्च
paruṣamcobhayordevatānāṃ rājñaśca
- 6
ब्राह्मणस्य गोर् इति पदोपस्पर्शनं वर्जयेत्
brāhmaṇasya gor iti padopasparśanaṃ varjayet
- 7
हस्तेन चाकारणात्
hastena cākāraṇāt
- 8
गोर्दक्षिणानां कुमार्याश्च परीवादान्वर्जयेत्
gordakṣiṇānāṃ kumāryāśca parīvādānvarjayet
- 9
स्तृहतीं च गां नाचक्षीत
stṛhatīṃ ca gāṃ nācakṣīta
- 10
संसृष्टां च वत्सेनानिमित्ते
saṃsṛṣṭāṃ ca vatsenānimitte
- 11
नाधेनुम् अधेनुर् इति ब्रूयात्
धेनुभव्येत्य् एव ब्रूयात्
nādhenum adhenur iti brūyāt
dhenubhavyety eva brūyāt
- 12
न भद्रम्भद्रम् इति ब्रूयात्
पुण्यं प्रशास्तम् इत्य् एव ब्रूयात्
na bhadrambhadram iti brūyāt
puṇyaṃ praśāstam ity eva brūyāt
- 13
वत्सतन्तीं च नोपरि गच्छेत्
vatsatantīṃ ca nopari gacchet
- 14
प्लेङ्खाव् अन्तरेण च नातीयात्
pleṅkhāv antareṇa ca nātīyāt
- 15
नासौ मे सपत्न इति ब्रूयात्
यद्य् असौ मे सपत्न इति ब्रूयाद्द्विषन्तं भ्रातृव्यं जनयेत्
nāsau me sapatna iti brūyāt
yady asau me sapatna iti brūyāddviṣantaṃ bhrātṛvyaṃ janayet
- 16
नेन्द्रधनुर् इति परस्मै प्रब्रूयात्
nendradhanur iti parasmai prabrūyāt
- 17
न पततः संचक्षीत
na patataḥ saṃcakṣīta
- 18
उद्यन्तम् अस्तं यन्तं चादित्यं दर्शने वर्जयेत्
udyantam astaṃ yantaṃ cādityaṃ darśane varjayet
- 19
दिवादित्यः सत्त्वानि गोपायति नक्तं चन्द्रमास्तस्माद् अमावास्यायां निशायां स्वाधीय आत्मनो गुप्तिम् इच्छेत्प्रायत्यब्रह्मचर्यकाले चर्यया च
divādityaḥ sattvāni gopāyati naktaṃ candramāstasmād amāvāsyāyāṃ niśāyāṃ svādhīya ātmano guptim icchetprāyatyabrahmacaryakāle caryayā ca
- 20
सह ह्य् एतां रात्रिं सूर्याचन्द्रमसौ वसतः
saha hy etāṃ rātriṃ sūryācandramasau vasataḥ
- 21
न कुसृत्या ग्रामं प्रविशेत्
यदि प्रविशेन्नमो रुद्राय वास्तोष्पतय इत्य् एताम् ऋचं जपेद् अन्यां वा रौद्रीम्
na kusṛtyā grāmaṃ praviśet
yadi praviśennamo rudrāya vāstoṣpataya ity etām ṛcaṃ japed anyāṃ vā raudrīm
- 22
नाब्राह्मणायोच्छिष्टं प्रयच्छेत्
यदि प्रयच्छेद्दन्तान्स्कुप्त्वा तस्मिन्न् अवधाय प्रयच्छेत्
nābrāhmaṇāyocchiṣṭaṃ prayacchet
yadi prayaccheddantānskuptvā tasminn avadhāya prayacchet
- 23
क्रोधादींश्च भूतदाहीयान्दोषान्वर्जयेत्
krodhādīṃśca bhūtadāhīyāndoṣānvarjayet

