38 shlokas
- 1
अमावास्यायाम् अपराह्णे पिण्डपितृयज्ञाय प्राग्दक्षिणैकोल्मुकं प्रणयेत्
अपेतो यन्त्व् असुराः पितृरूपा ये रूपाणि प्रतिमुच्याचरन्ति
परापुरो निपुरो ये भरन्त्य् अग्निष्टान्लोकात्प्रणुदात्व् अस्मात्
इति
amāvāsyāyām aparāhṇe piṇḍapitṛyajñāya prāgdakṣiṇaikolmukaṃ praṇayet
apeto yantv asurāḥ pitṛrūpā ye rūpāṇi pratimucyācaranti
parāpuro nipuro ye bharanty agniṣṭānlokātpraṇudātv asmāt
iti
- 2
उत्तरतः प्रणीतस्य वेदिम् उद्धन्ति स्फ्येन सकृत्पराचीनम् अपेतो यन्त्व् असुरा ये पितृषद इति
uttarataḥ praṇītasya vedim uddhanti sphyena sakṛtparācīnam apeto yantv asurā ye pitṛṣada iti
- 3
प्राग्दक्षिणाग्रैर्दक्षिणाग्निं परिस्तीर्य दक्षिणतो ऽग्नेर् एकैकं पात्राणि प्रयुनक्ति चरुं मेक्षणं पिण्डनिधानम् उलूखलमुसलं कृष्णाजिनं शूर्पम्
prāgdakṣiṇāgrairdakṣiṇāgniṃ paristīrya dakṣiṇato 'gner ekaikaṃ pātrāṇi prayunakti caruṃ mekṣaṇaṃ piṇḍanidhānam ulūkhalamusalaṃ kṛṣṇājinaṃ śūrpam
- 4
सकृद् आच्छिन्नस्य बर्हिष एकपवित्रं कृत्वा तूष्णीं प्रोक्षणीं संस्कृत्य पात्राणि सकृत्प्रोक्षति
sakṛd ācchinnasya barhiṣa ekapavitraṃ kṛtvā tūṣṇīṃ prokṣaṇīṃ saṃskṛtya pātrāṇi sakṛtprokṣati
- 5
एकपवित्रम् अन्तर्धायाग्निष्ठाद् अधि चरुणा व्रीहीन्निर्वपति पूरयित्वा निमृज्य कृष्णाजिने ऽध्यवहन्ति प्राग्दक्षिणमुखा परापावम्
ekapavitram antardhāyāgniṣṭhād adhi caruṇā vrīhīnnirvapati pūrayitvā nimṛjya kṛṣṇājine 'dhyavahanti prāgdakṣiṇamukhā parāpāvam
- 6
सकृत्फलीकृतान्दक्षिणाग्नौ श्रपयति प्रसव्यम् उदायावं जीवतण्डुलम्
sakṛtphalīkṛtāndakṣiṇāgnau śrapayati prasavyam udāyāvaṃ jīvataṇḍulam
- 7
शृतं प्रतिनयति
śṛtaṃ pratinayati
- 8
घृतेनानुत्पूतेन नवनीतेन वोत्पूतेन शृतम् अभिघार्य दक्षिणत उद्वास्यैकस्फ्यायाम् आसिच्य सकृद् आच्छिन्नं प्रोक्षति
ghṛtenānutpūtena navanītena votpūtena śṛtam abhighārya dakṣiṇata udvāsyaikasphyāyām āsicya sakṛd ācchinnaṃ prokṣati
- 9
एकस्फ्याम् आस्तीर्य चरुं मेक्षणं पिण्डनिधानम् इत्य् एकैकं बर्हिष्य् आसादयति
ekasphyām āstīrya caruṃ mekṣaṇaṃ piṇḍanidhānam ity ekaikaṃ barhiṣy āsādayati
- 10
परिश्रयत्य् आदित्यसकाशात्
pariśrayaty ādityasakāśāt
- 11
कशिपुं सोपधानं पश्चाद् अग्नेर् आस्तीर्य पितॄन् आवाहयति एत पितर इति
kaśipuṃ sopadhānaṃ paścād agner āstīrya pitṝn āvāhayati eta pitara iti
- 12
यज्ञोपवीती मेक्षणेन तिस्र आहुतीर्जुहोति
सोमाय पितृमते स्वधा नमः
यमायाङ्गिरस्वते स्वधा नमः
अग्नये कव्यवाहनाय स्वधा नम इति दक्षिणां दक्षिणाम्
yajñopavītī mekṣaṇena tisra āhutīrjuhoti
somāya pitṛmate svadhā namaḥ
yamāyāṅgirasvate svadhā namaḥ
agnaye kavyavāhanāya svadhā nama iti dakṣiṇāṃ dakṣiṇām
- 13
उदकलेपं मेक्षणम् अग्नाव् अनुप्रहरति
udakalepaṃ mekṣaṇam agnāv anupraharati
- 14
यजमानो ऽत ऊर्ध्वं परेतन पितर इति त्रिर् अपः परिषिञ्चति त्रिः पात्रं प्रतिपरिहरति
yajamāno 'ta ūrdhvaṃ paretana pitara iti trir apaḥ pariṣiñcati triḥ pātraṃ pratipariharati
- 15
त्रीन् उदकाञ्जलीन्निनयति आचामन्तु पितर इति
trīn udakāñjalīnninayati ācāmantu pitara iti
- 16
बर्हिषि त्रीन्पिण्डान्निदधाति दक्षिणं दक्षिणम् एतत्ते मम पितर् असाव् इति पितुर्नाम गृहीत्वैतत्ते मम पितामहासाव् इति पितामहस्यैतत्ते प्रपितामहासाव् इति प्रपितामहस्य
barhiṣi trīnpiṇḍānnidadhāti dakṣiṇaṃ dakṣiṇam etatte mama pitar asāv iti piturnāma gṛhītvaitatte mama pitāmahāsāv iti pitāmahasyaitatte prapitāmahāsāv iti prapitāmahasya
- 17
ये चात्र त्वाम् अनु तेभ्यः स्वधेत्य् अनुषजेत्
ye cātra tvām anu tebhyaḥ svadhety anuṣajet
- 18
एतत्ते ऽमुष्य पितर् एतत्ते ऽमुष्य पितामहैतत्ते ऽमुष्य प्रपितामहेति प्रवसति यजमाने ऽध्वर्युः
etatte 'muṣya pitar etatte 'muṣya pitāmahaitatte 'muṣya prapitāmaheti pravasati yajamāne 'dhvaryuḥ
- 19
यदि नामानि न जानीयात्स्वधा पितृभ्यः पृथिवीषद्भ्यः स्वधा पितृभ्यो ऽन्तरिक्षसद्भ्यः स्वधा पितृभ्यो दिविषद्भ्य इति निदध्यात्
yadi nāmāni na jānīyātsvadhā pitṛbhyaḥ pṛthivīṣadbhyaḥ svadhā pitṛbhyo 'ntarikṣasadbhyaḥ svadhā pitṛbhyo diviṣadbhya iti nidadhyāt
- 20
लुप्येत जीवत्पितुः पिण्डनिधानम्
lupyeta jīvatpituḥ piṇḍanidhānam
- 21
न जीवन्तम् अतिदद्यात्
na jīvantam atidadyāt
- 22
जीवत्पितामहश्चेत्पितुर् एकः पिण्डः
jīvatpitāmahaścetpitur ekaḥ piṇḍaḥ
- 23
लेपः पित्रे
lepaḥ pitre
- 24
तथोदकम् आञ्जनाभ्यञ्जने च
tathodakam āñjanābhyañjane ca
- 25
बर्हिषि लेपं निमार्ष्टि यात्र पितरः स्वधा तया यूयं यथाभागं मादयध्वम् इति
barhiṣi lepaṃ nimārṣṭi yātra pitaraḥ svadhā tayā yūyaṃ yathābhāgaṃ mādayadhvam iti
- 26
अत्र पितरो मादयध्वम् इत्य् उदङ्ङ् आवृत्या तमितोर् आसित्वा येह पितर ऊर्क्तस्यै वयं ज्योग्जीवन्तो भूयास्मेत्य् अमीमदन्त पितर इति परिश्रितं प्रपद्याञ्जनाक्ताः शलाकाः प्रतिपिण्डं निदधाति आङ्क्ष्वासाव् इत्य् आञ्जनेनाभ्यङ्क्ष्वासाव् इत्य् अभ्यञ्जनेन च
atra pitaro mādayadhvam ity udaṅṅ āvṛtyā tamitor āsitvā yeha pitara ūrktasyai vayaṃ jyogjīvanto bhūyāsmety amīmadanta pitara iti pariśritaṃ prapadyāñjanāktāḥ śalākāḥ pratipiṇḍaṃ nidadhāti āṅkṣvāsāv ity āñjanenābhyaṅkṣvāsāv ity abhyañjanena ca
- 27
एषा युष्माकं पितर इत्य् ऊर्णां दशां वा न्यस्यति
इमा अस्माकम् इत्य् अवशिष्टा अवेक्षते
eṣā yuṣmākaṃ pitara ity ūrṇāṃ daśāṃ vā nyasyati
imā asmākam ity avaśiṣṭā avekṣate
- 28
लोमोत्तरवयसि न्यस्येद् अतो नः पितरो ऽन्यन्मा योष्टेति
lomottaravayasi nyasyed ato naḥ pitaro 'nyanmā yoṣṭeti
- 29
तेन धर्मेण परिषिच्य मार्जयन्तां पितरो मार्जयन्तां पितामहा मार्जयन्तां प्रपितामहा इति बर्हिषि त्रीन् उदकाञ्जलीन्निनीय निह्नुते ऽञ्जलिं कृत्वा नमो वः पितरो मन्यवे
नमो वः पितर इषे
नमो वः पितर ऊर्जे
नमो वः पितरः शुष्माय
नमो वः पितरो रसाय
नमो वः पितरो बलाय
नमो वः पितरो यज्जीवं तस्मै
नमो वः पितरो यद्घोरं तस्मै
स्वधा वः पितरो नमो नमो वः पितरः
ये ऽत्र पितरः प्रेता युष्मांस्ते ऽनु य इह पितरो जीवा अस्मांस्ते ऽनु
ये ऽत्र पितरः प्रेता यूयं तेषां वसिष्ठा भूयास्थ य इह पितरो जीवा अहं तेषां वसिष्ठो भूयासम् इति
tena dharmeṇa pariṣicya mārjayantāṃ pitaro mārjayantāṃ pitāmahā mārjayantāṃ prapitāmahā iti barhiṣi trīn udakāñjalīnninīya nihnute 'ñjaliṃ kṛtvā namo vaḥ pitaro manyave
namo vaḥ pitara iṣe
namo vaḥ pitara ūrje
namo vaḥ pitaraḥ śuṣmāya
namo vaḥ pitaro rasāya
namo vaḥ pitaro balāya
namo vaḥ pitaro yajjīvaṃ tasmai
namo vaḥ pitaro yadghoraṃ tasmai
svadhā vaḥ pitaro namo namo vaḥ pitaraḥ
ye 'tra pitaraḥ pretā yuṣmāṃste 'nu ya iha pitaro jīvā asmāṃste 'nu
ye 'tra pitaraḥ pretā yūyaṃ teṣāṃ vasiṣṭhā bhūyāstha ya iha pitaro jīvā ahaṃ teṣāṃ vasiṣṭho bhūyāsam iti
- 30
शेषम् अवजिघ्रेत्
आमयाव्य् अन्नाद्यकामो वा प्राश्नीयात्
śeṣam avajighret
āmayāvy annādyakāmo vā prāśnīyāt

