41 shlokas
- 1
उपमध्यमायां हिरण्यम् आबध्यास्माको ऽसीति परिश्रितं प्रविशन्ति
upamadhyamāyāṃ hiraṇyam ābadhyāsmāko 'sīti pariśritaṃ praviśanti
- 2
शुक्रस्ते ग्रह इति सहिरण्येन पाणिनाभिमृशति
śukraste graha iti sahiraṇyena pāṇinābhimṛśati
- 3
प्राग्दशे क्षौमे राजानं मिमीत ऋज्वीभिर् अङ्गुलीभिर् अङ्गुष्ठेन चोपसंयम्य कनिष्ठिकाप्रभृतिभिर् एकैकया कनिष्ठिकातो ऽभि त्यं देवं सवितारम् इति पञ्चकृत्वस्तूष्णीं पञ्चकृत्वो यया प्रथमं न तया पञ्चमं तयैवोत्तमम्
prāgdaśe kṣaume rājānaṃ mimīta ṛjvībhir aṅgulībhir aṅguṣṭhena copasaṃyamya kaniṣṭhikāprabhṛtibhir ekaikayā kaniṣṭhikāto 'bhi tyaṃ devaṃ savitāram iti pañcakṛtvastūṣṇīṃ pañcakṛtvo yayā prathamaṃ na tayā pañcamaṃ tayaivottamam
- 4
प्रजाभ्यस्त्वेति भूयांसम् अभ्यूहति
prajābhyastveti bhūyāṃsam abhyūhati
- 5
प्रजास्त्वानुप्राणन्त्व् इति क्षौम उष्णीषेणोपनह्यति लाङ्गलबन्धम्
prajāstvānuprāṇantv iti kṣauma uṣṇīṣeṇopanahyati lāṅgalabandham
- 6
एष ते गायत्रो भाग इति मे सोमाय ब्रूताद् एष ते त्रैष्टुभो भाग इति मे सोमाय ब्रूताद् एष ते जागतो भाग इति मे सोमाय ब्रूताद् एष त आनुष्टुभो भाग इति मे सोमाय ब्रूताद् एष ते पाङ्क्तो भाग इति मे सोमाय ब्रूताच्छन्दोमानां साम्राज्यं गच्छेद् इति मे सोमाय ब्रूताद् इति यजमानो राजानम् उपतिष्ठते
eṣa te gāyatro bhāga iti me somāya brūtād eṣa te traiṣṭubho bhāga iti me somāya brūtād eṣa te jāgato bhāga iti me somāya brūtād eṣa ta ānuṣṭubho bhāga iti me somāya brūtād eṣa te pāṅkto bhāga iti me somāya brūtācchandomānāṃ sāmrājyaṃ gacched iti me somāya brūtād iti yajamāno rājānam upatiṣṭhate
- 7
उदकुम्भे सोमविक्रयी राजानम् आदधाति
udakumbhe somavikrayī rājānam ādadhāti
- 8
सोमविक्रयिन्सोमं ते क्रीणानीत्य् आमन्त्रयते
क्रीणीहीति प्रत्याह
somavikrayinsomaṃ te krīṇānīty āmantrayate
krīṇīhīti pratyāha
- 9
कलया ते क्रीणानीति यथाम्नातम् एकैकेन पणते
भूयो वा अतः सोमो राजार्हतीति प्रत्याह
kalayā te krīṇānīti yathāmnātam ekaikena paṇate
bhūyo vā ataḥ somo rājārhatīti pratyāha
- 10
इयं गौस्तया ते क्रीणानीति तस्या रूपं तस्या वर्णं तस्या आत्मा तस्याः प्रजास्तस्याः पय इति
क्रीत इति प्रत्याह
iyaṃ gaustayā te krīṇānīti tasyā rūpaṃ tasyā varṇaṃ tasyā ātmā tasyāḥ prajāstasyāḥ paya iti
krīta iti pratyāha
- 11
यथाम्नातं सोमक्रयणान् अपाकरोति
शुक्रं ते शुक्र शुक्रेणेति हिरण्यं तपसस्तनूर् असीत्य् अजां प्रत्याछिद्य सोमक्रयणात्सुवाङ्नभ्राड् इत्य् अनुदिशति
yathāmnātaṃ somakrayaṇān apākaroti
śukraṃ te śukra śukreṇeti hiraṇyaṃ tapasastanūr asīty ajāṃ pratyāchidya somakrayaṇātsuvāṅnabhrāḍ ity anudiśati
- 12
सोमविक्रयिणे किंचिद्दद्यात्
somavikrayiṇe kiṃciddadyāt
- 13
कृष्णशुक्लयोर् ऊर्णास्तुकयोर् अस्मे ज्योतिर् इति शुक्लां यजमानाय प्रयच्छति
तां पवित्रस्य नाभिं कुर्यात्
kṛṣṇaśuklayor ūrṇāstukayor asme jyotir iti śuklāṃ yajamānāya prayacchati
tāṃ pavitrasya nābhiṃ kuryāt
- 14
इदम् अहं सर्पाणां दन्दशूकानां ग्रीवा उपग्रथ्नामीति कृष्णाया ग्रन्थिं कृत्वा सोमविक्रयिणि तम इति तम् अभिन्यस्येत्
idam ahaṃ sarpāṇāṃ dandaśūkānāṃ grīvā upagrathnāmīti kṛṣṇāyā granthiṃ kṛtvā somavikrayiṇi tama iti tam abhinyasyet
- 15
स्वजा असीति राजानम् आदत्ते
svajā asīti rājānam ādatte
- 16
आह्रियमाणे यजमानो ऽपावृत्योपविशति
āhriyamāṇe yajamāno 'pāvṛtyopaviśati
- 17
मित्रो न एहीति जपति
mitro na ehīti japati
- 18
वस्त्रान्तम् उत्कृष्येन्द्रस्योरुम् आविशेति दक्षिणस्मिन्न् ऊराव् आसादयति
vastrāntam utkṛṣyendrasyorum āviśeti dakṣiṇasminn ūrāv āsādayati
- 19
उद् आयुषेत्य् आदायोत्तिष्ठति
ud āyuṣety ādāyottiṣṭhati
- 20
उर्व् अन्तरिक्षं वीहीत्य् अनो ऽभिप्रव्रज्य पूर्वार्धे नीडे ऽदित्यास्त्वग् असीति कृष्णाजिनम् आस्तृणाति
urv antarikṣaṃ vīhīty ano 'bhipravrajya pūrvārdhe nīḍe 'dityāstvag asīti kṛṣṇājinam āstṛṇāti
- 21
अदित्याः सद आसीदेति तस्मिन्राजानम् आसादयति
adityāḥ sada āsīdeti tasminrājānam āsādayati
- 22
अस्तभ्नाद्द्याम् इत्य् अन उपतिष्ठते
astabhnāddyām ity ana upatiṣṭhate
- 23
वनेषु व्य् अन्तरिक्षम् इत्य् अनो वाससा पर्याणह्यति
vaneṣu vy antarikṣam ity ano vāsasā paryāṇahyati
- 24
धूर् असीति धुरम् अभिमृशत्य् उत्तरां च
dhūr asīti dhuram abhimṛśaty uttarāṃ ca
- 25
उदङ्ङ् अतिक्रम्य वारुणम् असीत्य् उत्तराम् ईषाम् आरभ्य जपति
udaṅṅ atikramya vāruṇam asīty uttarām īṣām ārabhya japati
- 26
वरुणस्त्वोत्तभ्नात्व् इत्य् उपस्तभ्नोति
varuṇastvottabhnātv ity upastabhnoti
- 27
उस्राव् एतं धूर्वाहौ युज्येथाम् अनश्रू अवीरहणौ ब्रह्मचोदनौ यज्ञस्यायुः प्रतिरन्तौ स्वस्ति यजमानस्य गृहान्गच्छतम् इति धुर्याव् उपाजते
usrāv etaṃ dhūrvāhau yujyethām anaśrū avīrahaṇau brahmacodanau yajñasyāyuḥ pratirantau svasti yajamānasya gṛhāngacchatam iti dhuryāv upājate
- 28
वरुणस्य स्कम्भो ऽसीति युनक्त्य् एवम् उत्तरम्
varuṇasya skambho 'sīti yunakty evam uttaram
- 29
दक्षिणं छदिरन्तम् आरभ्य सोमाय क्रीताय प्रोह्यमाणायानुब्रूहीत्य् अनुवाचयति
dakṣiṇaṃ chadirantam ārabhya somāya krītāya prohyamāṇāyānubrūhīty anuvācayati
- 30
त्रिरनूक्तायां सुब्रह्मण्य सुब्रह्मण्याम् आह्वयेति प्रेष्यति
triranūktāyāṃ subrahmaṇya subrahmaṇyām āhvayeti preṣyati

