14 shlokas
- 1
ग्रामारण्यानाम् अध्वनि निवेशान्यवसेन्धनोदकवशेन परिसंख्याय स्थानासनगमनकालं च यात्रां यायात्
grāmāraṇyānām adhvani niveśānyavasendhanodakavaśena parisaṃkhyāya sthānāsanagamanakālaṃ ca yātrāṃ yāyāt
- 2
तत्प्रतीकारद्विगुणं भक्तोपकरणं वाहयेत्
tatpratīkāradviguṇaṃ bhaktopakaraṇaṃ vāhayet
- 3
अशक्तो वा सैन्येष्वायोजयेत् अन्तरेषु वा निचिनुयात्
aśakto vā sainyeṣvāyojayet antareṣu vā nicinuyāt
- 4
पुरस्तान्नायकः मध्ये कलत्रं स्वामी च पार्श्वयोर् अश्वा बाहूत्सारः चक्रान्तेषु हस्तिनः प्रसारवृद्धिर्वा पश्चात्सेनापतिर्यायान्निविशेत
purastānnāyakaḥ madhye kalatraṃ svāmī ca pārśvayor aśvā bāhūtsāraḥ cakrānteṣu hastinaḥ prasāravṛddhirvā paścātsenāpatiryāyānniviśeta
- 5
सर्वतो वनाजीवः प्रसारः
sarvato vanājīvaḥ prasāraḥ
- 6
स्वदेशाद् अन्वायतिर्वीवधः
svadeśād anvāyatirvīvadhaḥ
- 7
मित्रबलम् आसारः
mitrabalam āsāraḥ
- 8
कलत्रस्थानम् अपसारः
kalatrasthānam apasāraḥ
- 9
पुरस्ताद् अभ्याघाते मकरेण यायात्पश्चाच्छकटेन पार्श्वयोर्वज्रेण समन्ततः सर्वतोभद्रेण एकायने सूच्या
purastād abhyāghāte makareṇa yāyātpaścācchakaṭena pārśvayorvajreṇa samantataḥ sarvatobhadreṇa ekāyane sūcyā
- 10
पथिद्वैधीभावे स्वभूमितो यायात्
pathidvaidhībhāve svabhūmito yāyāt
- 11
अभूमिष्ठानां हि स्वभूमिष्ठा युद्धे प्रतिलोमा भवन्ति
abhūmiṣṭhānāṃ hi svabhūmiṣṭhā yuddhe pratilomā bhavanti
- 12
योजनम् अधमा अध्यर्धं मध्यमा द्वियोजनम् उत्तमा सम्भाव्या वा गतिः
yojanam adhamā adhyardhaṃ madhyamā dviyojanam uttamā sambhāvyā vā gatiḥ
- 13
आश्रयकारी सम्पन्नघाती पार्ष्णिर् आसारो मध्यम उदासीनो वा प्रतिकर्तव्यः संकटो मार्गः शोधयितव्यः कोशो दण्डो मित्रामित्राटवीबलं विष्टिर् ऋतुर्वा प्रतीक्ष्याः कृतदुर्गकर्मनिचयरक्षाक्षयः क्रीतबलनिर्वेदो मित्रबलनिर्वेदश्चागमिष्यति उपजपितारो वा नातित्वरयन्ति शत्रुर् अभिप्रायं वा पूरयिष्यति इति शनैर्यायात्विपर्यये शीघ्रम्
āśrayakārī sampannaghātī pārṣṇir āsāro madhyama udāsīno vā pratikartavyaḥ saṃkaṭo mārgaḥ śodhayitavyaḥ kośo daṇḍo mitrāmitrāṭavībalaṃ viṣṭir ṛturvā pratīkṣyāḥ kṛtadurgakarmanicayarakṣākṣayaḥ krītabalanirvedo mitrabalanirvedaścāgamiṣyati upajapitāro vā nātitvarayanti śatrur abhiprāyaṃ vā pūrayiṣyati iti śanairyāyātviparyaye śīghram
- 14
हस्तिस्तम्भसंक्रमसेतुबन्धनौकाष्ठवेणुसंघातैर् अलाबुचर्मकरण्डदृतिप्लवगण्डिकावेणिकाभिश्चोदकानि तारयेत्
hastistambhasaṃkramasetubandhanaukāṣṭhaveṇusaṃghātair alābucarmakaraṇḍadṛtiplavagaṇḍikāveṇikābhiścodakāni tārayet

