5 shlokas
- 1
प्रजापतिर् अकामयतात्मन्वन्मे जायेतेति
सो ऽजुहोत्
तस्यात्मन्वद् अजायत
अग्निर्वायुर् आदित्यः
ते ऽब्रुवन्
प्रजापतिर् अहौषीद् आत्मन्वन्मे जायेतेति
तस्य वयम् अजनिष्महि
जायतां न आत्मन्वद् इति ते ऽजुहवुः
प्राणानाम् अग्निः
तनुवै वायुः
prajāpatir akāmayatātmanvanme jāyeteti
so 'juhot
tasyātmanvad ajāyata
agnirvāyur ādityaḥ
te 'bruvan
prajāpatir ahauṣīd ātmanvanme jāyeteti
tasya vayam ajaniṣmahi
jāyatāṃ na ātmanvad iti te 'juhavuḥ
prāṇānām agniḥ
tanuvai vāyuḥ
- 2
चक्षुष आदित्यः
तेषां हुताद् अजायत गौर् एव
तस्यै पयसि व्यायच्छन्त
मम हुताद् अजनि ममेति
ते प्रजापतिं प्रश्नम् आयन्
स आदित्यो ऽग्निम् अब्रवीत्
यतरो नौ जयात्
तन्नौ सहासद् इति
कस्यैको ऽहौषीद् इति प्रजापतिर् अब्रवीत्कस्यैक इति
प्राणानाम् अहम् इत्य् अग्निः
cakṣuṣa ādityaḥ
teṣāṃ hutād ajāyata gaur eva
tasyai payasi vyāyacchanta
mama hutād ajani mameti
te prajāpatiṃ praśnam āyan
sa ādityo 'gnim abravīt
yataro nau jayāt
tannau sahāsad iti
kasyaiko 'hauṣīd iti prajāpatir abravītkasyaika iti
prāṇānām aham ity agniḥ
- 3
तनुवा अहम् इति वायुः
चक्षुषो ऽहम् इत्य् आदित्यः
य एव प्राणानाम् अहौषीत्
तस्य हुताद् अजनीति
अग्नेर्हुताद् अजनीति
तद् अग्निहोत्रस्याग्निहोत्रत्वम्
गौर्वा अग्निहोत्रम्
य एवं वेद गौर् अग्निहोत्रम् इति
प्राणापानाभ्याम् एवाग्निं समर्धयति
अव्यर्धुकः प्राणापानाभ्यां भवति
tanuvā aham iti vāyuḥ
cakṣuṣo 'ham ity ādityaḥ
ya eva prāṇānām ahauṣīt
tasya hutād ajanīti
agnerhutād ajanīti
tad agnihotrasyāgnihotratvam
gaurvā agnihotram
ya evaṃ veda gaur agnihotram iti
prāṇāpānābhyām evāgniṃ samardhayati
avyardhukaḥ prāṇāpānābhyāṃ bhavati
- 4
य एवं वेद
तौ वायुर् अब्रवीत्
अनु माभजतम् इति
यद् एव गार्हपत्ये ऽधिश्रित्याहवनीयम् अभ्युद्द्रवान्
तेन त्वां प्रीणान् इत्य् अब्रूताम्
तस्माद्यद्गार्हपत्ये ऽधिश्रित्याहवनीयम् अभ्युद्द्रवति
वायुम् एव तेन प्रीणाति
प्रजापतिर्देवताः सृजमानः
अग्निम् एव देवतानां प्रथमम् असृजत
सो ऽन्यद् आलम्भ्यम् अवित्त्वा
ya evaṃ veda
tau vāyur abravīt
anu mābhajatam iti
yad eva gārhapatye 'dhiśrityāhavanīyam abhyuddravān
tena tvāṃ prīṇān ity abrūtām
tasmādyadgārhapatye 'dhiśrityāhavanīyam abhyuddravati
vāyum eva tena prīṇāti
prajāpatirdevatāḥ sṛjamānaḥ
agnim eva devatānāṃ prathamam asṛjata
so 'nyad ālambhyam avittvā
- 5
प्रजापतिम् अभि पर्यावर्तत
स मृत्योर् अबिभेत्
सो ऽमुम् आदित्यम् आत्मनो निरमिमीत
तं हुत्वा पराङ्पर्यावर्तत
ततो वै स मृत्युम् अपाजयत्
अप मृत्युं जयति
य एवं वेद
तस्माद्यस्यैवं विदुषः
उतैकाहम् उत द्व्यहं न जुह्वति
हुतम् एवास्य भवति
असौ ह्य् आदित्यो ऽग्निहोत्रम्
prajāpatim abhi paryāvartata
sa mṛtyor abibhet
so 'mum ādityam ātmano niramimīta
taṃ hutvā parāṅparyāvartata
tato vai sa mṛtyum apājayat
apa mṛtyuṃ jayati
ya evaṃ veda
tasmādyasyaivaṃ viduṣaḥ
utaikāham uta dvyahaṃ na juhvati
hutam evāsya bhavati
asau hy ādityo 'gnihotram

