17 shlokas
- 1
स स्तुते पवमान एतं जपं जपेत्
sa stute pavamāna etaṃ japaṃ japet
- 2
उपहूता देवा अस्य सोमस्य पवमानस्य विचक्षणस्य भक्ष उप मां देवा ह्वयन्ताम् अस्य सोमस्य पवमानस्य विचक्षणस्य भक्षे मनसा त्वा भक्षयामि वाचा त्वा भक्षयामि प्राणेन त्वा भक्षयामि चक्षुषा त्वा भक्षयामि श्रोत्रेण त्वा भक्षयामीति
upahūtā devā asya somasya pavamānasya vicakṣaṇasya bhakṣa upa māṃ devā hvayantām asya somasya pavamānasya vicakṣaṇasya bhakṣe manasā tvā bhakṣayāmi vācā tvā bhakṣayāmi prāṇena tvā bhakṣayāmi cakṣuṣā tvā bhakṣayāmi śrotreṇa tvā bhakṣayāmīti
- 3
स एष देवैः समुपहवः
sa eṣa devaiḥ samupahavaḥ
- 4
तथा हास्यासौ सोमो राजा विचक्षणश्चन्द्रमा भक्षो भक्षितो भवति यम् अमुं देवा भक्षं भक्षयन्ति
tathā hāsyāsau somo rājā vicakṣaṇaścandramā bhakṣo bhakṣito bhavati yam amuṃ devā bhakṣaṃ bhakṣayanti
- 5
अथ पशुः
atha paśuḥ
- 6
सोम एवैष प्रत्यक्षं यत्पशुः
soma evaiṣa pratyakṣaṃ yatpaśuḥ
- 7
उदकपेयम् इव हि स्याद्यद् एष नालभ्येत
udakapeyam iva hi syādyad eṣa nālabhyeta
- 8
सवनान्य् एतेन तीव्रीकरोति
savanāny etena tīvrīkaroti
- 9
तद्यद्वपया चरन्ति तेन प्रातःसवनं तीव्रीकृतम्
tadyadvapayā caranti tena prātaḥsavanaṃ tīvrīkṛtam
- 10
यच्छ्रपयन्ति यत्पशुपुरोडाशेन चरन्ति तेन माध्यंदिनं सवनं तीव्रीकृतम्
yacchrapayanti yatpaśupuroḍāśena caranti tena mādhyaṃdinaṃ savanaṃ tīvrīkṛtam
- 11
अथ यद् एनेन तृतीयसवने प्रचरन्ति तेन तृतीयसवनं तीव्रीकृतम्
atha yad enena tṛtīyasavane pracaranti tena tṛtīyasavanaṃ tīvrīkṛtam
- 12
स एष सवनानाम् एव तीव्रीकारः
sa eṣa savanānām eva tīvrīkāraḥ
- 13
याश्च सोमपा देवताः याश्च पशुभाजनास्त्रयस्त्रिंशद्वै सोमपा देवताः
yāśca somapā devatāḥ yāśca paśubhājanāstrayastriṃśadvai somapā devatāḥ
- 14
याः सोमाहुतीर् अन्वायत्ता अष्टौ वसव एकादश रुद्रा द्वादशादित्या इन्द्रो द्वात्रिंशः
yāḥ somāhutīr anvāyattā aṣṭau vasava ekādaśa rudrā dvādaśādityā indro dvātriṃśaḥ
- 15
प्रजापतिस्त्रयस्त्रिंशः
prajāpatistrayastriṃśaḥ
- 16
त्रयस्त्रिंशत्पशुभाजनाः
trayastriṃśatpaśubhājanāḥ
- 17
ता उभय्यः प्रीता भवन्ति यद् एष आलभ्यते
tā ubhayyaḥ prītā bhavanti yad eṣa ālabhyate

