14 shlokas
- 1
अथ प्राणाग्निहोत्रविधानम्
atha prāṇāgnihotravidhānam
- 2
स्वयंज्योतिरात्मा यजमानः
svayaṃjyotirātmā yajamānaḥ
- 3
बुद्धिः पत्नी
buddhiḥ patnī
- 4
हृदयपुण्डरीकं वेदिः
hṛdayapuṇḍarīkaṃ vediḥ
- 5
रोमाणि दर्भाः
romāṇi darbhāḥ
- 6
प्राणो गार्हपत्यो ऽपान आहवनीयो व्यानो ऽन्वाहार्य उदानः सभ्यः समान आवसथ्य इति पञ्चाग्नयो भवन्ति
prāṇo gārhapatyo 'pāna āhavanīyo vyāno 'nvāhārya udānaḥ sabhyaḥ samāna āvasathya iti pañcāgnayo bhavanti
- 7
जिह्वादीन्द्रियाणि यज्ञपात्राणि रसादयो विषया हवींषि
jihvādīndriyāṇi yajñapātrāṇi rasādayo viṣayā havīṃṣi
- 8
अस्य फलम् ओमर्थावाप्तिः
asya phalam omarthāvāptiḥ
- 9
तदेवम् एकाध्वर्युरात्मयज्ञं संकल्प्यामृतोपस्तरणम् असीत्य् अन्नं प्रोक्ष्यान्नसूक्तेनाभिमृश्योर्जस्करम् इत्य् आधावं पीत्वाङ्गुष्ठानामिकामध्यमैर् आदायान्नं प्राणाय स्वाहापानाय स्वाहा व्यानाय स्वाहोदानाय स्वाहा समानाय स्वाहेति पञ्चाहुतीः पात्रं स्पृशन्नेव हुत्वोर्जस्करमिति पुनश्चाधावं पीत्वाश्नीयात्
tadevam ekādhvaryurātmayajñaṃ saṃkalpyāmṛtopastaraṇam asīty annaṃ prokṣyānnasūktenābhimṛśyorjaskaram ity ādhāvaṃ pītvāṅguṣṭhānāmikāmadhyamair ādāyānnaṃ prāṇāya svāhāpānāya svāhā vyānāya svāhodānāya svāhā samānāya svāheti pañcāhutīḥ pātraṃ spṛśanneva hutvorjaskaramiti punaścādhāvaṃ pītvāśnīyāt
- 10
आचम्यापो गृहीत्वादित्याभिमुखम् ॐ प्राणान् आप्यायस्वेत्य् उदरम् अभिमृशेत्
ācamyāpo gṛhītvādityābhimukham oṃ prāṇān āpyāyasvety udaram abhimṛśet
- 11
दक्षिणेन कराङ्गुष्ठाग्रेणाणोर् अणीयानिति दक्षिणपादाङ्गुष्ठे संस्रावयेत्
dakṣiṇena karāṅguṣṭhāgreṇāṇor aṇīyāniti dakṣiṇapādāṅguṣṭhe saṃsrāvayet
- 12
एवं सायं प्रातः प्राणाग्निहोत्रं यजेत
evaṃ sāyaṃ prātaḥ prāṇāgnihotraṃ yajeta
- 13
आत्मयाजिनाम् इदम् इज्यम् अग्निहोत्रं यावज्जीवकमिति ब्रह्मवादिनो वदन्ति
ātmayājinām idam ijyam agnihotraṃ yāvajjīvakamiti brahmavādino vadanti
- 14
तदेवं भुक्त्वा गच्छन्तमनृणो ब्रह्मपदमभ्येतीति सामपूर्वं माता पिता गुरुर्वा पैतृकादिकम् ऋणत्रयं जायमानस्य ब्राह्मणस्य सहजातमित्युक्त्वा वारयेदिति विज्ञायते
tadevaṃ bhuktvā gacchantamanṛṇo brahmapadamabhyetīti sāmapūrvaṃ mātā pitā gururvā paitṛkādikam ṛṇatrayaṃ jāyamānasya brāhmaṇasya sahajātamityuktvā vārayediti vijñāyate

