Hitopadesha · Book 3 3.108
3.108राजा पृच्छति कथम् एतत्
मन्त्री कथयति
अस्त्य् अयोध्यायां पुरि चूडामणिर्नाम क्षत्रियः
तेन धनार्थिना महता क्लेशेन भगवांश्चन्द्रार्धचूडामणिश्चिरम् आराधितः
ततः क्षीणपापो ऽसौ स्वप्ने दर्शनं दत्त्वा भगवदादेशाद्यक्षेश्वरेणादिष्टो यत्त्वम् अद्य प्रातः क्षौरं कारयित्वा लगुडहस्तः सन्स्वगृहद्वारि निभृतं स्थास्यसि ततो यम् एवागतं भिक्षुकं प्राङ्गणे पश्यसि तं निर्दक्षं लगुडप्रहारेण हनिष्यसि
ततो ऽसौ भिक्षुकस्तत्क्षणात्सुवर्णकलसो भविष्यति
तेन त्वया यावज्जीवं सुखिना भवितव्यम्
ततस्तथानुष्ठिते तद्वृत्तम्
तत्र क्षौरकरणायानीतेन नापितेन तत्सर्वम् आलोक्य चिन्तितमये निधिप्राप्तेर् अयम् उपायः
तद् अहम् अप्य् एवं किं न करोमि ततः प्रभृति स नापितः प्रत्यहं तथाविधो लगुडहस्तः सुनिभृतं भिक्षोर् आगमनं प्रतीक्षते
एकदा तेन प्राप्तो भिक्षुर्लगुडेन व्यापादितः
तस्माद् अपराधात्सो ऽपि नापितो राजपुरुषैर्व्यापादितः
अतो ऽहं ब्रवीमि पुण्याल्लब्धं यद् एकेन इत्यादि
राजाह
पुरावृत्तकथोद्गारैः कथं निर्णीयते परः
स्यान्निष्कारणबन्धुर्वा किं वा विश्वासघातकः
Transliteration
rājā pṛcchati katham etat
mantrī kathayati
asty ayodhyāyāṃ puri cūḍāmaṇirnāma kṣatriyaḥ
tena dhanārthinā mahatā kleśena bhagavāṃścandrārdhacūḍāmaṇiściram ārādhitaḥ
tataḥ kṣīṇapāpo 'sau svapne darśanaṃ dattvā bhagavadādeśādyakṣeśvareṇādiṣṭo yattvam adya prātaḥ kṣauraṃ kārayitvā laguḍahastaḥ sansvagṛhadvāri nibhṛtaṃ sthāsyasi tato yam evāgataṃ bhikṣukaṃ prāṅgaṇe paśyasi taṃ nirdakṣaṃ laguḍaprahāreṇa haniṣyasi
tato 'sau bhikṣukastatkṣaṇātsuvarṇakalaso bhaviṣyati
tena tvayā yāvajjīvaṃ sukhinā bhavitavyam
tatastathānuṣṭhite tadvṛttam
tatra kṣaurakaraṇāyānītena nāpitena tatsarvam ālokya cintitamaye nidhiprāpter ayam upāyaḥ
tad aham apy evaṃ kiṃ na karomi tataḥ prabhṛti sa nāpitaḥ pratyahaṃ tathāvidho laguḍahastaḥ sunibhṛtaṃ bhikṣor āgamanaṃ pratīkṣate
ekadā tena prāpto bhikṣurlaguḍena vyāpāditaḥ
tasmād aparādhātso 'pi nāpito rājapuruṣairvyāpāditaḥ
ato 'haṃ bravīmi puṇyāllabdhaṃ yad ekena ityādi
rājāha
purāvṛttakathodgāraiḥ kathaṃ nirṇīyate paraḥ
syānniṣkāraṇabandhurvā kiṃ vā viśvāsaghātakaḥ
By System Admin
Translation
Draft in progress