19 shlokas
- 1
शंय्वन्तं प्रायणीयं शम्य्वन्तम् उदयनीयम्
śaṃyvantaṃ prāyaṇīyaṃ śamyvantam udayanīyam
- 2
पथ्यां स्वस्तिं प्रथमां प्रायणीये यजति
pathyāṃ svastiṃ prathamāṃ prāyaṇīye yajati
- 3
अथाग्निम् अथ सोमम् अथ सवितारम् अथादितिम्
athāgnim atha somam atha savitāram athāditim
- 4
स्वर्गं वै लोकं प्रायणीयेनाभिप्रैति
svargaṃ vai lokaṃ prāyaṇīyenābhipraiti
- 5
तद्यत्पुरस्तात्पथ्यां स्वस्तिं यजति
tadyatpurastātpathyāṃ svastiṃ yajati
- 6
स्वस्त्ययनम् एव तत्कुरुते स्वर्गस्य लोकस्य समष्ट्यै
svastyayanam eva tatkurute svargasya lokasya samaṣṭyai
- 7
अग्निं प्रथमम् उदयनीये यजति
agniṃ prathamam udayanīye yajati
- 8
अथ सोमम् अथ सवितारम् अथ पथ्यां स्वस्तिम् अथादितिम्
atha somam atha savitāram atha pathyāṃ svastim athāditim
- 9
इमं वै लोकम् उदयनीयेन प्रत्येति
imaṃ vai lokam udayanīyena pratyeti
- 10
तद्यत्परस्तात्पथ्यां स्वस्तिं यजति
tadyatparastātpathyāṃ svastiṃ yajati
- 11
स्वस्त्ययनम् एव तत्कुरुते ऽस्य लोकस्य समष्ट्यै
svastyayanam eva tatkurute 'sya lokasya samaṣṭyai
- 12
ता वै पञ्च देवता यजति
tā vai pañca devatā yajati
- 13
ताभिर्यत्किंच पञ्चविधम् अधिदैवतम् अध्यात्मं तत्सर्वम् आप्नोति
tābhiryatkiṃca pañcavidham adhidaivatam adhyātmaṃ tatsarvam āpnoti
- 14
तासां याज्यापुरोनुवाक्याः
tāsāṃ yājyāpuronuvākyāḥ
- 15
ता वै स्वस्तिमत्यः पथिमत्यः पारितवत्यः प्रवत्यो नीतवत्यो भवन्ति
tā vai svastimatyaḥ pathimatyaḥ pāritavatyaḥ pravatyo nītavatyo bhavanti
- 16
मरुतो ह वै देवविशो ऽन्तरिक्षभाजना ईश्वरा यजमानस्य स्वर्गं लोकं यतो यज्ञवेशसं कर्तोः
maruto ha vai devaviśo 'ntarikṣabhājanā īśvarā yajamānasya svargaṃ lokaṃ yato yajñaveśasaṃ kartoḥ
- 17
तद्यत्स्वस्तिमत्यः पथिमत्यः पारितवत्यः प्रवत्यो नीतवत्यो भवन्ति
tadyatsvastimatyaḥ pathimatyaḥ pāritavatyaḥ pravatyo nītavatyo bhavanti
- 18
नैनं मरुतो देवविशो हिंसन्ति
nainaṃ maruto devaviśo hiṃsanti
- 19
स्वस्ति स्वर्गं लोकं समश्नुते
svasti svargaṃ lokaṃ samaśnute

