20 shlokas
- 1
आदित्याश्च ह वा अङ्गिरसश्च स्वर्गे लोके ऽस्पर्धन्त वयं पूर्वे स्वर् एष्यामो वयं पूर्व इति
ādityāśca ha vā aṅgirasaśca svarge loke 'spardhanta vayaṃ pūrve svar eṣyāmo vayaṃ pūrva iti
- 2
त आदित्या लघुभिः सामभिश्चतुर्भि स्तोमैर्द्वाभ्यां पृष्ठ्याभ्यां स्वर्गं लोकम् अभ्यप्लवन्त
ta ādityā laghubhiḥ sāmabhiścaturbhi stomairdvābhyāṃ pṛṣṭhyābhyāṃ svargaṃ lokam abhyaplavanta
- 3
यद् अभ्यप्लवन्त तस्माद् अभिप्लवः
yad abhyaplavanta tasmād abhiplavaḥ
- 4
अन्वञ्च एवाङ्गिरसो गुरुभिः सामभिः सर्वै स्तोमैः सर्वैः पृष्ठ्यैः स्वर्गं लोकम् अभ्यस्पृशन्त
anvañca evāṅgiraso gurubhiḥ sāmabhiḥ sarvai stomaiḥ sarvaiḥ pṛṣṭhyaiḥ svargaṃ lokam abhyaspṛśanta
- 5
यद् अभ्यस्पृशन्त तस्मात्स्पृश्यः
yad abhyaspṛśanta tasmātspṛśyaḥ
- 6
तं वा एतं स्पृश्यं सन्तं पृष्ठ्य इत्य् आचक्षते परोक्षेण
taṃ vā etaṃ spṛśyaṃ santaṃ pṛṣṭhya ity ācakṣate parokṣeṇa
- 7
परोक्षप्रिया इव हि देवा भवन्ति प्रत्यक्षद्विषः
parokṣapriyā iva hi devā bhavanti pratyakṣadviṣaḥ
- 8
अभिप्लवात्पृष्ठ्यो निर्मितः
abhiplavātpṛṣṭhyo nirmitaḥ
- 9
पृष्ठ्याद् अभिजित्
pṛṣṭhyād abhijit
- 10
अभिजितः स्वरसामानः
abhijitaḥ svarasāmānaḥ
- 11
स्वरसामभ्यो विषुवान्
svarasāmabhyo viṣuvān
- 12
विषुवतः स्वरसामानः
viṣuvataḥ svarasāmānaḥ
- 13
स्वरसामभ्यो विश्वजित्
svarasāmabhyo viśvajit
- 14
विश्वजितः पृष्ठ्याभिप्लवौ
viśvajitaḥ pṛṣṭhyābhiplavau
- 15
पृष्ठ्याभिप्लवाभ्यां गवायुषी
pṛṣṭhyābhiplavābhyāṃ gavāyuṣī
- 16
गवायुर्भ्यां दशरात्रः
gavāyurbhyāṃ daśarātraḥ
- 17
तानि ह वा एतानि यज्ञारण्यानि यज्ञकृन्तत्राणि
tāni ha vā etāni yajñāraṇyāni yajñakṛntatrāṇi
- 18
तेषां शतं शतं रथानान्यन्तरं तद्यथारण्यान्य् आरूढा अशनापिपासे ते पाप्मानं तृंहती परिप्लवेते
teṣāṃ śataṃ śataṃ rathānānyantaraṃ tadyathāraṇyāny ārūḍhā aśanāpipāse te pāpmānaṃ tṛṃhatī pariplavete
- 19
एवं हैवैते प्रप्लवन्ते ये ऽविद्वांस उपयन्ति
evaṃ haivaite praplavante ye 'vidvāṃsa upayanti
- 20
अथ ये विद्वांस उपयन्ति तद्यथा प्रवाहात्प्रवाहं स्थलात्स्थलं समात्समं सुखात्सुखम् अभयाद् अभयम् उपसंक्रामन्तीत्य् एवं हैवैते संवत्सरस्योदृचं समश्नवामहा इति ब्राह्मणम्
atha ye vidvāṃsa upayanti tadyathā pravāhātpravāhaṃ sthalātsthalaṃ samātsamaṃ sukhātsukham abhayād abhayam upasaṃkrāmantīty evaṃ haivaite saṃvatsarasyodṛcaṃ samaśnavāmahā iti brāhmaṇam

