10 shlokas
- 1
भरद्वाजायना वै सत्त्रम् आसत तान् अपृच्छन्किं प्रथमेनाह्ना कुरुतेति प्रैवैमेति किं द्वितीयेनेत्य् अवसम् एवाकुर्महीति किं तृतीयेनेति पर्य् एवाप्लवामहीति किं चतुर्थेनेति सतैव सद् अप्यदध्मेति किं पञ्चमेनेति प्राणान् एव विच्छिन्दन्त ऐमेति किं षष्ठेनेतीदम् एवागच्छामेति
bharadvājāyanā vai sattram āsata tān apṛcchankiṃ prathamenāhnā kuruteti praivaimeti kiṃ dvitīyenety avasam evākurmahīti kiṃ tṛtīyeneti pary evāplavāmahīti kiṃ caturtheneti sataiva sad apyadadhmeti kiṃ pañcameneti prāṇān eva vicchindanta aimeti kiṃ ṣaṣṭhenetīdam evāgacchāmeti
- 2
यस्य पदेन प्रस्तौत्य् अथ स्वारम् अभि वाव तेन देवाः पशून् अपश्यन्यत्पुरस्तात्स्तोभं अथ स्वारम् उद् एव तेनासृजन्त यद् उभयतः स्तोभम् अथ स्वारम् एभ्य एव तेन लोकेभ्यो देवाः पशुभ्यो ऽन्नाद्यं प्रायच्छन्यद् अनुतुन्नम् अथ स्वारम् उपैव तेनाशिक्षन्यस्य मध्ये निधनम् अथ स्वारं गर्भांस्तेनादधत तान् इहवता स्वारेण प्राजनयन्
yasya padena prastauty atha svāram abhi vāva tena devāḥ paśūn apaśyanyatpurastātstobhaṃ atha svāram ud eva tenāsṛjanta yad ubhayataḥ stobham atha svāram ebhya eva tena lokebhyo devāḥ paśubhyo 'nnādyaṃ prāyacchanyad anutunnam atha svāram upaiva tenāśikṣanyasya madhye nidhanam atha svāraṃ garbhāṃstenādadhata tān ihavatā svāreṇa prājanayan
- 3
इमं वाव देवा लोकं पदनिधनेनाभ्यजयन्न् अमुं बहिर्णिधनेनान्तरिक्षं दिङ्निधनेनामृतत्वम् ईनिधनेनागच्छन्ब्रह्मवर्चसम् अथनिधनेनावारुन्धतास्मिन्न् एव लोक इहनिधनेन प्रत्यतिष्ठन्
imaṃ vāva devā lokaṃ padanidhanenābhyajayann amuṃ bahirṇidhanenāntarikṣaṃ diṅnidhanenāmṛtatvam īnidhanenāgacchanbrahmavarcasam athanidhanenāvārundhatāsminn eva loka ihanidhanena pratyatiṣṭhan
- 4
इमं वाव देवा लोकं द्रवदिडेनाभ्यजयन्न् अमुम् ऊर्ध्वेडेनान्तरिक्षं परिष्टुब्धेडेन प्रतिष्ठाम् इडाभिर् ऐडेनावारुन्धत प्रतिष्ठायाध्यर्धेडेन व्यजयन्तास्मिन्न् एव लोक इहेडेन प्रत्यतिष्ठन्
imaṃ vāva devā lokaṃ dravadiḍenābhyajayann amum ūrdhveḍenāntarikṣaṃ pariṣṭubdheḍena pratiṣṭhām iḍābhir aiḍenāvārundhata pratiṣṭhāyādhyardheḍena vyajayantāsminn eva loka iheḍena pratyatiṣṭhan
- 5
न वाक्संवत्सरम् अतिवदतीडैव संवत्सरम् अतिवदति गर्भेण संवत्सरे पर्यावृत्य प्रजायते तेनातिवदति
na vāksaṃvatsaram ativadatīḍaiva saṃvatsaram ativadati garbheṇa saṃvatsare paryāvṛtya prajāyate tenātivadati
- 6
ता वा एताश्चतस्रः षडहं पराच्य इडा अतियन्त्य् एषानुनूतैषा विषूच्य् एषा प्रतीच्य् एतद्द्वीडम्
tā vā etāścatasraḥ ṣaḍahaṃ parācya iḍā atiyanty eṣānunūtaiṣā viṣūcy eṣā pratīcy etaddvīḍam
- 7
संवत्सरो ऽग्निर्वाक्संवत्सरो यद् अग्निर्विभज्यते वाचम् एव तद्विभजन्ति
saṃvatsaro 'gnirvāksaṃvatsaro yad agnirvibhajyate vācam eva tadvibhajanti
- 8
द्वे द्वे अक्षरे विभजन्ति द्वौ द्वौ हि मासाव् ऋतुर् अथो मासानाम् एव तद्रूपं क्रियते
dve dve akṣare vibhajanti dvau dvau hi māsāv ṛtur atho māsānām eva tadrūpaṃ kriyate
- 9
षड् अहानि विभजन्ति षड् ऋतव ऋतूनां धृत्या ऋतूनां प्रतिष्ठित्या अथो ऋतूनाम् एव तद्रूपं क्रियते षड् उ पुरुषा यान् अग्निर् अनुविह्रियते
ṣaḍ ahāni vibhajanti ṣaḍ ṛtava ṛtūnāṃ dhṛtyā ṛtūnāṃ pratiṣṭhityā atho ṛtūnām eva tadrūpaṃ kriyate ṣaḍ u puruṣā yān agnir anuvihriyate
- 10
यद् इदं बहुधाग्निर्विह्रियते तद् असाव् आदित्यः सर्वाः प्रजाः प्रत्यङ्तस्माद् एते देवते विभक्तिम् आनशाते नातो ऽन्या काचन
yad idaṃ bahudhāgnirvihriyate tad asāv ādityaḥ sarvāḥ prajāḥ pratyaṅtasmād ete devate vibhaktim ānaśāte nāto 'nyā kācana

