46 shlokas
- 1
भगवानुवाच
ततोऽर्घपात्रे तन्मन्त्रम् अष्टधाकृत्य संजपेत्
तेन तोयानि पुष्पाणि स्वं मण्डलमथासनम्
bhagavānuvāca
tato'rghapātre tanmantram aṣṭadhākṛtya saṃjapet
tena toyāni puṣpāṇi svaṃ maṇḍalamathāsanam
- 2
आशोधयेत्ततः पश्चात्पूजोपकरणं समम्
ॐ ऐं ह्रीं ह्रौं इति मन्त्रेण शब्दप्रांशुविवर्जितम्
āśodhayettataḥ paścātpūjopakaraṇaṃ samam
oṃ aiṃ hrīṃ hrauṃ iti mantreṇa śabdaprāṃśuvivarjitam
- 3
द्वारपालं ततो देव्या आसनानि च पूजयेत्
नन्दिभृङ्गिमहाकालगणेशा द्वारपालकाः
उत्तरादिक्रमात्पूज्या आसनानि च मध्यतः
dvārapālaṃ tato devyā āsanāni ca pūjayet
nandibhṛṅgimahākālagaṇeśā dvārapālakāḥ
uttarādikramātpūjyā āsanāni ca madhyataḥ
- 4
आधारशक्तिप्रभृति हेमाद्र्यन्तान्प्रपूजयेत्
प्रसिद्धान्सर्वतन्त्रेषु पूजाकल्पेषु भैरव
ādhāraśaktiprabhṛti hemādryantānprapūjayet
prasiddhānsarvatantreṣu pūjākalpeṣu bhairava
- 5
दशदिक्पालसहितान्धर्माधर्मादिकांस्तथा
मण्डलाग्न्यादिकोणेषु पूजयेत्पार्श्वदेशतः
daśadikpālasahitāndharmādharmādikāṃstathā
maṇḍalāgnyādikoṇeṣu pūjayetpārśvadeśataḥ
- 6
सूर्याग्निसोममरुतां मण्डलानि च पद्मकम्
रजस्तथा तमः सत्त्वं योगपीठं गुरोः पदम्
sūryāgnisomamarutāṃ maṇḍalāni ca padmakam
rajastathā tamaḥ sattvaṃ yogapīṭhaṃ guroḥ padam
- 7
सारादीन्भद्रपीठान्तान्साङ्गोपाङ्गान्प्रपूजयेत्
ब्रह्माण्डं स्वर्णडिम्बं च ब्रह्मविष्णुमहेश्वरान्
sārādīnbhadrapīṭhāntānsāṅgopāṅgānprapūjayet
brahmāṇḍaṃ svarṇaḍimbaṃ ca brahmaviṣṇumaheśvarān
- 8
ससागरान्सप्तद्वीपान्स्वर्णद्वीपं समण्डपम्
रत्नपद्मं सपर्यङ्कं रत्नस्तम्भं तथैव च
sasāgarānsaptadvīpānsvarṇadvīpaṃ samaṇḍapam
ratnapadmaṃ saparyaṅkaṃ ratnastambhaṃ tathaiva ca
- 9
पञ्चाननं मण्डलस्य मध्येऽवश्यं प्रपूजयेत्
ह्रीं मन्त्रेण ततः कूर्मपृष्ठं पाण्योर्निबध्य च
pañcānanaṃ maṇḍalasya madhye'vaśyaṃ prapūjayet
hrīṃ mantreṇa tataḥ kūrmapṛṣṭhaṃ pāṇyornibadhya ca
- 10
ध्यायेच्च पूर्ववद्देवीमासाद्यासनम् उत्तमम्
हृन्मध्ये चिन्तयेत्स्वर्णद्वीपं पर्यङ्कसंभृतम्
dhyāyecca pūrvavaddevīmāsādyāsanam uttamam
hṛnmadhye cintayetsvarṇadvīpaṃ paryaṅkasaṃbhṛtam
- 11
पश्यन्निव ततो देवीम् एकाग्रमनसा स्मरेत्
प्रत्यक्षीकृत्य हृदये मानसैरुपचारकैः
paśyanniva tato devīm ekāgramanasā smaret
pratyakṣīkṛtya hṛdaye mānasairupacārakaiḥ
- 12
षोडशानां प्रकारैस्तु हृदिस्थां पूजयेच्छिवाम्
ततस्तु वायुबीजेन दक्षिणे च पुटेन च
ṣoḍaśānāṃ prakāraistu hṛdisthāṃ pūjayecchivām
tatastu vāyubījena dakṣiṇe ca puṭena ca
- 13
नासिकाया विनिःसार्य क्रीं मन्त्रेण च भैरव
स्थापयेत्पद्ममध्ये तु तद्धस्तं न वियोजयेत्
nāsikāyā viniḥsārya krīṃ mantreṇa ca bhairava
sthāpayetpadmamadhye tu taddhastaṃ na viyojayet
- 14
कृते वियोगे हस्तस्य पुष्पात्तस्माच्च भैरव
गन्धर्वैः पूज्यते देवी पूजकैर्नाप्यते फलम्
kṛte viyoge hastasya puṣpāttasmācca bhairava
gandharvaiḥ pūjyate devī pūjakairnāpyate phalam
- 15
आवाहनं ततः कुर्याद्गायत्र्या शिरसा सह
महामायायै विद्महे त्वां चण्डिकाख्यां धीमहि
āvāhanaṃ tataḥ kuryādgāyatryā śirasā saha
mahāmāyāyai vidmahe tvāṃ caṇḍikākhyāṃ dhīmahi
- 16
एतदुक्त्वा ततः पश्चाद्धियो यो नः प्रचोदयात्
स्नानीयं देवि ते तुभ्यम् ॐ ह्रीं श्रीं नम इत्यतः
etaduktvā tataḥ paścāddhiyo yo naḥ pracodayāt
snānīyaṃ devi te tubhyam oṃ hrīṃ śrīṃ nama ityataḥ
- 17
स्नानीयं च ततो देव्यै दद्याल्लक्षणलक्षितम्
ततस्तु मूलमन्त्रेण गन्धपुष्पं सदीपकम्
snānīyaṃ ca tato devyai dadyāllakṣaṇalakṣitam
tatastu mūlamantreṇa gandhapuṣpaṃ sadīpakam
- 18
धूपादिकं प्रदद्यात्तु मोदकं पायसं तथा
सितां गुडं दधिक्षीरं सर्पिर्नानाविधैः फलैः
dhūpādikaṃ pradadyāttu modakaṃ pāyasaṃ tathā
sitāṃ guḍaṃ dadhikṣīraṃ sarpirnānāvidhaiḥ phalaiḥ
- 19
रक्तपुष्पं पुष्पमालां सुवर्णरजतादिकम्
नैवेद्यमुत्तमं देव्या लाङ्गलं मोदकं सिताम्
raktapuṣpaṃ puṣpamālāṃ suvarṇarajatādikam
naivedyamuttamaṃ devyā lāṅgalaṃ modakaṃ sitām
- 20
शाण्डिल्यकरताम्राख्यकूष्माण्डानां फलानि च
हरीतकीफलं चापि नागरङ्गकमेलकाम्
śāṇḍilyakaratāmrākhyakūṣmāṇḍānāṃ phalāni ca
harītakīphalaṃ cāpi nāgaraṅgakamelakām
- 21
बालप्रियं च यद्द्रव्यं कसेरुकबिसादिकम्
तोयं च नारिकेलस्य देव्यै देयं प्रयत्नतः
bālapriyaṃ ca yaddravyaṃ kaserukabisādikam
toyaṃ ca nārikelasya devyai deyaṃ prayatnataḥ
- 22
रक्तं कौशेयवस्त्रं च देयं नीलं कदापि न
देव्याः प्रियाणि पुष्पाणि बकुलं केशरं तथा
raktaṃ kauśeyavastraṃ ca deyaṃ nīlaṃ kadāpi na
devyāḥ priyāṇi puṣpāṇi bakulaṃ keśaraṃ tathā
- 23
माघ्यं कह्लारवज्राणि करवीरकुरुण्टकान्
अर्कपुष्पं शाल्मलकं दूर्वाङ्कुरं सुकोमलम्
māghyaṃ kahlāravajrāṇi karavīrakuruṇṭakān
arkapuṣpaṃ śālmalakaṃ dūrvāṅkuraṃ sukomalam
- 24
कुशमञ्जरिका दर्भा बन्धूककमले तथा
मालूरपत्त्रं पुष्पं च त्रिसन्ध्यारक्तपर्णके
kuśamañjarikā darbhā bandhūkakamale tathā
mālūrapattraṃ puṣpaṃ ca trisandhyāraktaparṇake
- 25
सुमनांसि प्रियाण्येतान्यम्बिकायाश्च भैरव
बन्धूकं बकुलं माघ्यं बिल्वपत्राणि संध्यकम्
sumanāṃsi priyāṇyetānyambikāyāśca bhairava
bandhūkaṃ bakulaṃ māghyaṃ bilvapatrāṇi saṃdhyakam
- 26
उत्तमं सर्वपुष्पेषु द्रव्ये पायसमोदकौ
माल्यं बन्धूकपुष्पस्य शिवायै बकुलस्य वा
uttamaṃ sarvapuṣpeṣu dravye pāyasamodakau
mālyaṃ bandhūkapuṣpasya śivāyai bakulasya vā
- 27
करवीरस्य माघ्यस्य सहस्राणां ददाति यः
स कामान्प्राप्य चाभीष्टान्मम लोके प्रमोदते
karavīrasya māghyasya sahasrāṇāṃ dadāti yaḥ
sa kāmānprāpya cābhīṣṭānmama loke pramodate
- 28
चन्दनं शीतलं चैव कालीयकसमन्वितम्
अनुलेपनमुख्यं तु देव्यै दद्यात्प्रयत्नतः
candanaṃ śītalaṃ caiva kālīyakasamanvitam
anulepanamukhyaṃ tu devyai dadyātprayatnataḥ
- 29
कर्पूरं कुङ्कुमं कूर्चं मृगनाभिं सुगन्धिकम्
कालीयकं सुगन्धेषु देव्याः प्रीतिकरं परम्
karpūraṃ kuṅkumaṃ kūrcaṃ mṛganābhiṃ sugandhikam
kālīyakaṃ sugandheṣu devyāḥ prītikaraṃ param
- 30
यक्षधूपः प्रतीवाहः पिण्डधूपः सगोलकः
अगुरु सिन्धुवारश्च धूपाः प्रीतिकरा मताः
yakṣadhūpaḥ pratīvāhaḥ piṇḍadhūpaḥ sagolakaḥ
aguru sindhuvāraśca dhūpāḥ prītikarā matāḥ

