3 shlokas
- 1
दक्षिणत उपसृजति
पितृलोकम् एव तेन जयति
प्राचीम् आवर्तयति
देवलोकम् एव तेन जयति
उदीचीम् आवृत्य दोग्धि
मनुष्यलोकम् एव तेन जयति
पूर्वौ दुह्याज्ज्येष्ठस्य ज्यैष्ठिनेयस्य
यो वा गतश्रीः स्यात्
अपरौ दुह्यात्कनिष्ठस्य कानिष्ठिनेयस्य
यो वा बुभूषेत्
dakṣiṇata upasṛjati
pitṛlokam eva tena jayati
prācīm āvartayati
devalokam eva tena jayati
udīcīm āvṛtya dogdhi
manuṣyalokam eva tena jayati
pūrvau duhyājjyeṣṭhasya jyaiṣṭhineyasya
yo vā gataśrīḥ syāt
aparau duhyātkaniṣṭhasya kāniṣṭhineyasya
yo vā bubhūṣet
- 2
न संमृशति
पापवस्यसस्य व्यावृत्त्यै
वायव्यं वा एतद् उपसृष्टम्
आश्विनं दुह्यमानम्
मैत्रं दुग्धम्
अर्यम्ण उद्वास्यमानम्
त्वाष्ट्रम् उन्नीयमानम्
बृहस्पतेर् उन्नीतम्
सवितुः प्रक्रान्तम्
द्यावापृथिव्यं ह्रियमाणम्
na saṃmṛśati
pāpavasyasasya vyāvṛttyai
vāyavyaṃ vā etad upasṛṣṭam
āśvinaṃ duhyamānam
maitraṃ dugdham
aryamṇa udvāsyamānam
tvāṣṭram unnīyamānam
bṛhaspater unnītam
savituḥ prakrāntam
dyāvāpṛthivyaṃ hriyamāṇam
- 3
ऐन्द्राग्नम् उपसादितम्
सर्वाभ्यो वा एष देवताभ्यो जुहोति
यो ऽग्निहोत्रं जुहोति
यथा खलु वै धेनुं तीर्थे तर्पयति
एवम् अग्निहोत्री यजमानं तर्पयति
तृप्यति प्रजया पशुभिः
प्र सुवर्गं लोकं जानाति
पश्यति पुत्रम्
पश्यति पौत्रम्
प्र प्रजया पशुभिर्मिथुनैर्जायते
यस्यैवं विदुषो ऽग्निहोत्रं जुह्वति
य उ चैनद् एवं वेद
aindrāgnam upasāditam
sarvābhyo vā eṣa devatābhyo juhoti
yo 'gnihotraṃ juhoti
yathā khalu vai dhenuṃ tīrthe tarpayati
evam agnihotrī yajamānaṃ tarpayati
tṛpyati prajayā paśubhiḥ
pra suvargaṃ lokaṃ jānāti
paśyati putram
paśyati pautram
pra prajayā paśubhirmithunairjāyate
yasyaivaṃ viduṣo 'gnihotraṃ juhvati
ya u cainad evaṃ veda

