104 shlokas
- 1
श्रीभगवानुवाच
बलिदानं ततः पश्चात्कुर्याद्देव्याः प्रमोदकम्
मोदकैर्गजवक्त्रं च हविषा तोषयेद्रविम्
śrībhagavānuvāca
balidānaṃ tataḥ paścātkuryāddevyāḥ pramodakam
modakairgajavaktraṃ ca haviṣā toṣayedravim
- 2
तौर्यत्रिकैश्च नियमैः शंकरं तोषयेद्धरिम्
चण्डिकां बलिदानेन तोषयेत्साधकः सदा
tauryatrikaiśca niyamaiḥ śaṃkaraṃ toṣayeddharim
caṇḍikāṃ balidānena toṣayetsādhakaḥ sadā
- 3
पक्षिणः कच्छपा ग्राहाश्छागलाश्च वराहकाः
महिषो गोधिका शोषा तथा नवविधा मृगाः
pakṣiṇaḥ kacchapā grāhāśchāgalāśca varāhakāḥ
mahiṣo godhikā śoṣā tathā navavidhā mṛgāḥ
- 4
चामरः कृष्णसारश्च शशः पञ्चाननस्तथा
मत्स्याः स्वगात्ररुधिरैश्चाष्टधा बलयो महाः
cāmaraḥ kṛṣṇasāraśca śaśaḥ pañcānanastathā
matsyāḥ svagātrarudhiraiścāṣṭadhā balayo mahāḥ
- 5
अभावे च तथैवैषां कदाचिद्धयहस्तिनौ
छागलाः शरभाश्चैव नरश्चैव यथाक्रमात्
abhāve ca tathaivaiṣāṃ kadāciddhayahastinau
chāgalāḥ śarabhāścaiva naraścaiva yathākramāt
- 6
बलिर्महाबलिरिति बलयः परिकीर्तिताः
स्नापयित्वा बलिं तत्र पुष्पचन्दनधूपकैः
balirmahābaliriti balayaḥ parikīrtitāḥ
snāpayitvā baliṃ tatra puṣpacandanadhūpakaiḥ
- 7
पूजयेत्साधको देवीं बलिमन्त्रैर्मुहुर्मुहुः
उत्तराभिमुखो भूत्वा बलिं पूर्वमुखं तथा
pūjayetsādhako devīṃ balimantrairmuhurmuhuḥ
uttarābhimukho bhūtvā baliṃ pūrvamukhaṃ tathā
- 8
निरीक्ष्य साधकः पश्चादिमं मन्त्रमुदीरयेत्
वरस्त्वं बलिरूपेण मम भाग्यादुपस्थितः
nirīkṣya sādhakaḥ paścādimaṃ mantramudīrayet
varastvaṃ balirūpeṇa mama bhāgyādupasthitaḥ
- 9
प्रणमामि ततः सर्वरूपिणं बलरूपिणम्
चण्डिका प्रीतिदानेन दातुरापद्विनाशनः
praṇamāmi tataḥ sarvarūpiṇaṃ balarūpiṇam
caṇḍikā prītidānena dāturāpadvināśanaḥ
- 10
वैष्णवीबलिरूपाय बले तुभ्यं नमो नमः
यज्ञार्थे पशवः सृष्टाः स्वयमेव स्वयम्भुवा
vaiṣṇavībalirūpāya bale tubhyaṃ namo namaḥ
yajñārthe paśavaḥ sṛṣṭāḥ svayameva svayambhuvā
- 11
अतस्त्वां घातयाम्यद्य तस्माद्यज्ञे वधोऽवधः
ॐ ऐं हीं श्रीं इति मन्त्रेण तं बलिं कामरूपिणम्
atastvāṃ ghātayāmyadya tasmādyajñe vadho'vadhaḥ
oṃ aiṃ hīṃ śrīṃ iti mantreṇa taṃ baliṃ kāmarūpiṇam
- 12
चिन्तयित्वा न्यसेत्पुष्पं मूर्ध्नि तस्य च भैरव
ततो देवीं समुद्दिश्य काममुद्दिश्य चात्मनः
cintayitvā nyasetpuṣpaṃ mūrdhni tasya ca bhairava
tato devīṃ samuddiśya kāmamuddiśya cātmanaḥ
- 13
अभिषिच्य बलिं पश्चात्करवालं प्रपूजयेत्
रसना त्वं चण्डिकायां सुरलोकप्रसाधक
abhiṣicya baliṃ paścātkaravālaṃ prapūjayet
rasanā tvaṃ caṇḍikāyāṃ suralokaprasādhaka
- 14
ऐं ह्रीं श्रीं इति मन्त्रेण ध्यात्वा खड्गं प्रपूजयेत्
कृष्णं पिनाकपाणिं च कालरात्रिस्वरूपिणम्
aiṃ hrīṃ śrīṃ iti mantreṇa dhyātvā khaḍgaṃ prapūjayet
kṛṣṇaṃ pinākapāṇiṃ ca kālarātrisvarūpiṇam
- 15
उग्रं रक्तास्यनयनं रक्तमाल्यानुलेपनम्
रक्ताम्बरधरं चैकं पाशहस्तं कुटुम्बिनम्
ugraṃ raktāsyanayanaṃ raktamālyānulepanam
raktāmbaradharaṃ caikaṃ pāśahastaṃ kuṭumbinam
- 16
पीयमानं च रुधिरं भुञ्जानं क्रव्यसंहतिम्
असिर्विशसनः खड्गस्तीक्ष्णधारो दुरासदः
pīyamānaṃ ca rudhiraṃ bhuñjānaṃ kravyasaṃhatim
asirviśasanaḥ khaḍgastīkṣṇadhāro durāsadaḥ
- 17
श्रीगर्वो विजयश्चैव धर्मपाल नमोऽस्तु ते
पूजयित्वा ततः खड्गम् ॐ आं ह्रीं फडितिमन्त्रकैः
śrīgarvo vijayaścaiva dharmapāla namo'stu te
pūjayitvā tataḥ khaḍgam oṃ āṃ hrīṃ phaḍitimantrakaiḥ
- 18
गृहीत्वा विमलं खड्गं छेदयेद्बलिमुत्तमम्
ततो बलीनां रुधिरं तोयसैन्धवसत्फलैः
gṛhītvā vimalaṃ khaḍgaṃ chedayedbalimuttamam
tato balīnāṃ rudhiraṃ toyasaindhavasatphalaiḥ
- 19
मधुभिर्गन्धपुष्पैश्च अधिवास्य प्रयत्नतः
ॐ ऐं ह्रीं श्रीं कौशिकीति रुधिरं दापयामि ते
madhubhirgandhapuṣpaiśca adhivāsya prayatnataḥ
oṃ aiṃ hrīṃ śrīṃ kauśikīti rudhiraṃ dāpayāmi te
- 20
स्थाने नियोजयेद्रक्तं शिरश्च सप्रदीपकम्
एवं दत्त्वा बलिं पूर्णं फलं प्राप्नोति साधकः
sthāne niyojayedraktaṃ śiraśca sapradīpakam
evaṃ dattvā baliṃ pūrṇaṃ phalaṃ prāpnoti sādhakaḥ
- 21
हीनं स्याद्धीनतामूलं निष्फलं स्याद्विपर्ययात्
बलिदाने तु दुर्गाया अन्यत्रापि विधिः सदा
hīnaṃ syāddhīnatāmūlaṃ niṣphalaṃ syādviparyayāt
balidāne tu durgāyā anyatrāpi vidhiḥ sadā
- 22
अयमेव प्रयोक्तव्यः सद्भिर्वेतालभैरवौ
जपं समारभेत्पश्चात्पूर्ववद्ध्यानम् आस्थितः
ayameva prayoktavyaḥ sadbhirvetālabhairavau
japaṃ samārabhetpaścātpūrvavaddhyānam āsthitaḥ
- 23
हस्तेन स्रजमादाय चिन्तयेन्मनसा शिवाम्
चिन्तयित्वा गुरुं मूर्ध्नि यथा वर्णादिकं भवेत्
hastena srajamādāya cintayenmanasā śivām
cintayitvā guruṃ mūrdhni yathā varṇādikaṃ bhavet
- 24
मन्त्रं च कण्ठतो ध्यात्वा सितवर्णं हिरण्मयम्
महामायां च हृदये आत्मानं गुरुपादयोः
mantraṃ ca kaṇṭhato dhyātvā sitavarṇaṃ hiraṇmayam
mahāmāyāṃ ca hṛdaye ātmānaṃ gurupādayoḥ
- 25
आचक्षेत ततः पश्चाद्गुरोर्मन्त्रस्य चात्मनः
देव्याश्चाप्येकतां ध्यात्वा सुषुम्नावर्त्मना ततः
ācakṣeta tataḥ paścādgurormantrasya cātmanaḥ
devyāścāpyekatāṃ dhyātvā suṣumnāvartmanā tataḥ
- 26
तत्त्वस्वरूपमेकं तु षट्चक्रं प्रतिलम्बयेत्
षट्चक्रेऽपि महामायां क्षणं ध्यात्वा प्रयत्नतः
tattvasvarūpamekaṃ tu ṣaṭcakraṃ pratilambayet
ṣaṭcakre'pi mahāmāyāṃ kṣaṇaṃ dhyātvā prayatnataḥ
- 27
लम्बयेन्मूलमात्रेण वादिषोडशचक्रकम्
आदिषोडशचक्रस्थां साधकानन्दकारिणीम्
lambayenmūlamātreṇa vādiṣoḍaśacakrakam
ādiṣoḍaśacakrasthāṃ sādhakānandakāriṇīm
- 28
चिन्तयन्साधको देवीं जपकर्म समारभेत्
भ्रुवोरुपरि नाडीनां त्रयाणां प्रान्त उच्यते
cintayansādhako devīṃ japakarma samārabhet
bhruvorupari nāḍīnāṃ trayāṇāṃ prānta ucyate
- 29
तत्प्रान्तं त्रिपथस्थानं षट्कोणं चतुरङ्गुलम्
रक्तवर्णं तु योगज्ञैराज्ञाचक्रमितीर्यते
tatprāntaṃ tripathasthānaṃ ṣaṭkoṇaṃ caturaṅgulam
raktavarṇaṃ tu yogajñairājñācakramitīryate
- 30
कण्ठे त्रयाणां नाडीनां वेष्टनं विद्यते नृणाम्
सुपुम्नेडापिङ्गलानां षट्कोणं तत्षडङ्गुलम्
kaṇṭhe trayāṇāṃ nāḍīnāṃ veṣṭanaṃ vidyate nṛṇām
supumneḍāpiṅgalānāṃ ṣaṭkoṇaṃ tatṣaḍaṅgulam

