54 shlokas
- 1
पाणिग्रहे पुलकितं वपुर् ऐशं भूतिभूषितं जयति
अङ्कुरित इव मनोभूर्यस्मिन्भस्मावशेषो ऽपि
pāṇigrahe pulakitaṃ vapur aiśaṃ bhūtibhūṣitaṃ jayati
aṅkurita iva manobhūryasminbhasmāvaśeṣo 'pi
- 2
मा वम संवृणु विषम् इदम् इति सातङ्कं पितामहेनोक्तः
प्रातर्जयति सलज्जः कज्जलमलिनाधरः शम्भुः
mā vama saṃvṛṇu viṣam idam iti sātaṅkaṃ pitāmahenoktaḥ
prātarjayati salajjaḥ kajjalamalinādharaḥ śambhuḥ
- 3
जयति प्रियापदान्ते गरलग्रैवेयकः स्मरारातिः
विषमविशिखे विशन्न् इव शरणं गलबद्धकरवालः
jayati priyāpadānte garalagraiveyakaḥ smarārātiḥ
viṣamaviśikhe viśann iva śaraṇaṃ galabaddhakaravālaḥ
- 4
जयति ललाटकटाक्षः शशिमौलेः पक्ष्मलः प्रियाग्रणतौ
धनुषि स्मरेण निहितः सकण्टकः केतकेषुर् इव
jayati lalāṭakaṭākṣaḥ śaśimauleḥ pakṣmalaḥ priyāgraṇatau
dhanuṣi smareṇa nihitaḥ sakaṇṭakaḥ ketakeṣur iva
- 5
जयति जटाकिञ्जल्कं गङ्गामधु मुण्डवलयबीजमयम्
गलगरलपङ्कसम्भवम् अम्भोरुहम् आननं शम्भोः
jayati jaṭākiñjalkaṃ gaṅgāmadhu muṇḍavalayabījamayam
galagaralapaṅkasambhavam ambhoruham ānanaṃ śambhoḥ
- 6
सन्ध्यासलिलाञ्जलिम् अपि कङ्कणफणिपीयमानम् अविजानन्
गौरीमुखार्पितमना विजयाहसितः शिवो जयति
sandhyāsalilāñjalim api kaṅkaṇaphaṇipīyamānam avijānan
gaurīmukhārpitamanā vijayāhasitaḥ śivo jayati
- 7
प्रतिबिम्बितगौरीमुखविलोकनोत्कम्पशिथिलकरगलितः
स्वेदभरपूर्यमाणः शम्भोः सलिलाञ्जलिर्जयति
pratibimbitagaurīmukhavilokanotkampaśithilakaragalitaḥ
svedabharapūryamāṇaḥ śambhoḥ salilāñjalirjayati
- 8
प्रणयकुपितप्रियापदलाक्षासन्ध्यानुबन्धमधुरेन्दुः
तद्वलयकनकनिकषग्रावग्रीवः शिवो जयति
praṇayakupitapriyāpadalākṣāsandhyānubandhamadhurenduḥ
tadvalayakanakanikaṣagrāvagrīvaḥ śivo jayati
- 9
पूर्णनखेन्दुर्द्विगुणितमञ्जीरा प्रेमशृङ्खला जयति
हरशशिलेखा गौरीचरणाङ्गुलिमध्यगुल्फेषु
pūrṇanakhendurdviguṇitamañjīrā premaśṛṅkhalā jayati
haraśaśilekhā gaurīcaraṇāṅgulimadhyagulpheṣu
- 10
श्रीकरपिहितं चक्षुः सुखयतु वः पुण्डरीकनयनस्य
जघनम् इवेक्षितुम् आगतम् अब्जनिभं नाभिसुषिरेण
śrīkarapihitaṃ cakṣuḥ sukhayatu vaḥ puṇḍarīkanayanasya
jaghanam ivekṣitum āgatam abjanibhaṃ nābhisuṣireṇa
- 11
श्यामं श्रीकुचकुङ्कुमपिञ्जरितम् उरो मुरद्विषो जयति
दिनमुखनभ इव कौस्तुभविभाकरो यद्विभूषयति
śyāmaṃ śrīkucakuṅkumapiñjaritam uro muradviṣo jayati
dinamukhanabha iva kaustubhavibhākaro yadvibhūṣayati
- 12
प्रतिबिम्बितप्रियातनु सकौस्तुभं जयति मधुभिदो वक्षः
पुरुषायितम् अभ्यस्यति लक्ष्मीर्यद्वीक्ष्य मुकुरम् इव
pratibimbitapriyātanu sakaustubhaṃ jayati madhubhido vakṣaḥ
puruṣāyitam abhyasyati lakṣmīryadvīkṣya mukuram iva
- 13
केलिचलाङ्गुलिलम्भितलक्ष्मीनाभिर्मुरद्विषश्चरणः
स जयति येन कृता श्रीर् अनुरूपा पद्मनाभस्य
kelicalāṅgulilambhitalakṣmīnābhirmuradviṣaścaraṇaḥ
sa jayati yena kṛtā śrīr anurūpā padmanābhasya
- 14
रोमावली मुरारेः श्रीवत्सनिषेविताग्रभागा वः
उन्नालनाभिनलिनच्छायेवोत्तापम् अपहरतु
romāvalī murāreḥ śrīvatsaniṣevitāgrabhāgā vaḥ
unnālanābhinalinacchāyevottāpam apaharatu
- 15
आदाय सप्ततन्त्रोचितां विपञ्चीम् इव त्रयीं गायन्
मधुरं तुरङ्गवदनोचितं हरिर्जयति हयमूर्धा
ādāya saptatantrocitāṃ vipañcīm iva trayīṃ gāyan
madhuraṃ turaṅgavadanocitaṃ harirjayati hayamūrdhā
- 16
स जयति महाबाहो जलनिधिजठरे चिरं निमग्नापि
येनान्त्रैर् इव सह फणिगणैर्बलाद् उद्धृता धरणी
sa jayati mahābāho jalanidhijaṭhare ciraṃ nimagnāpi
yenāntrair iva saha phaṇigaṇairbalād uddhṛtā dharaṇī
- 17
ब्रह्माण्डकुम्भकारं भुजगाकारं जनार्दनं नौमि
स्फारे यत्फणचक्रे धरा शरावश्रियं वहति
brahmāṇḍakumbhakāraṃ bhujagākāraṃ janārdanaṃ naumi
sphāre yatphaṇacakre dharā śarāvaśriyaṃ vahati
- 18
चण्डीजङ्घाकाण्डः शिरसा चरणस्पृशि प्रिये जयति
शङ्करपर्यन्तजितो विजयस्तम्भः स्मरस्येव
caṇḍījaṅghākāṇḍaḥ śirasā caraṇaspṛśi priye jayati
śaṅkaraparyantajito vijayastambhaḥ smarasyeva
- 19
उन्नालनाभिपङ्केरुह इव येनावभाति शम्भुर् अपि
जयति पुरुषायितायास्तदाननं शैलकन्यायाः
unnālanābhipaṅkeruha iva yenāvabhāti śambhur api
jayati puruṣāyitāyāstadānanaṃ śailakanyāyāḥ
- 20
अङ्कनिलीनगजाननशङ्काकुलबाहुलेयहृतवसनौ
सस्मितहरकरकलितौ हिमगिरितनयास्तनौ जयतः
aṅkanilīnagajānanaśaṅkākulabāhuleyahṛtavasanau
sasmitaharakarakalitau himagiritanayāstanau jayataḥ
- 21
कण्ठोचितो ऽपि हुङ्कृतिमात्रनिरस्तः पदान्तिके पतितः
यस्याश्चन्द्रशिखः स्मरभल्लनिभो जयति सा चण्डी
kaṇṭhocito 'pi huṅkṛtimātranirastaḥ padāntike patitaḥ
yasyāścandraśikhaḥ smarabhallanibho jayati sā caṇḍī
- 22
देवेऽर्पितवरणस्रजि बहुमाये वहति कैटभीरूपम्
जयति सुरासुरहसिता लज्जाजिह्मेक्षणा लक्ष्मीः
deve'rpitavaraṇasraji bahumāye vahati kaiṭabhīrūpam
jayati surāsurahasitā lajjājihmekṣaṇā lakṣmīḥ
- 23
तान् असुरान् अपि हरिम् अपि तं वन्दे कपटकैटभीरूपम्
यैर्यद्बिम्बाधरमधुलुब्धैः पीयूषम् अपि मुमुचे
tān asurān api harim api taṃ vande kapaṭakaiṭabhīrūpam
yairyadbimbādharamadhulubdhaiḥ pīyūṣam api mumuce
- 24
तल्पीकृताहिर् अगणितगरुडो हाराभिहतविधिर्जयति
फणशतपीतश्वासो रागान्धायाः श्रियः केलिः
talpīkṛtāhir agaṇitagaruḍo hārābhihatavidhirjayati
phaṇaśatapītaśvāso rāgāndhāyāḥ śriyaḥ keliḥ
- 25
स्मेराननेन हरिणा यत्स्पृहम् आकारवेदिनाकलितम्
जयति पुरुषायितायाः कमलायाः कैटभीध्यानम्
smerānanena hariṇā yatspṛham ākāravedinākalitam
jayati puruṣāyitāyāḥ kamalāyāḥ kaiṭabhīdhyānam
- 26
कृतकान्तकेलिकुतुकश्रीशीतश्वाससेकनिद्राणः
घोरितविततालिरुतो नाभिसरोजे विधिर्जयति
kṛtakāntakelikutukaśrīśītaśvāsasekanidrāṇaḥ
ghoritavitatāliruto nābhisaroje vidhirjayati
- 27
एकरद द्वैमातुर निस्त्रिगुण चतुर्भुजापि पञ्चकर
जय षण्मुखनुत सप्तच्छदगन्धिमदाष्टतनुतनय
ekarada dvaimātura nistriguṇa caturbhujāpi pañcakara
jaya ṣaṇmukhanuta saptacchadagandhimadāṣṭatanutanaya
- 28
मङ्गलकलशद्वयमयकुम्भम् अदम्भेन भजत गजवदनम्
यद्दानतोयतरलैस्तिलतुलनालम्बि रोलम्बैः
maṅgalakalaśadvayamayakumbham adambhena bhajata gajavadanam
yaddānatoyataralaistilatulanālambi rolambaiḥ
- 29
याभिर् अनङ्गः साङ्गीकृतः स्त्रियो ऽस्त्रीकृताश्च ता येन
वामाचरणप्रवणौ प्रणम्ततौ कामिनीकामौ
yābhir anaṅgaḥ sāṅgīkṛtaḥ striyo 'strīkṛtāśca tā yena
vāmācaraṇapravaṇau praṇamtatau kāminīkāmau
- 30
विहितघनालङ्कारं विचित्रवर्णावलीमयस्फुरणम्
शक्रायुधम् इव वक्रं वल्मीकभुवं कविं नौमि
vihitaghanālaṅkāraṃ vicitravarṇāvalīmayasphuraṇam
śakrāyudham iva vakraṃ valmīkabhuvaṃ kaviṃ naumi

