3 shlokas
- 1
अथानन्तरं भद्रश्रीलोहभाण्डीरमहातालखदिरवकुलकुमुदकाम्यमधुबृन्दावनानि द्वादशवनानि कालिन्द्याः पश्चिमे सप्तवनानि पूर्वस्मिन् पञ्चवनानि उत्तरस्मिन् गुह्यानि सन्ति । मथुरावनमधुवनमहावनखादिरवनभाण्डीरवननन्दीश्वरवननन्दवनानन्दवनखाण्डववनपलाशवनाशोकवनकेतकवनद्रुमवन-गन्धमादनवनशेषशायिवनश्यामायुवनभुज्युवनदधिवनवृषभानुवनसंकेतवनदीपवनरासवनक्रीडावनोत्सुकवनान्येतानि चतुर्विंशतिवनानि नित्यस्थलानि नानालीलयाधिष्ठाय कृष्णः क्रीडति । [ तानि वनानि ] वसन्तऋतुसेवितानि मन्दादिपवनयुक्तानि [सन्ति ] यत्र दुःखं नास्ति सुखं नास्ति जरा नास्ति मरणं नास्ति क्रोधो नास्ति तत्र पूर्णानन्दमयः श्रीकैशोरकृष्णः शिखण्डिदललम्बितत्रियुमगुञ्जावतंसमणिमयकिरीटशिराः गोरोचनातिलकः कर्णयोर्मकरकुण्डलो वन्यस्रग्वी मालतीदामभूषितशरीरः करे कङ्कणं बाहौ केयूरं पादयोः किङ्किर्णी कट्यां पीताम्ब [रं च धारयन् ] गम्भीरनाभिकमलः सुवृत्तनासायुगलो ध्वजवज्रादिचिह्नितपादपद्म महाविष्णु [ रास्ते ] ।
athānantaraṃ bhadraśrīlohabhāṇḍīramahātālakhadiravakulakumudakāmyamadhubṛndāvanāni dvādaśavanāni kālindyāḥ paścime saptavanāni pūrvasmin pañcavanāni uttarasmin guhyāni santi | mathurāvanamadhuvanamahāvanakhādiravanabhāṇḍīravananandīśvaravananandavanānandavanakhāṇḍavavanapalāśavanāśokavanaketakavanadrumavana-gandhamādanavanaśeṣaśāyivanaśyāmāyuvanabhujyuvanadadhivanavṛṣabhānuvanasaṃketavanadīpavanarāsavanakrīḍāvanotsukavanānyetāni caturviṃśativanāni nityasthalāni nānālīlayādhiṣṭhāya kṛṣṇaḥ krīḍati | [ tāni vanāni ] vasantaṛtusevitāni mandādipavanayuktāni [santi ] yatra duḥkhaṃ nāsti sukhaṃ nāsti jarā nāsti maraṇaṃ nāsti krodho nāsti tatra pūrṇānandamayaḥ śrīkaiśorakṛṣṇaḥ śikhaṇḍidalalambitatriyumaguñjāvataṃsamaṇimayakirīṭaśirāḥ gorocanātilakaḥ karṇayormakarakuṇḍalo vanyasragvī mālatīdāmabhūṣitaśarīraḥ kare kaṅkaṇaṃ bāhau keyūraṃ pādayoḥ kiṅkirṇī kaṭyāṃ pītāmba [raṃ ca dhārayan ] gambhīranābhikamalaḥ suvṛttanāsāyugalo dhvajavajrādicihnitapādapadma mahāviṣṇu [ rāste ] |
- 2
एवंरूपं कृष्णचन्द्रं चिन्तयेन्नित्यशः सुधीः ॥ इति ॥
evaṃrūpaṃ kṛṣṇacandraṃ cintayennityaśaḥ sudhīḥ || iti ||
- 3
तस्याद्या प्रकृती राधिका नित्या निर्गुणा सर्वालङ्कारशोभिता प्रसन्नाशेषलावण्यसुन्दरी । अस्मदादीनां जन्म तदधीनं अस्यांशाद्बहवो विष्णुरुद्रादयो भवन्ति । एवंभूतस्यागाधमहिम्नः सुखसिन्धोरुत्पन्नमिति मानसपूजया ध्यानेन कीर्तनेन स्तुत्या मानसेन सर्वेण नित्यस्थलं प्राप्नोति । नान्येनेति । नान्येनेति । नान्येनेति । इति वेदवचनं भवति । इति वेदवचनं भवति । इति वेदवचनं भवति ॥
tasyādyā prakṛtī rādhikā nityā nirguṇā sarvālaṅkāraśobhitā prasannāśeṣalāvaṇyasundarī | asmadādīnāṃ janma tadadhīnaṃ asyāṃśādbahavo viṣṇurudrādayo bhavanti | evaṃbhūtasyāgādhamahimnaḥ sukhasindhorutpannamiti mānasapūjayā dhyānena kīrtanena stutyā mānasena sarveṇa nityasthalaṃ prāpnoti | nānyeneti | nānyeneti | nānyeneti | iti vedavacanaṃ bhavati | iti vedavacanaṃ bhavati | iti vedavacanaṃ bhavati ||

