70 shlokas
- 1
प्रातर्हुते ऽग्निहोत्रे वेषाय वाम् इति पाणी प्रक्षाल्याग्नीन्परिस्तीर्य दक्षिणतो ब्रह्मयजमानाभ्यां स्तीर्त्वा संततं पृष्ठ्यां स्तृणाति गार्हपत्याद् अध्य् आहवनीयाद्यज्ञस्य संततिर् असि यज्ञस्य त्वा संतत्यै स्तृणामीति
prātarhute 'gnihotre veṣāya vām iti pāṇī prakṣālyāgnīnparistīrya dakṣiṇato brahmayajamānābhyāṃ stīrtvā saṃtataṃ pṛṣṭhyāṃ stṛṇāti gārhapatyād adhy āhavanīyādyajñasya saṃtatir asi yajñasya tvā saṃtatyai stṛṇāmīti
- 2
उत्तरतः पृष्ठ्यायाः पात्रेभ्यः संस्तीर्य द्वंद्वं पात्राणि प्रयुणक्ति स्फ्यं कपालान्य् अग्निहोत्रहवणीं शूर्पं कृष्णाजिनं शम्याम् उलूखलमुसलं दृषदुपलं खादिरं स्रुवं पालाशीं जुहूम् आश्वत्थीम् उपभृतं वैकङ्कतीं ध्रुवां शमीमयीर्वारत्निमात्रीः
uttarataḥ pṛṣṭhyāyāḥ pātrebhyaḥ saṃstīrya dvaṃdvaṃ pātrāṇi prayuṇakti sphyaṃ kapālāny agnihotrahavaṇīṃ śūrpaṃ kṛṣṇājinaṃ śamyām ulūkhalamusalaṃ dṛṣadupalaṃ khādiraṃ sruvaṃ pālāśīṃ juhūm āśvatthīm upabhṛtaṃ vaikaṅkatīṃ dhruvāṃ śamīmayīrvāratnimātrīḥ
- 3
वरणमयानि शिष्टानि पात्राणि
varaṇamayāni śiṣṭāni pātrāṇi
- 4
पात्रीम् इडाचमसं वेदं वेदप्ररवान्कुटरुम् आज्यस्थालीं चरुं प्राशित्रहरणं प्रणीतापात्रं पत्नीयोक्त्रं प्रातर्दौहिकानि
pātrīm iḍācamasaṃ vedaṃ vedapraravānkuṭarum ājyasthālīṃ caruṃ prāśitraharaṇaṃ praṇītāpātraṃ patnīyoktraṃ prātardauhikāni
- 5
चमसेनापः प्रणयति
कांस्येन ब्रह्मवर्चसकामस्य दोहनेन पशुकामस्य मृन्मयेन प्रतिष्ठाकामस्यायसेनाभिचरतः
camasenāpaḥ praṇayati
kāṃsyena brahmavarcasakāmasya dohanena paśukāmasya mṛnmayena pratiṣṭhākāmasyāyasenābhicarataḥ
- 6
वानस्पत्यो ऽसीति चमसम् आदाय देवेभ्यः शुन्धस्वेति चमसं प्रक्षालयति
vānaspatyo 'sīti camasam ādāya devebhyaḥ śundhasveti camasaṃ prakṣālayati
- 7
पार्थिवम् असि
देवेभ्यः शुम्भस्वेतीतरान्
pārthivam asi
devebhyaḥ śumbhasvetītarān
- 8
पश्चाद्गार्हपत्यस्य पवित्रान्तरापो गृह्णीते पृथिवीं मनसा ध्यायन्
यद्वो रेवती रेवत्यं यद्वो हविष्या हविष्यम्
यद्व ओजो यच्च नृम्णं तं व ऊर्मिं मधुमन्तं देवयज्यायै जुष्टं गृह्णामि
इति
paścādgārhapatyasya pavitrāntarāpo gṛhṇīte pṛthivīṃ manasā dhyāyan
yadvo revatī revatyaṃ yadvo haviṣyā haviṣyam
yadva ojo yacca nṛmṇaṃ taṃ va ūrmiṃ madhumantaṃ devayajyāyai juṣṭaṃ gṛhṇāmi
iti
- 9
प्रोक्षणीर्धर्मैः संस्कृत्य ब्रह्मन्न् अपः प्रणेष्यामीत्य् आमन्त्र्यावधाय पवित्रे स्फ्येन सह प्रणयति समं प्राणैर्धारयमाणः को वः प्रणयति स वः प्रणयतु
कस्मै वः प्रणयति तस्मै वः प्रणयतु
बृहस्पतिर्वः प्रणयतु
पोषाय त्वेति
prokṣaṇīrdharmaiḥ saṃskṛtya brahmann apaḥ praṇeṣyāmīty āmantryāvadhāya pavitre sphyena saha praṇayati samaṃ prāṇairdhārayamāṇaḥ ko vaḥ praṇayati sa vaḥ praṇayatu
kasmai vaḥ praṇayati tasmai vaḥ praṇayatu
bṛhaspatirvaḥ praṇayatu
poṣāya tveti
- 10
उत्तरत आहवनीयस्य स्फ्येनोद्धत्य सादयति को वो युनक्ति स वो युनक्तु
कस्मै वो युनक्ति तस्मै वो युनक्तु
बृहस्पतिर्वो युनक्तु
विश्वेभ्यः कामेभ्यो देवयज्याया इति
uttarata āhavanīyasya sphyenoddhatya sādayati ko vo yunakti sa vo yunaktu
kasmai vo yunakti tasmai vo yunaktu
bṛhaspatirvo yunaktu
viśvebhyaḥ kāmebhyo devayajyāyā iti
- 11
अध्वर्युयजमानौ वाचं यच्छेताम् आ हविष्कृतः
adhvaryuyajamānau vācaṃ yacchetām ā haviṣkṛtaḥ
- 12
परिस्तरणैः स्वाच्छाद्य पवित्रपाणिः पात्राणि संमृशति संसीदन्तां दैवीर्विश इति
paristaraṇaiḥ svācchādya pavitrapāṇiḥ pātrāṇi saṃmṛśati saṃsīdantāṃ daivīrviśa iti
- 13
वानस्पत्यासीत्य् अग्निहोत्रहवणीम् आदत्ते
vānaspatyāsīty agnihotrahavaṇīm ādatte
- 14
वर्षवृद्धम् असीति शूर्पम्
varṣavṛddham asīti śūrpam
- 15
उर्व् अन्तरिक्षं वीहीति व्रजति
urv antarikṣaṃ vīhīti vrajati
- 16
प्रत्युष्टं रक्ष इत्य् आहवनीये प्रतितप्य यजमान हविर्निर्वप्स्यामीति यजमानम् आमन्त्रयते
pratyuṣṭaṃ rakṣa ity āhavanīye pratitapya yajamāna havirnirvapsyāmīti yajamānam āmantrayate
- 17
यदि प्रवसेद् अग्ने निर्वप्स्यामीति ब्रूयात्
yadi pravased agne nirvapsyāmīti brūyāt
- 18
व्रीह्याग्रयणेनेष्ट्वा व्रीहिभिर्यजेता यवेभ्यो यवैर्वा व्रीहिभ्यः
vrīhyāgrayaṇeneṣṭvā vrīhibhiryajetā yavebhyo yavairvā vrīhibhyaḥ
- 19
पश्चाद् अग्निष्ठं शकटं योग्यकृतं छदिष्मत्सपरिणट्कम्
paścād agniṣṭhaṃ śakaṭaṃ yogyakṛtaṃ chadiṣmatsapariṇaṭkam
- 20
तस्माद् अधि निर्वपति
tasmād adhi nirvapati
- 21
पात्र्या वा स्फ्यम् अवधायानसान्मन्त्रान्जपन्
pātryā vā sphyam avadhāyānasānmantrānjapan
- 22
धूर् असीति धुरम् अभिमृशति
dhūr asīti dhuram abhimṛśati
- 23
देवानाम् असि वह्नितमम् इत्य् उत्तराम् ईषाम् आलभ्य जपति
devānām asi vahnitamam ity uttarām īṣām ālabhya japati
- 24
विष्णोः क्रमो ऽसीति पादम् आदधाति
viṣṇoḥ kramo 'sīti pādam ādadhāti
- 25
अह्रुतम् असीत्य् आरोहति
ahrutam asīty ārohati
- 26
उरु वातायेत्य् अवसारयति
uru vātāyety avasārayati
- 27
मित्रस्य वश्चक्षुषा प्रेक्ष इति हविष्यान्प्रेक्षते
mitrasya vaścakṣuṣā prekṣa iti haviṣyānprekṣate
- 28
अग्निहोत्रहवण्याम् अवधाय मुष्टिना निर्वपत्य् अग्निहोत्रहवण्याः शूर्पे देवस्य व इत्य् अग्नये वो जुष्टान्निर्वपाम्य् अमुष्मै वो जुष्टान् इति यथादेवतम्
त्रिर्यजुषा तूष्णीं चतुर्थम्
agnihotrahavaṇyām avadhāya muṣṭinā nirvapaty agnihotrahavaṇyāḥ śūrpe devasya va ity agnaye vo juṣṭānnirvapāmy amuṣmai vo juṣṭān iti yathādevatam
triryajuṣā tūṣṇīṃ caturtham
- 29
इदं देवानाम् इति निरुप्तान् अभिमृशति
इदम् उ नः सहेत्य् अवशिष्टान्
idaṃ devānām iti niruptān abhimṛśati
idam u naḥ sahety avaśiṣṭān
- 30
गोपीथाय त्वा रक्षायै त्वा नारात्या इति निरुप्तान्
gopīthāya tvā rakṣāyai tvā nārātyā iti niruptān

